Fjölmiðlafræðin er fræðigrein sem skoðar fjölmiðla, stöðu þeirra og áhrif í samfélaginu. Háskólinn á Akureyri er eini háskólinn á Íslandi sem býður upp á 180 ECTS eininga nám í fjölmiðlafræði til B.A.-prófs.
Námið
Fjölmiðlafræðinámið er þriggja ára nám og tekur mið af þeirri þróun sem hefur orðið á þessu sviði í helstu háskólum á Vesturlöndum. Það er gert með því að tengja saman faglega þekkingu og færni í framsetningu, sem er viðfangsefnið í svonefndum blaðamannaskólum, og fræðilega þekkingu og aðferðafræði sem er undirstaðan í hefðbundnu háskólanámi. Þannig fá nemendur verklega þjálfun, til að mynda í prentmiðlun, ljósvakamiðlun, vefmiðlun, myndfræði og myndnotkun, auk þess sem lagaleg og siðferðileg umgjörð blaðamennskunnar er tekin fyrir. Einnig fá þeir góða innsýn í þróun nútímasamfélagsins, m.a. með aðferðum stjórnmálafræði, félagsfræði, hagfræði og mannfræði.
Kennsluhættir og -tilhögun
Fjölmiðlafræðin rýnir í ástand fjölmiðla á Íslandi og erlendis. Skoðuð eru kerfisbundið fjölmörg atriði sem varða stöðu fjölmiðla í samfélaginu, bæði í samtímanum og í sögulegu ljósi. Í sérstökum námskeiðum eru greindar áleitnar spurningar um eignarhald á fjölmiðlum, siðfræði í blaða- og fréttamennsku og ólíka fjölmiðlun mismunandi menningarheima.
Margvíslegir möguleikar
Fjölmiðlafræðingar frá HA hafa fengið mjög góðar viðtökur á vinnumarkaði og margir þeirra eru
nú við störf á íslenskum fjölmiðlum. Aðrir hafa kosið að fara í framhaldsnám erlendis í ýmsum greinum, en
fjölmiðlafræði opnar einmitt margar dyr til slíks náms.
|
„Það sem gerir fjölmiðlafræðina skemmtilega er hversu fjölbreytileg hún er. Mikil áhersla er lögð á að námið sé jafnt verklegt sem bóklegt sem gerir það að verkum að við kynnumst eðli fjölmiðla frá mörgum ólíkum hliðum. Það er mjög krefjandi að fá að spreyta sig aðeins og þetta „learning by doing“ fyrirkomulag (nám í verki) er ótrúlega skemmtilegt. Fjölmiðlafræðin er ný og spennandi námsgrein og þess vegna valdi ég hana.“ Áslaug Karen Jóhannsdóttir |
 |
