Lokadrög stefnumótunar HA til ársins 2023 hefur verið kynnt innan skólans en nú var komið að samfélaginu að segja sitt álit og koma með gagnlegar ábendingar.
Á föstudag s.l. komu saman fulltrúar úr samfélaginu til að ræða lokadrög stefnumótunar HA til ársins 2023. Þátttakendum var skipt í hópa og fengu þeir tækifæri til að fjalla gagnrýnið um stefnuna, benda á góð atriði og bæta við áherslum.
Spurningarnar sem gengið var útfrá voru þessar:
- Hvernig kallast sýn HA á við stefnu og framtíðarsýn atvinnulífsins?
- Eru meginaðgerðir sem HA verður að koma í framkvæmd sem ekki eru í þessu skjali?
- Er líklegt að HA nái að veita nemendum aðgang að námi og rannsóknum sem gerir þeim kleift að takast á við breytta framtíð?
Fram kom að mikil ánægja var með sveigjanlega námið útfrá sjónarmiði byggðarþróunar enda sýna rannsóknir að líklegara er að útskrifaðir nemendur sem numið hafa í heimabyggð búi þar áfram fimm árum eftir brautskráningu. Einnig var mikil ánægja með þróun kennsluhátta, sér í lagi fjarveranna sem tóku virkan þátt í fundinum. Þó var bent á mikilvægi þess að halda þróuninni áfram og stuðla áfram að myndun samfélaga á netinu og færni í samskiptum þar.
Tekið var fram að námi í tæknifræði myndi mæta kröfum atvinnulífsins, sér í lagi út frá kröfu um tæknilausnir til að uppfylla grunnþarfir, eftirlitshlutverk og öryggishlutverk.
Það heyrðust raddir um áhuga á skapandi námi: Nýsköpun ætti ekki alltaf við um tækni heldur líka í kennslu, menningu og listum, í þjónustu og velferðarmálum.
Einnig var sett spurningarmerki við nemendafjöldann. HA hefur sett sér markmið að við skólann stundi að hámarki 2.500 nemendur nám en í dag er nemendafjöldi um 2.100. Til að jafna kynjahlutföllin þyrfti því að fara í viðamiklar aðgerðir.
Eyjólfur Guðmundsson, rektor Háskólans á Akureyri, fagnar áhuga samfélagsins á stefnumótuninni:
„Háskólinn á Akureyri þjónustar samfélagið í heild sinni og því er mikilvægt að raddir sem flestra heyrist við gerð stefnumótunar. Á sama tíma og við deildum sömu áhyggjum um kynjahlutfall í skólanum og skorti á fjarmagni inn í skólann til að taka upp nýjar námsleiðir þá erum við vongóð um að með sameinuðum kröftum samfélagsins alls getum við vakið athygli á mikilvægi háskólanáms utan höfuðborgarsvæðisins. Sérstaklega í ljósi kröfu um menntun á Íslandi öllu í aðdraganda fjórðu iðnbyltingarinnar.“