Markmið og veganesti nemenda
Meginmarkmið hjúkrunarfræðibrautar er að mennta einstaklinga í undirstöðugreinum heilbrigðisvísinda í samræmi við þarfir samfélagsins hverju sinni.
Hjúkrunarfræðingar frá Háskólanum á Akureyri eiga að vera faglega færir um að gegna almennum hjúkrunarstörfum, svo og stjórnunar- og fræðslustörfum á flestum sviðum heilbrigðisþjónustu. Atvinnumöguleikar eru fjölbreytilegir hérlendis og erlendis, enda er námið alþjóðlega viðurkennt og þörfin fyrir hjúkrunarfræðinga virðist stöðugt aukast. Möguleikar á framhaldsnámi eru einnig fjölbreytilegir.
Sérstaða hjúkrunarfræðibrautar
Lögð er áhersla á að mennta hjúkrunarfræðinga til starfa í þjóðfélagi framtíðarinnar. Verklegt nám hefst strax á fyrsta ári. Nemendur stunda verklegt nám á heilbrigðisstofnunum á Akureyri, í Reykjavík, og víðar um landið. Heilbrigðisdeild er í samvinnu við skóla á norðurlöndum og víða í Evrópu um nemendaskipti og því er möguleiki á því fyrir áhugasama nemendur að stunda verklegt nám að hluta til erlendis.
Nemandi verður að ljúka fyrri hluta námsins, þ.e. námsefni 1. og 2. árs, áður en nám er hafið á 3. ári. Hámarkstími til lokaprófs er 6 ár, 3 ár til að ljúka hvorum hluta. Nemandi sem ekki stenst lámarkskröfur í verknámi þarf að endurtaka verknámstímabilið. Einungis er hægt að endurtaka hvert verknámstímabil einu sinni. Tímabilið skal endurtekið á sama starfssviði en á öðrum verknámsstað.
Á námstíma skulu hjúkrunarfræðinemar afla sér þriggja mánaða starfsreynslu við umönnunarstörf sem samsvarar a.m.k. 80% starfi á heilbrigðisstofnunum utan skipulegs námstíma.
Fjarnám í hjúkrunarfræði
Það er markmið deildarinnar að hverjum árgangi í heimanámi í deildinni fylgi a.m.k. einn hópur fjarnema. Skilyrði fyrir því að fjarkennsla sé sett á fót er samningur við símenntunarmiðstöð eða hliðstæða aðila á viðkomandi stað, og að lágmarki 7 nemendur hefji námið að öllu jöfnu. Kennslan fer fram með notkun gagnvirks myndfundabúnaðar. Líklegt er að með nýrri tækni og nýjum kennsluháttum munu verða breytingar á þessu fyrirkomulagi í framtíðinni.
Námið skiptist í raunvísindi, hug- og félagsvísindagreinar og hjúkrunarfræðigreinar.
Klínískt nám hefst strax á fyrsta ári, fer fram víða um land og tekur samtals 24 vikur.
Formaður hjúkrunarfræðideildar:
Hafdís Skúladóttir, MSc í hjúkrunarfræði
hafdis@unak.is - s: 460 8456, fax: 460 8999
