Vísindaskólinn opnar dyrnar í sjötta sinn

Búið er að opna fyrir skráningu í Vísindaskóla unga fólksins!
Vísindaskólinn opnar dyrnar í sjötta sinn

Vísindaskóli unga fólksins verður starfræktur í sjötta sinn í lok júní og er búið að opna fyrir skráningu. Börn á aldrinum 11-13 ára geta nýtt sér þetta tilboð. Fimm þemu verða í boði og eru þau öll ný. Fjallað verður um fjölmenningarsamfélagið, orkugjafa og umhverfismál, rekstur bæjarfélags, landbúnað og starfsemi líkamans. Öll þemun eru uppbyggð þannig að þau henti þessum aldurshópi og eru bæði fræðandi og skemmtileg.

„Eftir allt sem á undan er gengið vegna COVID-19 teljum við enn meiri þörf en áður að geta boðið börnum upp á þetta áhugaverða skólastarf. Allar samskiptareglur vegna COVID verða virtar og við vonumst til þess að húsnæði Háskólans á Akureyri sem hýsir Vísindaskólann muni iða af lífi í vikunni 22-26 júní“, segir Sigrún Stefánsdóttir, sem hefur verið skólastjóri Vísindaskólans frá upphafi.

Sigrún segir að hlutföll kynjanna í Vísindaskólanum hafi verið mjög jöfn undanfarin ár, þ.e.a.s. jafnmargir drengir og stúlkur. Skólinn á sér marga stuðningsaðila í bæjarfélaginu en þessi stuðningur er forsenda þess að hægt sé að reka skólann.

Nánar um þemun:


Góður bær, betri bær

Hvað er að gerast í Kardimommubænum? Hvernig líður börnum á Akureyri? Hvað
getur unga fólkið gert til þess að gera Akureyri að enn betri bæ? Hvað er Barnasáttmáli
Sameinuðu þjóðanna?

Sameiginleg framtíð okkar allra

Fólk frá yfir 50 löndum býr á Akureyri. Hvernig er að flytja til bæjarins? Hvað getum
við lært af hvert öðru og hvers vegna erum við eins og við erum? Dönsum og hlæjum
saman.

Er hjartað bara líffæri?

Hvernig lítum við út að innan? Hvað gerir hjartað, hvernig vinna lungun og lifrin? Hvernig
getum við farið vel með okkur sjálf og hvernig er brugðist við þegar eitthvað alvarlegt
gerist? Fyrsta hjálp og skrýtnu verkfærin skoðuð sem heilbrigðisstarfsmenn nota.

Afi og amma mín út á bakka búa

Hvernig koma kálfar og lömbin í heiminn? Góð spurning. Málið er kannað og farið
í heimsókn á sveitabæi til þess að fá svör. Hvaða matur er framleiddur í sveitinni og
hvaða áhrif hefur landbúnaður á samfélagið og umhverfið?

Hvernig ferðumst við án olíu?

Hvernig notum við olíu í dag og af hverju þurfum við að hætta því? Hvernig búum við til
aðra orku og hvernig vinna rafbílar? Farið í vettvangsferð og fræðumst um rafmagns-,
metan- og lífdísiltæki.

Vertu með: Skráning