Mat á fyrra námi

Reglur matsnefndar Félagsvísindadeildar

Matsnefnd Félagsvísindadeildar starfar í umboði deildarfundar. Hún metur fyrra nám nemenda og gefur út vilyrði fyrir mati á fyrirhuguðu skiptinámi.

I. Hlutverk og skipan

1. Hlutverk matsnefndar er að meta fyrra nám nemenda óski þeir þess og gefur út vilyrði fyrir mati á fyrirhuguðu skiptinámi.
2. Í nefndinni sitja brautarstjórar námsbrauta deildarinnar auk fulltrúa sem kosinn er sérstaklega af deildarfundi til tveggja ára í senn. Skal sá fulltrúi vera formaður matsnefndar og stýra starfi nefndarinnar í samráði við skrifstofu sviðsins. Félag nemenda við deildina hefur rétt til að kjósa einn aðalfulltrúa í nefndina og einn varafulltrúa. Fulltrúi nemenda tekur ekki þátt í störfum nefndarinnar að öðru leyti en því að hann hefur heimild til að sitja formlega fundi nefndarinnar og hefur þar málfrelsi og tillögurétt. Fulltrúi nemenda hefur ekki atkvæðisrétt á fundum og er bundinn trúnaði um allt það sem þar kemur fram.
3. Skrifstofa Hug- og félagsvísindasviðs ber ábyrgð á skjalavörslu þeirra erinda sem nefndinni berast.

II. Fyrra háskólanám nemenda

1. Frestur nemenda til að skila inn umsóknum um mat á fyrra námi til afgreiðslu á haustmisseri er 10. ágúst og 10. september, fyrir afgreiðslu á vormisseri 10. janúar. Umsóknir eru afgreiddar svo fljótt sem auðið er, ekki síðar en þrem vikum eftir að umsóknarfrestur rennur út.
2. Nemandi sem lokið hefur námskeiðum við aðrar háskólastofnanir getur sótt um að fá þau metin inn í samsvarandi nám við Félagsvísindadeild. Ekki skiptir máli hvort námskeiðin hafi nýst til að ljúka annarri gráðu eða ekki. Slíku mati eru að jafnaði þau takmörk sett, að nemandinn þarf að lágmarki að taka tvo þriðju hluta af viðkomandi námsgráðu við Háskólann á Akureyri (HA).
3. Matsnefnd metur hvort fyrra háskólanám nemanda getur komið í stað námskeiða sem kennd eru í Félagsvísindadeild Háskólans á Akureyri.
4. Til þess að unnt sé að meta fyrra háskólanám þarf nemandi að fylla út rafræna umsókn um mat á fyrra námi. Í umsókninni verður að tilgreina hvaða námskeið við Félagsvísindadeild er sótt um að fá metin og hvaða námskeið frá öðrum háskólum eða deildum innan HA er lagt því til grundvallar. Í viðhengi skal skila staðfestu afriti af vitnisburði frá þeim háskóla eða háskólum þar sem námið sem óskað er eftir að fá metið fór fram. Þá skal einnig fylgja námskeiðslýsing þeirra námskeiða sem óskað er eftir að fá metin frá því ári sem námskeiðið var tekið. Jafnframt skal leggja fram kennsluáætlun viðkomandi námskeiðs, sé þess óskað.
5. Matsnefnd skal, eftir því sem kostur er og þörf á, senda umsóknir til umsagnar hjá umsjónarkennara þeirra námskeiða sem beðið er um að fyrra nám sé metið á móti. Þetta skal gert áður en mat fer fram nema fyrir liggi mat á sams konar umsókn.
6. Fyrra nám er ekki metið á móti námi í Félagsvísindadeild Háskólans á Akureyri séu meira en tíu ár liðin síðan námskeiði var lokið.
7. Fylgt skal þeirri meginreglu að annað hvort sé fyrra nám metið á móti heilu námskeiði eða ekki metið. Til að námskeið sé metið að fullu skal það að jafnaði samsvara a.m.k. 75% af innihaldi þess námskeiðs sem það á að jafngilda, auk þess sem heildareiningafjöldi þess námskeiðs verður að vera a.m.k. jafn mikill. Séu námskeiðshlutar teknir til mats verða þeir að vera skýrt afmarkaðir svo hægt sé að meta þá eftir sömu reglu.
8. Námskeið úr fyrra háskólanámi fást aðeins metin hafi umsækjandi hlotið að lágmarki einkunnina 6.
9. Umsækjandi eða umsjónarkennari viðkomandi námskeiðs getur áfrýjað ákvörðun matsnefndar til stjórnar Hug- og félagsvísindasviðs.

III. Fyrirhugað skiptinám nemenda

1. Nemandi sem hyggur á skiptinám við annan háskóla getur sótt um vilyrði matsnefndar fyrir því að tiltekin námskeið verði metin til eininga við HA að þeim loknum. Frestur nemenda til að skila inn slíkum umsóknum fyrir haustmisseri er 10. ágúst, en 1. desember fyrir umsóknir sem á að afgreiða fyrir vormisseri. Nemendur í skiptinámi erlendis geta sótt um breytingar á námssamningi (e. learning agreement) allt að þremur vikum eftir upphaf viðkomandi misseris. Afgreiðsla umsókna getur tekið allt að 2 vikur.
2. Til að unnt sé að taka afstöðu til umsóknar um vilyrði þarf að nemandi að sækja um það formlega á viðeigandi eyðublaði:
   1. a) Ef sótt er um gestanám við Háskóla Íslands, Háskólann á Hólum eða Landbúnaðarháskóla Íslands skal fylla út rafræna umsókn um gestanám við annan háskóla. Sjá leiðbeiningar og upplýsingar á unak.is Gestanám við opinbera háskóla | Háskólinn á Akureyri (unak.is)
   2. b) Ef sótt er um skiptinám við háskóla erlendis skal nota eyðublað fyrir námssamning vegna skiptináms erlendis (learning agreement), sjá leiðbeiningar og upplýsingar hér. Skiptinám | Háskólinn á Akureyri (unak.is)
3. Vilyrði matsnefndar felur í sér fyrirheit, sem gildir í 12 mánuði, um að nemandi fái viðkomandi námskeið formlega metið ef hann sækir um slíkt mat og sýnir þá fram á að hafa lokið námskeiðinu með viðhlítandi árangri.

Reglur þessar voru samþykktar á deildarfundi 25. október 2023 og taka gildi þegar í stað.

Reglur fagnáms fyrir sjúkraliða um mat á fyrra námi

1. Til að unnt sé að meta fyrra nám þarf að liggja fyrir skrifleg beiðni nemanda og rökstuðningur um slíkt mat ásamt staðfestu afriti af vitnisburði frá þeim skóla eða skólum þar sem námið, sem óskað er eftir að fá metið, fór fram. Í umsókninni skal tilgreint hvaða námskeið námsleiðar er óskað eftir að fá metið/n á móti fyrra námi. Enn fremur skal fylgja námskeiðslýsing og lesefnislisti viðkomandi námskeiða.
2. Til þess að unnt sé að meta fyrra nám þarf nemandi að hafa verið samþykktur í námið og greitt innritunargjöld.
3. Matsnefnd áskilur sér rétt til að kanna feril nemanda úr fyrra námi.
4. Niðurstöður matsnefnda liggja að jafnaði fyrir mánuði eftir að sótt er um mat. Eftir umfjöllun í deildaráði er umsækjanda send niðurstaða deildaráðs.
5. Matsnefnd getur, eftir því sem ástæða þykir til, sent beiðni um mat á fyrra námi sbr. lið 1, til umsagnar umsjónarkennara þeirra námskeiða sem beðið er um að fyrra nám sé metið á móti.
6. Einungis eru metin námskeið sem eru á háskólastigi. Fylgt skal þeirri meginreglu að annað hvort sé fyrra nám metið á móti heilu námskeiði eða ekki metið. Fyrra námskeið, sem er forsenda matsins, skal að jafnaði samsvara a.m.k. 2/3 hlutum af innihaldi þess námskeiðs sem það á að jafngilda, auk þess sem heildareiningafjöldi þess námskeiðs verður að vera a.m.k. jafn mikill. Séu námskeiðshlutar metnir verða þeir að vera skýrt afmarkaðir svo hægt sé að meta þá sem heild eftir sömu reglu. Námskeið er ekki metið nema nemandi hafi lokið því með einkunninni 6 að lágmarki.
7. Að jafnaði er fyrra nám ekki metið á móti námi á Heilbrigðisvísindasviði Háskólans á Akureyri séu meira en fimm ár liðin síðan því var lokið. Miðað er við innritunarár nemanda í fagnámi til diplómaprófs fyrir starfandi sjúkraliða. Nemandi getur ekki útskrifast frá heilbrigðisvísindasviði HA með próf úr námskeiði/námskeiðum sem er eldra en 10 ára. Matsnefnd er heimilt að gera undantekningu á þessu geti umsækjandi sýnt fram á að hann hafi viðhaldið þekkingu sinni á viðkomandi sviði t.d. í tengslum við starf eða nám.
8. Óheimilt er að samnýta einingar til tveggja eða fleiri diplómaprófa í fagnámi fyrir starfandi sjúkraliða. Ekki er hægt að tvímeta sama námskeið þannig að námskeið sem hafa verið áður metin inn í kjörsvið innan fagnáms til diplómaprófs fyrir starfandi sjúkraliða er ekki hægt að fá aftur metin inn í annað kjörsvið innan fagnáms til diplómaprófs fyrir starfandi sjúkraliða.
9. Hafi nemandi lokið námi á einu kjörsviði innan fagnáms til diplómaprófs fyrir starfandi sjúkraliða og vill taka annað kjörsvið innan sama fagnáms til diplómaprófs fyrir starfandi sjúkraliða við HA getur hann óskað eftir sérstöku mati hjá matsnefnd þar sem horft verður m.a. til þess hvort hann uppfylli þær forsendur og kröfur sem gerðar eru til inntöku í tiltekið kjörsvið.
10. Umsækjandi um mat á fyrra námi og/eða umsjónarkennari viðkomandi námskeiða á heilbrigðisvísindasviði getur farið fram á að málið verði tekið fyrir að nýju í deildaráði. Uni nemandi ekki niðurstöðu, er honum bent á kvartanaferli Háskólans á Akureyri.
11. Sæki nemandi um mat á námskeiði sem áður var tekið við heilbrigðisvísindasvið eða önnur svið Háskólans á Akureyri og er hluti af námskrá fagnáms sjúkraliða, fer erindið beint til deildaráðs að uppfylltum skilyrði 7. gr. Námskeið er ekki metið nema nemandi hafi lokið því með þeirri einkunn sem krafist er til að ljúka námskeiðinu. Ef nemandi fær námskeiðið (námskeiðin) metið, skal það fært inn á námskeiðsferil nemanda með einkunn. Matsnefndir þurfa að jafnaði ekki að fjalla um slík mál en deildaráð getur leitað álits formanns viðkomandi matsnefndar.
12. Nemanda í fagnámi til diplómaprófs fyrir starfandi sjúkraliða er skylt, á meðan á námi stendur, að afla sér að a.m.k. 300 klukkustunda starfsreynslu við aðhlynningu á heilbrigðisstofnun utan skipulegs námstíma . Æskilegt er að sú vinna sé á því kjörsviði sem nemandi er skráður á. Skila skal starfsvottorði fyrir brautskráningu sem staðfestir eftirfarandi:
    1. Starfið telur að lágmarki 300 klukkustundir.
    2. Helming starfsreynslunnar (150 klukkustundir) eiga nemendur að starfa eftir að hafa lokið fyrra námsárinu og hinn helminginn á seinna námsárinu.
    3. Starfið skal unnið á heilbrigðisstofnun á því kjörsviði sem nemandi er skráður.
13. Reglur þessar eru ætlaðar til að hafa til viðmiðunar. Allar viðmiðunartölur um einingar eru hámörk og matsnefnd ekki skylt að meta fyrra nám að hámarki.

Samþykkt á deildarfundi framhaldsnámsdeildar 14. september 2021

Fyrir hönd matsnefndar fagnáms til diplómaprófs fyrir starfandi sjúkraliða
Hafdís Skúladóttir, brautarstjóri og formaður matsnefndar

Reglur matsnefndar Hjúkrunarfræðideildar

1. Til að unnt sé að meta fyrra nám þarf að liggja fyrir skrifleg beiðni nemanda um slíkt mat ásamt staðfestu afriti af vitnisburði frá þeim skóla eða skólum þar sem námið, sem óskað er eftir að fá metið, fór fram. Í umsókninni skal tilgreint hvaða námskeið námsleiðar er óskað eftir að fá metið/n á móti fyrra námi. Enn fremur skal fylgja námskeiðslýsing og kennsluáætlun viðkomandi námskeiða.
2. Til þess að unnt sé að meta fyrra nám þarf nemandi að hafa komist í gegnum samkeppnispróf við Hjúkrunarfræðideild HA í samræmi við reglur um val á nemendum til náms í hjúkrunarfræði HA.
3. Matsnefnd áskilur sér rétt til að kanna feril nemanda úr fyrra námi.
4. Undanþága frá reglu 2, svo framarlega að heildarfjöldi nemenda í þeim árgangi sem nemandi sækir um í, fari ekki fram úr samþykktri „klásustölu“. Á það við um alla árganga: Hafi nemandi lokið a.m.k. fjórum misserum í hjúkrunarfræði við HÍ og uppfyllt skilyrði varðandi aldur námskeiða og lágmarkseinkunn sbr. lið 7 og 9. Sjá nánar Reglur um innritun nýrra stúdenta í hjúkrunarfræði við Háskólann á Akureyri, sem lokið hafa 4 eða 6 misserum í hjúkrunarfræði við aðra háskólastofnun.
5. Niðurstöður matsnefnda liggja að jafnaði fyrir mánuði eftir að sótt er um mat. Eftir umfjöllun í deildaráði er umsækjanda send niðurstaða deildaráðs.
6. Matsnefnd getur, eftir því sem ástæða þykir til, sent beiðni um mat á fyrra námi sbr. lið 1, til umsagnar umsjónarkennara þeirra námskeiða sem beðið er um að fyrra nám sé metið á móti.
7. Fylgt skal þeirri meginreglu að annað hvort sé fyrra nám metið á móti heilu námskeiði eða ekki metið. Fyrra námskeið, sem er forsenda matsins, skal að jafnaði samsvara a.m.k. 2/3 hlutum af innihaldi þess námskeiðs sem það á að jafngilda, auk þess sem heildareiningafjöldi þess námskeiðs verður að vera a.m.k. jafn mikill. Séu námskeiðshlutar metnir verða þeir að vera skýrt afmarkaðir svo hægt sé að meta þá sem heild eftir sömu reglu. Námskeið er ekki metið nema nemandi hafi lokið því með einkunninni 6 að lágmarki.
8. Að jafnaði er fyrra nám ekki metið á móti námi á Heilbrigðisvísindasviði Háskólans á Akureyri séu meira en fimm ár liðin síðan því var lokið. Nemandi getur ekki útskrifast frá heilbrigðisvísindasviði HA með próf úr námskeiði/námskeiðum sem er eldra en 10 ára.
9. Hjúkrunarfræðingar sem hafa hjúkrunarleyfi á Íslandi en hafa ekki BS gráðu geta sótt um að fá hjúkrunarnám sitt metið sem hluta af BS gráðu í hjúkrunarfræði.
10. Umsækjandi um mat á fyrra námi og/eða umsjónarkennari viðkomandi námskeiða á heilbrigðisvísindasviði getur farið fram á að málið verði tekið fyrir að nýju í deildaráði. Uni nemandi ekki niðurstöðu, er honum bent á kvartanaferli Háskólans á Akureyri.
11. Sæki nemandi um mat á námskeiði sem áður var tekið við heilbrigðisvísindasvið eða önnur svið Háskólans á Akureyri og er hluti af námskrá hjúkrunarfræðideildar, fer erindið beint til deildaráðs að uppfylltum skilyrði 8. gr. Námskeið er ekki metið nema nemandi hafi lokið því með þeirri einkunn sem krafist er til að ljúka námskeiðinu í hjúkrunarfræðideild. Ef nemandi fær námskeiðið (námskeiðin) metið, skal það fært inn á námskeiðsferil nemanda með einkunn. Matsnefndir þurfa að jafnaði ekki að fjalla um slík mál en deildaráð getur leitað álits formanns viðkomandi matsnefndar.
12. Eftirfarandi gildir um mat á VAM1010 Valnámskeið á meistarastigi fyrir 4. árs nemendur:
    1. Matsnefnd Hjúkrunarfræðideildar metur þessi námskeið eins og önnur námskeið sem meta á inn í grunnnám í hjúkrunarfræði við HA samkvæmt fyrirliggjandi matsreglum.
    2. Almennar reglur Hjúkrunarfræðideildar HA um mat á fyrra námi m.t.t. aldurs námskeiða, einingafjölda og lágmarkseinkunnar gilda um valnámskeið á 4. ári eins og önnur námskeið.
    3. Námskeið sem metin eru til móts við valnámskeið á meistarastigi skulu vera á framhaldsnámsstigi í háskóla (meistara og/eða doktorsnámsstigi) og hafa skýra tengingu við hjúkrunarfræði.
    4. Nemandi skal skila inn rökstuðningi hvernig námskeiðið muni nýtast honum í hjúkrunarstörfum í framtíðinni.
    5. Matsnefnd Hjúkrunarfræðideildar metur námskeið sem nemandinn sækir um mat á til móts við valnámskeið á meistarastigi m.t.t. innihalds þess og ofangreindra þátta. Námskeið sem metin eru þurfa að samræmist grundvallar hugmyndafræði, kennslusýn og námsmarkmiðum Hjúkrunarfræðideildar.
13. Nemandi í hjúkrunarfræði sem hefur sjúkraliðapróf getur sótt um mat á starfsreynslu sinni sem sjúkraliði á móti 2ja vikna klínísku námi í HJÚ0208 Hjúkrunarfræði II sem fram fer á öldrunarstofnun. Ávallt skal sækja um slíka undanþágu til matsnefndar. Umsókn skal fylgja starfsleyfi sjúkraliða gefið út af Embætti landlæknis, einnig umsögn og starfsvottorð frá vinnuveitanda. 
1. Til að klínískt nám sé metið þarf nemandi að hafa unnið við aðhlynningu sem sjúkraliði í samtals 80% starfshlutfalli í a.m.k. 2 ár á síðustu 5 árum.
2. Fái nemandi klínískt nám metið þarf hann samt sem áður að skila þeim verkefnum sem tengjast klíníska náminu.
Nemanda í hjúkrunarfræði er skylt, á meðan á námi stendur, að afla sér að a.m.k. 384 klukkustunda starfsreynslu við aðhlynningu á heilbrigðisstofnun utan skipulegs námstíma undir umsjón hjúkrunarfræðings. Skila skal starfsvottorði fyrir útskrift úr hjúkrunarfræði sem staðfestir eftirfarandi:
1. Starfið telur að lágmarki 384 klukkustundir.
2. Helming starfsreynslunnar (192 klukkustundir) eiga nemendur starfa eftir að hafa lokið fyrsta námsári eða síðar og hinn helminginn eftir að hafa lokið öðru námsári.
3. Starfið skal unnið á heilbrigðisstofnun undir umsjón hjúkrunarfræðings.
4. Nemendur sem starfa við sjúkraflutninga á námstímanum geta fengið mat á 1/3 (128 klst.) starfsreynslunnar. Sjúkraflutningamenn geta fengið sína starfsreynslu metna á móti starfsreynslu eftir fyrsta námsár en ekki á móti þeirri starfsreynslu sem þarf að eiga sér stað að loknu 2. námsári.
14. Reglur þessar eru ætlaðar til að hafa til viðmiðunar. Allar viðmiðunartölur um einingar eru hámörk og matsnefnd ekki skylt að meta fyrra nám að hámarki.

Reglur matsnefndar Kennaradeildar 

Matsnefnd Kennaradeildar starfar í umboði deildarfundar. Hún fjallar um og metur fyrra nám nemenda.

I. Hlutverk og uppbygging

1. Hlutverk matsnefndar er að meta fyrra nám nemenda óski þeir þess.
2. Matsnefnd Kennaradeildar skal skipuð minnst þremur fulltrúum kennara (prófessora, dósenta, lektora eða aðjúnkta), sem valdir skulu til tveggja ára í senn af viðkomandi deildarfundi og einum fulltrúa stúdenta, sem er valinn af félagssamtökum þeirra til eins árs í senn. Skulu nefndarmenn kosnir á deildarfundi í maí/júní til tveggja ára í senn en kjörtímabil nefndarinnar hefst í ágúst. Nefndarmenn skipta með sér verkum og skal einn þeirra vera formaður nefndarinnar.
3. Skrifstofa hug- og félagsvísindasviðs ber ábyrgð á skjalavörslu þeirra erinda sem nefndinni berast og sendir svarbréf til nemenda um afgreiðslu erinda.

II. Fyrra háskólanám nemenda

1. Frestur nemenda til að skila inn erindum um mat á fyrra námi til afgreiðslu fyrir haustmisseri er 20. september, en 20. janúar fyrir erindi sem afgreiðast eiga fyrir vormisseri. Afgreiðsla erinda getur tekið allt að 6 vikur.
2. Nemandi sem lokið hefur námskeiðum við aðrar háskólastofnanir getur sótt um að fá þau metin inn í samsvarandi nám við kennaradeild. Í meistaranámi og viðbótarnámi má að jafnaði aðeins meta helming viðkomandi náms og nemandi á bakkalárstigi skal að jafnaði ljúka sem svarar a.m.k. einu námsári við deildina af þremur.
3. Matsnefnd metur hvort fyrra háskólanám nemanda getur komið í stað námskeiða sem kennd eru í kennaradeild.
4. Til þess að unnt sé að meta fyrra háskólanám þarf að liggja fyrir skrifleg beiðni nemanda um slíkt mat, á þar til gerðu eyðublaði, ásamt staðfestu afriti af vitnisburði frá þeim háskóla eða háskólum þar sem námið sem óskað er eftir að fá metið fór fram. Í matsbeiðninni verður að tilgreina hvaða námskeið við kennaradeild er sótt um að verði metin og hvaða námskeið frá öðrum háskólum geti talist jafngild. Einnig skulu fylgja námskeiðslýsingar og einingafjöldi þeirra námskeiða sem óskað er eftir að fá metin. Matsbeiðni skal vera undirrituð og jafnframt komi fram, heimilisfang og kennitala umsækjanda. Senda skal matsbeiðni til skrifstofu hug- og félagsvísindasviðs.
5. Matsnefnd skal, eftir því sem kostur er á, senda beiðnir, sbr. síðustu grein, til umsagnar umsjónarkennara þeirra námskeiða sem beðið er um að fyrra nám sé metið á móti. Þetta skal gert áður en mat fer fram nema fyrir liggi mat á sams konar umsókn.
6. Fyrra nám er ekki metið á móti námi í kennaradeild séu meira en tíu ár liðin síðan því var lokið. Háskólapróf, embættispróf og önnur lokapróf má þó viðurkenna sem heildir þótt þau séu eldri hafi umsækjandi starfað á því fagsviði sem menntunin nær til eða skyldu fagsviði a.m.k. þrjú ár af sl. fimm árum. Nemandi þarf, í því tilfelli, að leggja fram starfsferilsvottorð með umsókninni
7. Fylgt skal þeirri reglu að annað hvort sé fyrra nám metið á móti heilu námskeiði eða ekki metið. Til að námskeið sé metið að fullu skal það að jafnaði samsvara a.m.k. 75% af innihaldi þess námskeiðs sem það á að jafngilda, auk þess sem heildareiningafjöldi þess námskeiðs verður að vera a.m.k. jafn mikill. Séu námskeiðhlutar teknir til mats verða þeir að vera skýrt afmarkaðir svo hægt sé að meta eftir sömu reglu.
8. Stök námskeið úr fyrra háskólanámi fást aðeins metin hafi umsækjandi hlotið í þeim að lágmarki einkunnina 6. Námsheildir úr fyrra námi fást aðeins metnar hafi umsækjandi hlotið í þeim meðaleinkunnina 6 eða hærra.
9. Matsnefnd er heimilt að meta heildstætt misserisnám, eða eftir atvikum lengra nám, sem jafngildi samsvarandi námi við kennaradeild án þess að innihald einstakra námskeiða uppfylli til fulls þau skilyrði sem sett eru í grein II.7. Skilyrði fyrir þessu mati er að fyrra námið sé á sömu eða sambærilegum sviðum og kennd eru í kennaradeild. Heimilt er að meta heildstætt fyrra nám sem ígildi kjörsviðs/áherslusviðs/kjarna.
10. Matsnefnd afgreiðir mál þannig að starfsmaður skrifstofu kennaradeildar skráir niðurstöður nefndarinnar og sendir umsækjanda og öðrum sem málið varðar. Haldin er fundargerð með yfirliti afgreiðslna.
11. Umsækjandi eða umsjónarkennari viðkomandi námskeiðs getur áfrýjað ákvörðun matsnefndar til deildaráðs.
12. Reglur þessar eru meginreglur til viðmiðunar. Allar viðmiðunartölur um einingar eru hámörk og matsnefnd er ekki skylt að meta fyrra nám að hámarki.

Reglur þessar voru samþykktar á deildarfundi 7. febrúar 2018.