Framhaldsnám við Háskólann á Akureyri

Á heilbrigðisvísindasviði er starfrækt framhaldsnámsdeild sem býður nám til meistaraprófs í heilbrigðisvísindum. Námið er 120 einingar og samanstendur af sex 10 eininga námskeiðum og 60 eininga rannsóknarverkefni. Einnig er í boði 40 eininga viðbótarpróf á meistarastigi. Inntökuskilyrði er fullgilt háskólapróf á sviði heilbrigðisvísinda og skyldra greina með að öllu jöfnu fyrstu einkunn frá viðurkenndri háskólastofnun.

Innan hug- og félagsvísindasviðs er boðið upp á margskonar framhaldsnám, meðal annars rannsóknatengt meistaranám í félagsvísindum, meistaranám í menntunarfræðum og menntavísindum sem tekur að jafnaði tvö ár og viðbótarnám við kennaradeild sem lýkur með viðbótarprófi á meistarastigi. Við lagadeild er hægt að taka ML-prófgráðu í lögfræði sem er tveggja ára nám á meistarastigi en að auki er í boði meistara- og diplómunám í heimskautarétti.

Á viðskipta- og raunvísindasviði bjóða auðlindadeild og viðskiptadeild upp á rannsóknartengt meistaranám í
auðlindafræðum og viðskiptafræðum þar sem nám er sniðið að einstökum nemendum og rannsóknarverkefnum. Skipulag meistaranámsins er á margan hátt ólíkt því sem gildir á bakkalárstigi. Til að mynda er ekki fyrirliggjandi ákveðin námskrá meistaranáms, heldur er námið einstaklingsmiðað þannig að hver nemandi fylgir eigin námskrá sem er sérsniðin að þörfum hans og þess rannsóknarverkefnis sem hann vinnur að á námstímanum.