Viðskipta- og raunvísindasvið byggir á grunni þriggja fræðasviða, þ.e.
viðskiptafræða, auðlindafræða og tölvunarfræða. Sviðið skiptist í tvær deildir, viðskiptadeild og auðlindadeild.
Viðskiptadeild
B.Sc. í viðskiptafræði
Boðið er upp á hagnýtt nám þar sem einstaklingar eru menntaðir til stjórnunarstarfa,
m.a. með þjálfun í faglegum vinnubrögðum við stefnumótun, ákvarðanatöku og stjórnun. Samhliða eru nemendur
þjálfaðir í fræðilegum vinnubrögðum sem nýtast munu í framhaldsnámi. Í grunninn fá allir nemendur sambærilega
menntun á sviði viðskiptafræða, en geta svo valið að leggja áherslu á fjármál, stjórnun, ferðaþjónustu eða
markaðsfræði. Bæði er boðið upp á staðarnám og fjarnám.
Umsækjendur þurfa að hafa stúdentspróf eða sambærilegan undirbúning.
M.Sc. í viðskiptafræði
Boðið er uppá tvær námsleiðir í viðskiptafræði til M.Sc. gráðu: Alþjóðafjármál og bankastarfsemi og
Stjórnun í alþjóðlegu fyrirtækjaumhverfi.
Meistaranám í viðskiptafræði er 90 ECTS eininga nám. Mögulegt er að ljúka 120 ECTS eininga MSc námi með því að skrifa
viðameira lokaverkefni. Námskeið eru alls 60 ECTS einingar, fjögur námskeið eru ætluð öllum nemendum og tvö námskeið eru sérkennd
á hvoru sviði, auk þess er lokaverkefni tengt sérsviði nemandans. Í náminu öðlast nemendur víðtæka þekkingu á
alþjóðaviðskiptum og rekstri fjármálafyrirtækja, sem og fyrirtækja í alþjóðlegu rekstrarumhverfi. Nemendur munu öðlast
færni í greiningu viðfangsefna og stjórnunarfærni sem nýtast mun í krefjandi störfum á völdum sviðum íslensks
atvinnulífs. Frekari upplýsingar er að finna í námskrá fyrir meistaranám.
Auðlindadeild
Auðlindafræði
B.Sc. í sjávarútvegsfræði, líftækni og umhverfis- og orkufræði
Við Háskólann á Akureyri er lögð rík áhersla á nám og rannsóknir í tengslum við sjálfbæra og
arðbæra nýtingu náttúruauðlinda. Með þetta að leiðarljósi er boðið upp á hagnýtt viðskipta- og
raunvísindatengt nám á þremur fræðasviðum; líftækni, sjávarútvegsfræði og umhverfis- og orkufræði.
Fyrsta árið er kenndur sameiginlegur raunvísindagrunnur, en sérhæfing á sér að mestu stað á öðru og þriðja ári
námsins. Umsækjendur þurfa að hafa stúdentspróf eða sambærilegan undirbúning. Góður undirbúningur í
stærðfræði og raunvísindum er æskilegur. Mögulegt er að ljúka 180 ECTS eininga B.Sc. námi í líftækni,
sjávarútvegs- og fiskeldisfræði og umhverfis- og orkufræði í staðarnámi og fjarnámi.
M.Sc. í auðlindafræði
Að loknu B.Sc. námi er boðið upp á alþjóðlegt, rannsóknatengt meistaranám (M.Sc.) í auðlindafræðum.
Meistaranámið nær til fimm fræðasviða; umhverfisfræði, orkufræði, líftækni, sjávarútvegsfræði og
fiskeldisfræði. Inntökuskilyrði er B.Sc. gráða frá viðurkenndri háskólastofnun með fyrstu einkunn í fagi sem tengist
áætluðu meistaranámi.
Meistaraprófsverkefni tengjast rannsóknarverkefnum sérfræðinga deildarinnar. Miðað er við að nemandinn taki námskeiðshlutann, 30-60 ECTS
einingar, aðallega við erlenda rannsóknaháskóla samkvæmt ákvörðun meistaraprófsnefndar hverju sinni en að hluta við auðlindadeild
eða aðra innlenda háskóla ef kostur er.
Tölvunarfræði
B.Sc. í tölvunarfræði
Nám í tölvunarfræði verður ekki í boði fyrir nýnema haustið 2009. Ný námsbraut í hagnýtri
tölvunarfræði er í undirbúningi og stefnt er að því að taka við nemendum á þá námsbraut haustið 2010.
Forseti viðskipta- og raunvísindasviðs:
Dr. Hans Kristján Guðmundsson, sími 460-8610, netfang: hkg@unak.is
Skrifstofustjóri:
Ása Guðmundardóttir, sími 460-8037, netfang: asa@unak.is
Fulltrúi:
Sæunn Mjöll Stefánsdóttir, sími 460-8038, netfang: sstef@unak.is
Auðlindadeild - formaður:
Dr. Hjörleifur Einarsson, sími 460-8502, netfang: hei@unak.is
Viðskiptadeild - formaður:
Helgi M. Bergs, sími 460-8612, netfang: helgi@unak.is
