Löggæsla og samfélagið

Ráðstefna um löggæslu með áherslu á afbrotavarnir
Löggæsla og samfélagið

Ráðstefnan Löggæsla og samfélag fer fram í fjórða sinn í Háskólanum á Akureyri miðvikudaginn 6. október frá kl. 9-17. Á dagskránni eru tæplega 50 erindi og hefur hún aldrei verið umfangsmeiri. Fyrirlesarar eru um 70 og koma víða að úr heiminum. Greinilegt er að ráðstefnan hefur skapað sér nafn í samfélaginu en hún er haldin af námsbraut í lögreglufræði við Háskólann á Akureyri.

Guðmundur Oddsson, dósent við Félagsvísindadeild Háskólans á Akureyri og einn skipuleggjanda ráðstefnunnar, segir ráðstefnuna vettvang fyrir fagfólk og fræðimenn til að reifa málefni sem tengjast löggæslu í víðri merkingu. „Ráðstefnan er mikilvægur liður í að byggja upp lögreglufræðisamfélag hérlendis og samstarf stofnanna innan réttarvörslukerfisins og þeirra sem skara það til að treysta lögreglufræðinám á háskólastigi og sem liður í stöðugri fagvæðingu lögreglunnar,“ segir Guðmundur.

Þema ráðstefnunnar í ár er afbrotavarnir, sem vísar til aðferða og aðgerða til að draga úr afbrotum og áhrifum þeirra á samfélagið. „Hérlendis vantar heildstæða stefnumörkun stjórnvalda í þessum málaflokki en rannsóknir sýna að ábyrgar og skipulagðar afbrotavarnir draga úr afbrotum, auka öryggiskennd íbúa og draga úr samfélagslegum kostnaði sem hlýst af afbrotum. Lögreglan leikur lykilhlutverk við afbrotavarnir sem vert er að rýna,“ segir í kynningartexta um ráðstefnuna.

Lykilfyrirlesarar eru tveir:

  • Jason Roach, prófessor í sálfræði og lögreglufræði og forstöðumaður lögreglufræðiseturs við Háskólann í Huddersfield
  • Jerry Ratcliffe, fyrrverandi lögreglumaður í Bretlandi, prófessor og fer fyrir þekkta hlaðvarpinu „Reducing Crime“ um afbrotavarnir.

Hér má nálgast dagskrá ráðstefnunnar
Ráðstefnugjald er 5.000 kr. og eru ráðstefnugögn og kaffiveitingar innifaldar (greiðist á staðnum).
Skráning er í fullum gangi en einnig er hægt að skrá sig á staðnum.
Nánari upplýsingar veitir Guðmundur Oddsson: goddsson@unak.is - 4608677