M.Sc. í auðlindafræði
Að loknu B.Sc. námi er boðið upp á alþjóðlegt, rannsóknatengt meistaranám (M.Sc.) í auðlindafræðum. Meistaranámið nær til fimm fræðasviða; umhverfisfræði, orkufræði, líftækni, sjávarútvegsfræði og fiskeldisfræði. Inntökuskilyrði er B.Sc. gráða frá viðurkenndri háskólastofnun með fyrstu einkunn í fagi sem tengist áætluðu meistaranámi.
Námið er einstaklingsmiðað og er megináhersla lögð á meistaraverkefnið og að nemendur tileinki sér vísindaleg vinnubrögð. Meistaraprófsverkefni munu í flestum tilfellum tengjast einhverjum rannsóknarverkefna sem starfsmenn vinna að hverju sinni. Námið tekur tvö ár og er 120 einingar, þar af er sjálft meistaraverkefnið 60-90 einingar, og 30-60 einingar í námskeiðum. Námskeiðshluta meistaranámsins tekur nemandinn að hluta við HA, við aðra innlenda háskóla ef kostur er, en aðallega við erlenda rannsóknaháskóla samkvæmt ákvörðun meistaraprófsnefndar hverju sinni. Meistaraprófsnefnd útbýr námsáætlun fyrir hvern nemanda og ákveður vægi meistaraverkefnis, og fjölda og innihald nauðsynlegra námsskeiða þannig að hver meistaranemi búi yfir nauðsynlegri fagþekkingu, aðferðafræði og tækniþekkingu, til að vinna sitt meistaraverkefni.
