Háskólinn á Akureyri

„Það kom aldrei neitt annað til greina en að fara í HA. Námið er spennandi og opnar ýmsa möguleika til framtíðar. Mér líkaði umhverfið í háskólanum mjög vel og það eru passlega margir í skólanum. Ég átti mjög auðvelt með að kynnast samnemendum mínum og eignaðist góða vini. Þá finnst mér frábært að búa á Akureyri, þetta er mikill menningarbær. “

„HA veitir nemendum góða aðstöðu til náms og mér líður vel í bæði áhugaverðu og krefjandi námi sem kennarafræðin er. Félagsskapurinn er góður og spennandi starfsvettvangur sem tekur við að námi loknu.“

„Það er meira en nóg um að vera í félagslífinu í HA, allir ættu að geta fundið eitthvað við sitt hæfi. Hvort sem það er á vegum FSHA eða einstakra félaga í skólanum þá virðist alltaf eitthvað áhugavert vera að gerast. Það sem stendur upp úr eru án efa menningarferðin sem er farin ár hvert til höfuðborgarinnar ásamt sprellmótinu sem haldið er á haustin.“

„Háskólinn á Akureyri er persónulegur skóli staðsettur í einstöku umhverfi. Hér er t.d. frábær aðstaða til iðkunar vetraríþrótta. Reyndar er íþróttalífið mjög mikið í bænum bara almennt og hægt að velja úr hinum ýmsu tómstundum. Hér er gott að vera með börn og mikill kostur hvað stutt er í alla þjónustu. Þá gæti ég ekki hafa valið mér skemmtilegra nám en ég legg stund á sjávarútvegsfræði.“

„Námið í félagsvísindum er afar áhugavert og skemmtilegt að geta valið milli mismunandi kjörsviða. Ég stýri náminu mínu mikið sjálf og hef mikið val. Þá langar mig að nefna þjónustuna á bókasafni HA en hún er hreint út sagt frábær! Framboðið er til fyrirmyndar og starfsfólkið hjálpsamt.“

„Ástæðan fyrir því að ég kaus að leggja stund á nám í hjúkrunarfræði er sú að mér finnst hjúkrun vera heillandi starf sem opnar fjölmargar dyr. Að námi loknu biðu mín spennandi tækifæri. Háskólinn á Akureyri er góður í alla staði, fámennir bekkir eru sérlegur kostur, þeir gera það að verkum að námið verður persónulegt og góð tengsl myndast milli nemenda og kennara.“

„Þverfagleiki náms við HA gerir manni kleift að sjá hlutina í nýju ljósi og ég sé ekki eftir því að hafa valið HA. Sjávarútvegsfræðin er áhugavert og hagnýtt nám sem opnar ýmsa atvinnumöguleika, ekki síst á alþjóðlegum vettvangi, ég starfa nú við mitt fag í Þýskalandi á vegum Samherja. Það er frábært að geta prófað að búa erlendis um tíma. “

„Námsframboð við Háskólann á Akureyri varð til þess að ég flutti norður. Ég hafði alla tíð búið á Akranesi og því spennandi að kanna nýjar slóðir. Líftækni er krefjandi og áhugavert nám sem kemur inná hin ýmsu svið og veitir yfirgripsmikla þekkingu sem kemur til með nýtast í frekara námi. Framúrskarandi aðstaða og afar hæfir kennarar sem leggja metnað sinn í að veita nemendum þá aðstoð sem þeir þurfa, gera Háskólann á Akureyri að þeirri menntastofnun sem hann er í dag.“