Líftækni

Brauðmolar

Forsíða » Viðskipta- og raunvísindasvið » Líftækni

Líftækni

Af hverju líftækni
Í líftækninámi til B.Sc. gráðu er lögð rík áhersla á að kynna nemendum líftæknilegar aðferðir við að nýta náttúruauðlindir með nýjum hætti og koma afurðum slíkrar þróunar á markað. Innan líftæknibrautar eru kennd sérhæfð námskeið á sviði auðlindalíftækni ásamt viðskipta- og stjórnunargreinum með það að markmiði að gera nemendur eftirsótta til starfa á ýmsum sviðum líftækninnar. Hér má nefna matvælaiðnað, auðlindanýtingu, lausnir á ýmsum umhverfisvandamálum, og verkefni á sviði heilbrigðismála.

Hvað er verið að læra
Þannig eru, auk grunnnámskeiða í almennum raunvísindum, lífvísindum og viðskipta- og markaðsgreinum, kennd sérhæfð námskeið á sviði auðlindalíftækni. Séráfangar brautarinnar eru: lífefnafræði, sjávarlíftækni, erfðafræði, lífeðlisfræði, matvælafræði, líftæknileg örverufræði, lífupplýsingatækni, ónæmisfræði, sameindaerfðafræði og gæðaframleiðsluferlar.

Áherslur
Megináherslur náms og rannsókna innan líftæknibrautar eru:

Á sviði umhverfis- og orkulíftækni, m.a. niðurbrot lífræns úrgangs og nýmyndun orkuríkra efna (vetni, metan, og etanóls).
Á líftæknilega þætti fiskeldis, með áherslu á heilbrigði og fóður.
Á sviði lífvirkra efna þar sem lögð er áhersla á framleiðslu efna sem bæta heilsu manna, t.d. efni með lyfjavirkni, fæðubótarefni, aukefni í matvælum og efni sem bæta ónæmiskerfið.
Á sviði sameindalíffræðilegra grunnrannsókna á íslenskri flóru og fánu, einkum hvað varðar þýðisgreiningu sambýlisörvera.

Samstarf
Auk fastra kennara Viðskipta- og raunvísindadeildar koma sérfræðingar ýmissa fyrirtækja að kennslunni, og ber þar sérstaklega að nefna sérfræðinga frá líftæknifyrirtækjunum Prokaria og Primex. Líftækninet í auðlindanýtingu er samstarfssamningur sem gerður var á milli Iðnaðarráðuneytisins, Menntamálaráðuneytisins, Sjávarútvegsráðuneytisins og Háskólans á Akureyri. Hlutverk verkefnisins er að koma á virku samstarfi á milli þeirra sem vinna við líftæki í þágu íslensks atvinnulífs. Verkefnisstjóri Líftækninetsins hefur starfsaðstöðu á Borgum.

Hægt er að fletta bæklingnum hér að ofan með því að smella á myndina, flett er með örvalyklunum eða með því að smella músinni á horn bæklingsins.

Með líftækni er átt við hvers konar notkun lifandi fruma eða örvera, þar með talið erfðabreyttra lífvera eða hluta þeirra, í iðnaði, til rannsókna eða í öðrum verkefnum sem tengjast lausn vandamála í matvæla-, fóður- og tengdum iðnaði, í umhverfinu eða á sviði heilbrigðismála. B.Sc. námið veitir sterkan þverfaglegan grunn sem nýtist vel til frekara náms og til starfa á ýmsum sviðum líftækninnar.
Undirstöðuraungreinar eru kenndar á fyrsta árinu og sérhæfðari líftæknifög og viðskiptagreinar síðar. Markmiðið er að gera nemendur eftirsótta til starfa í hinum fjölbreyttu verkefnum á sviði líftækni, og til sjálfstæðrar starfsemi við frekari virðisauka auðlinda landsins til sjávar og sveita, og auka heilbrigði einstaklinga. Leggur brautin mikið upp úr nánu samstarfi við starfandi fyrirtæki í greininni.

Valnámskeið deildar

Valnámskeið eru kennd eftir því sem að þátttaka fæst hverju sinni. Miðað er við að jafnaði að tíu nemendur séu skráðir í hvert námskeið. Fjöldi valnámskeiða í boði á hverri önn er takmarkaður. Nemendur geta tekið sem valnámskeið námskeið við Háskólann á Akureyri eða aðra háskóla á Íslandi. Slíkt val er þó alltaf háð samþykki deildarforseta hverju sinni.