Nútímafræði

Brauðmolar

Forsíða » Félagsvísindadeild » Nútímafræði

Nútímafræði er þverfagleg grein á sviði hugvísinda. Háskólinn á Akureyri býður einn íslenskra háskóla upp á 180 ECTS eininga nám í nútímafræði til B.A.-gráðu. Í náminu er hugað að rótum nútímans og þeim umbyltingum sem honum hafa fylgt, en nútíminn er nafn á þeim lífsháttum, hugmyndaheimi og samfélagsgerð sem hóf að ryðja sér til rúms á Vesturlöndum á ofanverðri 18. öld. Námið er þverfaglegt vegna þess að fjallað er um nútímann frá mörgum hliðum, m.a. frá sjónarhóli heimspeki, sagnfræði, bókmenntafræði og ýmissa félagsvísindagreina.

Símat
Námsmatið byggir á símati, sem þýðir að námskeiðum lýkur ekki með einu stóru próf, heldur eru verkefni, ritgerðir og próf lögð fyrir nemendur jafnt og þétt yfir allt misserið. Það gerir nemendum kleift að fylgjast vel með eigin árangri. Hluti kennslunnar fer fram á ensku.

Hvers vegna nútímafræði?
Nútímafræði er góður kostur fyrir þá sem vilja afla sér breiðrar menntunar með öflugum grunni í hugvísindum.

Hún hentar þeim vel sem vilja taka hluta af námi sínu við erlenda háskóla, en nemendur eru hvattir til þess að eyða a.m.k. einu misseri við erlendan samstarfsháskóla.
Hún hentar þeim vel sem vilja taka aðal- eða aukagrein í hug- eða félagsvísindum við Háskóla Íslands eða erlenda samstarfsháskóla.
Hún er góður undirbúningur fyrir framhaldsnám í ýmsum greinum hug- og félagsvísinda.
Hún eflir víðsýni, skilning á eigin umhverfi, gagnrýna hugsun og getu til að takast á við flókin verkefni. Námið veitir m.ö.o. staðgóða almenna menntun, sem er eftirsóknarverð í margvíslegum störfum, hvort sem er hjá ríki eða sveitarfélögum, stofnunum, samtökum eða einkafyrirtækjum.

„Mér fannst nútímafræðin mjög skemmtilegt fag, ég var í fyrsta hópnum sem var í þessu námi við HA og við nutum þess að hefja þessa tilraun. Nútímafræðin spannar vítt svið og veltir upp ýmsum áhugaverðum flötum á samtíma okkar, þeim vandamálum og verkefnum sem við nútímamanneskjurnar glímum við. Þessi fræði hafa gagnast mér mjög vel í leik og starf og aukið skilning minn og þekkingu.“

Sigrún Björk Jakobsdóttir
bæjarfulltrúi á Akureyri