Helstu
áherslur skólaþróunarsviðs
Skólaþróunarsvið HA hefur þá sýn að skólastarf kalli á stöðuga umbótaviðleitni til að búa nemendum sem best skilyrði til náms og þroska. Skólaþróun er markviss viðleitni til að breyta vinnubrögðum og innri aðstæðum í skóla til hagsbóta fyrir nemendur um leið og innviðir skólans sem stofnunar eru styrktir og hann þannig gerður hæfari til að takast á við breytingar til frambúðar. Hver skóli er ábyrgur fyrir innra starfi sínu og þarf að þróast á eigin forsendum. Skólaþróun felur í sér nám allra sem hlut eiga að máli og það nám fer fram á vettvangi skólans. Hún beinist að því að bæta það starf sem fyrir er í skólum eða þróa enn frekar það starf sem þegar hefur verið skilgreint gott og farsælt. Umbótastarf er líklegast til að skila árangri þar sem samvirkni fagfólks einkennist af kenningum um lærdómssamfélög.
Starfsemi Skólaþróunarsviðs HA beinist að því að styrkja kennara, stjórnendur og annað fagfólk í formi ráðgjafar, verkefnisstjórnar, fræðslu eða annars sem talið er henta í hverju tilfelli við umbóta- og þróunarstarf í skólum. Þegar um ráðgjafastarf er að ræða byggist árangur á samstarfi og gagnkvæmu trausti sérfræðinga sviðsins og þeirra sem þjónustuna þiggja. Leitað er sameiginlegra skilgreininga á því viðfangsefni sem til umfjöllunar er í hvert sinn, upplýsinga aflað og gerðar tillögur um lausn.
Skólaþróunarsvið hefur þá stefnu að fella skólaþróunarverkefni og umbótastarf að þörfum þeirra aðila sem aðstoðar óska. Því er leitast við að þjónusta sviðsins sé skólamiðuð þar sem gengið er út frá því sjónarmiði að starfsmenn hverrar stofnunar séu þeir aðilar sem best eru fallnir til að koma á umbótum.
Skólaþróunarsvið HA starfar í nánum tengslum við kennaradeild hug- og félagsvísindasviðs HA og er farvegur nýrrar þekkingar fræðasviðsins til skóla. Á hverjum vetri stendur Skólaþróunarsvið fyrir fjölda fræðslufunda sem eru öllum opnir og miða að því að miðla nýrri þekkingu á fræðasviðinu til kennara og fagfólks skóla. Þá býður sviðið kennurum upp á námskeið af ýmsu tagi sem geta falið í sér aðstoð við að nýta á vettvangi skólastarfsins þá þekkingu sem kennarar öðlast á námskeiðinu.
Rannsóknir Skólaþróunarsviðs á sviði skólamála geta alfarið verið unnar að frumkvæði og á ábyrgð sviðsins en þær má einnig vinna í samvinnu við starfsfólk skóla og annarra stofnana. Rannsóknir geta verið eigindlegar, megindlegar eða unnar í anda starfendarannsókna. Í starfendarannsóknum samþættast sjónarmið rannsóknarfræða og skólaumbóta í sama viðfangsefni. Skólaþróunarsvið vill gjarnan stuðla að slíkum rannsóknum í samvinnu við skóla og aðra fagmenn sem tengjast skólastarfi.
Frá árinu 2002 hefur ráðstefnuhald verið fastur liður í starfsemi Skólaþróunarsviðs. Viðfangsefnin snúa að mikilvægum þáttum í menntun og uppeldi og er leitast við að fá færustu sérfræðinga til samstarfs á hverjum tíma til að miðla þekkingu sinni.
