Háskólinn á Akureyri

„Skiptinám mitt við University of Manitoba í Winnipeg veitti mér ómetanlega reynslu og víkkaði sjóndeildarhringinn til muna. Winnipeg er einstakur staður og tengslin við Ísland mjög sterk þar sem margir eiga ættir sínar að rekja til Íslands. Ég kynntist frábæru fólki alls staðar að út heiminum, fann fyrir ótrúlegri góðvild í garð Íslendinga og áttaði mig á því að þrjátíu stiga frost er ótrúlega fljótt að venjast. “

„Lotukennsla, símat og persónulegt umhverfi er það sem lögfræðikennslan við HA býður upp á. Í náminu fékk ég djúpan skilning á viðfangsefninu og tileinkaði mér öguð vinnubrögð. Ég nýtti mér einnig þann möguleika að fara í skiptinám og dvaldi við Kaupmannarhafarháskóla einn vetur, það var ómissandi reynsla.“

„Námsframboð við Háskólann á Akureyri varð til þess að ég flutti norður. Ég hafði alla tíð búið á Akranesi og því spennandi að kanna nýjar slóðir. Líftækni er krefjandi og áhugavert nám sem kemur inná hin ýmsu svið og veitir yfirgripsmikla þekkingu sem kemur til með nýtast í frekara námi. Framúrskarandi aðstaða og afar hæfir kennarar sem leggja metnað sinn í að veita nemendum þá aðstoð sem þeir þurfa, gera Háskólann á Akureyri að þeirri menntastofnun sem hann er í dag.“

„Ég er mjög ánægð með veru mína í Háskólanum á Akureyri, það er góður andi í skólanum og félagslífið frábært. Ég hef líka prófað að vera bæði staðarnemi og fjarnemi og það reyndist mér auðvelt að skipta á milli þessara námsforma. Iðjuþjálfunarfræði er bæði áhugaverð og krefjandi námsgrein og ég hlakka til að takast á við starfið að námi loknu.“

„Háskólinn á Akureyri er persónulegur skóli staðsettur í einstöku umhverfi. Hér er t.d. frábær aðstaða til iðkunar vetraríþrótta. Reyndar er íþróttalífið mjög mikið í bænum bara almennt og hægt að velja úr hinum ýmsu tómstundum. Hér er gott að vera með börn og mikill kostur hvað stutt er í alla þjónustu. Þá gæti ég ekki hafa valið mér skemmtilegra nám en ég legg stund á sjávarútvegsfræði.“

„Ástæðan fyrir því að ég kaus að leggja stund á nám í hjúkrunarfræði er sú að mér finnst hjúkrun vera heillandi starf sem opnar fjölmargar dyr. Að námi loknu biðu mín spennandi tækifæri. Háskólinn á Akureyri er góður í alla staði, fámennir bekkir eru sérlegur kostur, þeir gera það að verkum að námið verður persónulegt og góð tengsl myndast milli nemenda og kennara.“

„Háskólinn á Akureyri veitir nemendum sínum einstakt tækifæri til að taka virkan þátt í nýsköpun þekkingar á fjölmörgum sviðum. Starfsfólk háskólans telur það hlutverk sitt að skapa vettvang þar sem nemendum líður vel í persónulegu umhverfi sem örvar þá til skapandi verka. Verið velkomin í Háskólann á Akureyri!“

„Fjölmiðlafræðinámið er fyrst og fremst gríðarlega fjölbreytt og skemmtilegt. Það er lögð rík áhersla á sjálfstæð vinnubrögð og frumkvæði. Námið hefur nýst mér vel í störfum mínum hjá Ríkisútvarpinu og er því góður grunnur fyrir störf inn á fjölmiðlum.“