Siljan 2019

Sigurvegararnir tryggðu skólasöfnunum 100.000 króna virði af bókum.
Siljan 2019

Úrslit eru nú ráðin í Siljunni, myndbandasamkeppni Barnabókaseturs fyrir grunnskólanemendur. Þrenn verðlaun voru veitt í hvorum flokki, 5.-7. bekk og 8.-10. bekk. Aðalverðlaunin voru þó sem fyrr 100.000 króna bókaúttekt fyrir skólasöfn sigurvegaranna frá Félagi íslenskra bókaútgefenda. Í ár eru það Laugarnesskóli í Reykjavík og Brekkuskóli á Akureyri sem fylla skólasafnshillurnar með hjálp Siljusigurvegara.

Siljan var haldin í samvinnu við Borgarbókasafnið í Reykjavík og með styrk frá Mennta- og menningarmálaráðuneytinu. Nemendur sendu inn stutt myndbönd um barna- eða unglingabók að eigin vali, eina skilyrðið var að bókin hefði komið út á íslensku 2016-2018. Þriggja manna dómnefnd sá um að meta myndböndin.

Markmið Siljunnar er að auka áhuga nemenda á bóklestri og jafnframt að hvetja ungt fólk til að fylgjast með og kynna sér útgáfu barna- og ungmennabókmennta. Siljan virkjar unga lesendur til samvinnu og jafningjafræðslu á skapandi og skemmtilegan hátt. Nemendur lesa, túlka, semja, mynda, beita tæknibrellum og tónlist til að fanga anda bókarinnar sem þeir völdu – og smita um leið aðra krakka af löngun til að lesa.

Verðlaunahafar 2019

Yngri flokkur

  • 1. sæti (25 þúsund og 100.000 kr. bókaúttekt fyrir skólasafnið): Svala, Ástrós, Silja, Lilja, Daníel, Álfar, Alexander og Henor úr Laugarnesskóla
  • 2. sæti (15.000): Arndís Sara, Arndís Inga og Dóra Kristín úr Þingeyjarskóla
  • 3. sæti (10.000): Agla, Aníta Erla og Ásta Lilja úr Laugarnesskóla

Svala, Ástrós, Silja, Lilja, Daníel, Álfar, Alexander og Henor úr Laugarnesskóla

Eldri flokkur

  • 1. sæti (25 þúsund og 100.000 kr. bókaúttekt fyrir skólasafnið): Birgir, Ýmir, Hilma, Sigurður og Bjarni úr Brekkuskóla
  • 2. sæti (15.000): Bragi Halldór, Bjartur Tandri, Jónas Þórir, Maron Fannar og Árni Þorberg úr Grunnskóla Reyðarfjarðar
  • 3. sæti (10.000): Óskar Óðinn, Steinar Bragi og Jóhannes úr Oddeyrarskóla

Umsögn dómnefndar og slóð á myndböndin

Yngri flokkur, 5.-7. bekkur

1. sæti – Laugarnesskóli

Svala, Ástrós, Silja, Lilja, Daníel, Álfar, Alexander og Henor 
Myndband: Handbók fyrir ofurhetjur

Umsögn: Mjög vel gerð stuttmynd út frá sögunni. Góð samtöl og flottir og ólíkir tökustaðir. Skýr framvinda og myndbandið gerir mann spenntan fyrir því að lesa bókina. Skýr frásögn sem kemur sögunni vel til skila, flott myndataka og tæknibrellur.

2. sæti – Þingeyjarskóli

Arndís Sara, Arndís Inga og Dóra Kristín 
Myndband: Ferðin til mars

Umsögn: Vel unnið með viðfangsefnið. Margt sagt án orða með góðri myndrænni frásögn og tónlistin vel valin við. Skemmtileg og vel heppnuð samþætting leikinna atriða, texta og tónlistar sem gerir sögunni góð skil.

3. Sæti – Laugarnesskóli

Agla, Aníta Erla og Ásta Lilja
Myndband: Frábærlega framúrskarandi konur

Umsögn: Mikil sköpunargáfa og frábært ímyndunarafl hér á ferð. Flottar, ólíkar og ótrúlega vel leystar senur byggðar á ólíkum og framúrskarandi konum úr mannkynssögunni. Mjög skemmtileg gervi og leikur.

 

Eldri flokkur, 8.-10. bekkur

1. Sæti – Brekkuskóli

Birgir, Ýmir, Hilma, Sigurður og Bjarni
Myndband: Rotturnar

Umsögn: Mjög flott og hádramatísk kvikmyndastikla. Tónlist vel notuð til að skapa hughrif og flott að klippa senurnar við tónlistina. Flott slow motion slagsmálaatriði og spennandi framvinda. Flott og fagmannleg myndataka. Minnir helst á stiklu úr bíómynd, maður fær nasasjón af söguþræðinum án orða og myndbandið byggir upp mikla spennu fyrir bókinni.

2. Sæti – Grunnskóli Reyðarfjarðar 

Bragi Halldór, Bjartur Tandri, Jónas Þórir, Maron Fannar og Árni Þorberg
Myndband: Harry Potter og bölvun barnsins 

Umsögn: Fyndið og skemmtilegt myndband og greinilega mikill metnaður í búningum og tæknibrellum. Bane er flottasti búningur sem ég hef séð! Flott andrúmsloft og tökustaðir vel nýttir. Velheppnaðir búningar, tæknibrellur og tökustaðir ná að skapa alvöru Harry Potter stemningu.

3. Sæti – Oddeyrarskóli

Óskar Óðinn, Steinar Bragi og Jóhannes
Myndband: Elmar fer í göngutúr

Umsögn: Mjög sniðugt, frumlega leyst og vel teiknað. Skemmtileg notkun á teikningum í anda bókarinnar.