Nám í auðlindafræðum er að stórum hluta til raunvísindatengt og því er aðstaða til rannsókna og verklegs náms afar mikilvægur þáttur í umhverfi jafnt nemenda sem kennara.
Rannsóknahúsið Borgir
Með tilkomu Borga, nýja rannsóknar- og nýsköpunarhúss Háskólans, sem tekið var í notkun í október 2004, stórbatnaði öll rannsóknaraðstaða og verkleg kennsla raungreina innan deildarinnar. Inn í rannsóknarhúsið, sem er 5,500 m2 að flatarmáli (seinni áfangi aðrir 2,000 m2), fluttu einnig margar samstarfsstofnanir auðlindadeildar, m.a. útibú Rannsóknarstofnunar fiskiðnaðarins (Rf) og Hafrannsóknarstofnunar (Hafró), en auk þess Akureyrarútibú Náttúrufræðistofnunar, Umhverfisstofnunar, jarðeðlisfræðisvið Veðurstofu Íslands, Stofnun Vilhjálms Stefánssonar, Rannsóknastofnun Háskólans á Akureyri, og fleiri stofnanir. Jafnframt er upplýsingatækninám HA til húsa í rannsóknarhúsinu. Samstarf þessara stofnana og annarra í rannsóknarhúsinu myndar nú sterkan þekkingargrunn (vísindagarð), og býður upp á góða aðstöðu til kennslu og rannsókna á öllum sviðum auðlindamála.
Rannsóknastofur
Í húsinu er að finna fullkomnar og vel tækjum búnar rannsóknastofur og sérútbúnar kennslustofur til verklegs náms á hinum ýmsu sviðum auðlindafræðanna, svo sem lífvísindum, efnafræði, eðlisfræði og jarðvísindum. Einnig er rannsóknaraðstaða við samstarfsstofnanir auðlindadeildar í Borgum, m.a. fiskeldisdeild Rannsóknastofnunar fiskiðnaðarins, Akureyrarútibú Hafrannsóknastofnunar, Akureyrarútibú Náttúrufræðistofnunar Íslands, og Rannsóknarútibú Veðurstofu Íslands við HA. HA er jafnframt í nánu rannsóknarsamstarfi við Matvælasetur HA og Líftækninet í auðlindanýtingu, bæði með aðstöðu í Borgum.
Rannsóknartæki
Auk almenns rannsóknastofutækjakosts hefur Háskólinn yfir að ráða ýmsum sérhæfðum rannsóknatækjum sem nýtast við rannsókna- og þróunarvinnu sérfræðinga á auðlindasviði, en nemendur koma mjög að slíkri vinnu á síðari stigum námsins. Meðal sérhæfðra rannsóknatækja má nefna tæki til sameinda- og kerfalíffræðilegra rannsókna, svo sem DNA raðgreini (sequencer), pólýmerasakeðjuhvarfs (PCR)-tæki og tæki til tvívíðs rafdráttar (2D-PAGE) prótína, tæki til sérhæfðra efnagreininga, svo sem gasskilju (gas chromatograph), háþrýstivökvaskilju (HPLC), og röntgenflúrljómunarrófgreini (XRF). Nemendur í auðlindafræðum og upplýsingatækni njóta fyrsta flokks aðstöðu til náms, verkefnavinnslu og rannsókna. Samstarf við fyrirtæki og stofnanir tryggir þeim jafnframt aðgang að sérfræðingum á öllum fræðasviðum brautanna.
Kafbátur í Eyjafirði!
Þann 8. september 2004 veitti Landssamband íslenskra útvegsmanna (LÍÚ) Háskólanum að gjöf fullkomna neðansjávarmyndavél með öllum tilheyrandi tækjabúnaði (þ.m.t. faratæki eða “kafbát” með gripörmum til sýnatöku, ljósbúnað, sónartæki, fjarstýringarbúnað, og ljósleiðarakapal). Er þetta stærsta gjöf sem Háskólanum hefur verið veitt, metin á um 30 m.kr. Fjarstýrða griparma má nota til sýnatöku, og smáverka neðansjávar. Þessir möguleikar hafa í för með sér byltingarkenndar umbætur á tæknilegri rannsóknargetur neðansjávar. Háskólinn hefur falið auðlindadeild umsjón búnaðarins og verður hann notaður til rannsókna á vegum deilarinnar. Búnaðurinn mun nýtast vel við m.a.: veiðarfærarannsóknir; rannsóknir á líf- og vistfræði nytjafiska, og annarra lífvera sjávar; rannsóknir á eiginleikum hafbotnsins, seti og setflutningum; og við rannsóknir á umhverfisáhrifum framkvæmda og mengun sjávar. Báturinn getur unnið á allt að 1000 metra dýpi, en með minniháttar breytingum er mögulegt að auka dýptarþolið upp að 2000 metrum.
Rannsóknabáturinn Einar í Nesi
Rannsóknabáturinn Einar í Nesi EA-49 er 10 tonna rannsóknabátur af gerðinni Gáski 1000 sem útibú Hafrannsóknarstofnunarinnar á Akureyri sér um reksturinn á. Báturinn var keyptur notaður árið 1994 og var þá þegar farið út í talsverðar breytingar á honum til að auka notagildi hans við rannsóknir og kennslu. Breytingarnar fólust í að byggt var við stýrishúsið til að auka vinnupláss innandyra og settur var krani á bátinn. Smá saman hafa notkunarmöguleikar bátsins aukist vegna tilkomu nýrra rannsóknatækja. Einar í Nesi hefur verið notaður við ýmsar rannsóknir á vegum Hafrannsóknastofnunarinnar ásamt því sem hann hefur verið notaður til verklegrar kennslu við Háskólann á Akureyri. Einar er búinn glussakrana með spili, tveimur handfærarúllum, kafarastiga, botngreip, sjótökum, sondu, svifháf og grind ofan á stýrishúsið til hvalarannsókna. Einnig hefur nýju neðansjávarmyndavél HA verið stýrt úr bátnum.
