Staða umsókna við Háskólann á Akureyri

Umsóknir um nám við Háskólann á Akureyri fyrir skólaárið 2018/2019 slógu öll fyrri met og var endanleg tala umsókna 2083.
Staða umsókna við Háskólann á Akureyri

Umsóknir um nám við Háskólann á Akureyri fyrir skólaárið 2018/2019 slógu öll fyrri met og var endanleg tala umsókna 2083. Þann 3. júlí síðastliðinn var búið að samþykkja 1531 umsókn en 552 umsækjendum hefur verið synjað eða þeir ekki sent inn fullnægjandi gögn með umsóknum sínum.  Það eru því einungis 74% umsækjenda sem fá boð um skólapláss. Í þessu felst mikil stefnubreyting frá fyrri árum og ljóst að stjórnvöld þurfa að gefa skýr skilaboð um það hvernig takast eigi á við umframeftirspurn eftir námi við Háskólann á Akureyri. 

Fyrri greiðslufrestur fyrir nemendur sem hafa fengið boð um skólavist var 10. júlí sl., en fyrir þá sem ekki greiddu fyrir þann tíma er mögulegt að greiða, með álagi, seinni greiðslufrest sem er 10. ágúst. Endanleg tala um fjölda nemenda sem hefja nám við HA í haust verður því ekki ljós fyrr en um miðjan ágúst.

Af 552 umsóknum sem ekki hafa verið samþykktar var 286 skilað inn án fullnægjandi gagna en öðrum hefur verið hafnað þar sem viðkomandi hefur ekki uppfyllt kröfur um einingafjölda frá framhaldsskólum, úr verknámsskólum eða öðru námi sem stundað er á framhaldsskólastigi.

Að gefnu tilefni vill Háskólinn á Akureyri koma því á framfæri að aðfararnám að háskólanámi sem rekið er af háskólum veitir ekki sjálfkrafa inngöngu í nám við Háskólann á Akureyri nema að uppfylltum skilyrðum um heildarfjölda eininga á framhaldsskólastigi.

Upplýsingar um inntökuskilyrði og aðgangsviðmið má finna hér.

Háskólinn á Akureyri er lokaður vegna sumarleyfa frá 9. júlí til og með 6. ágúst. Skrifstofur HA og einstakra deilda verða opnaðar að nýju 7. ágúst.