Útskriftarveisla og endurfundir í háskólanum 14. júní 2008
Að kvöldi brautskráningardags 14. júní var slegið upp útskriftar-og endurfundaveislu í mötuneyti háskólans að Sólborg. Teitið heppnaðist einstaklega vel þetta árið, veitingar voru góðar sem og skemmtiatriði. Hundur í óskilum sá um veislustjórn og vöktu þeir félagar mikla kátínu hjá gestum. Þá fór fram æsispennandi spurningarkeppni en þar áttust við lið eldri nemenda, lið nýútskrifaðra nemenda og lið kennara við Háskólann á Akureyri. Fór svo að kennaraliðið bar sigur úr bítum. Eftir matinn lék Ingó (oft kenndur við Idol) fyrir fjörugum dansi. Hér fyrir neðan má sjá myndir frá herlegheitunum:
Útskriftarveisla og endurfundir í Sjallanum 9. júní 2007
Að kvöldi brautskráningardags 9. júní 2007 efndu Góðvinir og FSHA til útskriftarveislu og endurfunda brautskráðra nemenda í Sjallanum. Er þetta í annað skipti sem slík hátíð er haldin. Dagskráin hófst með fordrykk og síðan var borin fram þríréttuð máltíð. Flutt voru ávörp og skemmtiatriði og farið var í samkvæmisleiki. Mesta athygli vakti Marimba sveitin frá Hafralækjarskóla sem spilaði nokkur lög fyrir gestina. Dagskránni lauk með dansleik þar sem hljómsveitin Bermúda spilaði. Veislustjóri var Þórhallur Þórhallsson
Útskriftarveisla og endurfundir í Sjallanum 10. júní 2006
Að kvöldi brautskráningardags 10. júní 2006 efndu Góðvinir Háskólans á Akureyri í samstarfi við Félag stúdenta HA til endurfunda brautskráðra nemenda og útskriftarfagnaðar í Sjallanum. Dagskráin hófst með fordrykk og léttum veitingum, en síðar um kvöldið voru flutt ávörp og skemmtiatriði og að lokum var dansleikur með Sérsveitinni. Þetta er í fyrsta skipti sem efnt er til hátíðar af þessu tagi við Háskólann á Akureyri, en það er von stjórnar Góðvina að nú sé tekið fyrsta skrefið að því að festa hátíðina í sessi sem hefð.
