Líftækni er tækni sem gerir það mögulegt að nota lífverur til að framleiða nýjar afurðir eða breyta náttúrulegum ferlum. Þannig er hægt að búa til lyf, matvæli og fleiri afurðir. Líftækni er því í raun tól til þess að búa til verðmæti úr auðlindum sjávar og lands.
Námið er spennandi og krefjandi. Markmiðið er að þú öðlist góðan grunn til að starfa við rannsóknir. Námið hefur einnig reynst góður grunnur fyrir fjölbreytt framhaldsnám á sviði raunvísinda og líffræði.
Í líftæknináminu eru tvö megináherslusvið:
Bæði sviðin veita traustan grunn til áframhaldandi náms á meistarastigi.
Þú getur skoðað skipulag námsins í Uglu, kennsluvef háskólans:
Í dag eru starfrækt mörg nýsköpunar- og sprotafyrirtæki í líftækni sem geta nýtt sér krafta þína að námi loknu. Þar má nefna Alvotech, Íslenska erfðagreiningu, Orf líftækni, Primex, Algalif, Genis og Lýsi. Þú getur líka stofnað þitt eigið sprotafyrirtæki út frá þínum rannsóknum og hugmyndum.
Líftækninámið skapar góðan grunn til rannsóknastarfa, bæði hjá opinberum stofnunum eins og Matís og Umhverfisstofnun og hjá fyrirtækjum.
Hátt hlutfall nemenda hefur farið í meistara- og doktorsnám að loknu BS-námi.
Félagslíf er mikilvægur þáttur háskólanáms og er félagslíf nemenda við HA öflugt.
Allir nemendur við háskólann eru í Stúdentafélagi Háskólans á Akureyri (SHA) en einnig er hver deild með sitt nemendafélag. Stafnbúi er félag líftækni- og sjávarútvegsnema og þú getur nálgast nánari upplýsingar um félagið á Facebook.
Almenn krafa er að umsækjendur hafi lokið stúdentsprófi, lokaprófi frá framhaldsskóla á þriðja hæfniþrepi, jafngildu erlendu prófi eða 60 ECTS einingum frá viðurkenndum háskóla. Nám í líftækni er að hluta raungreinanám með líffræði, efnafræði og stærðfræði sem kjarnanámskeið. Símenntun HA bíður upp á tvö raungreina undirbúningsnámskeið í lok ágúst. Búið er að opna fyrir skráningar: Efnafræði og Stærðfræði.
Við viljum benda á að ef fjöldi umsækjenda sem uppfyllir almenn inntökuskilyrði fer yfir fjöldaviðmið verður umsóknum forgangsraðað á eftirfarandi hátt:
Umsækjendum verður svo raðað upp samkvæmt samlagningu þessa þátta og teknir inn í þeirri röð. Við mat á ferilskrá og kynningarbréfi verður litið á hvort fyrra nám tengist með einhverjum hætti líftækni. Fyrri starfsreynsla getur líka skipt máli. Því er mikilvægt að umsækjendur sendi inn ferilskrá (CV) og kynningarbréf með stuttum texta um af hverju þeir völdu líftækni.
Hér getur þú lesið meira um inntökuskilyrði háskólans.
Umsækjendur sem ekki hafa stúdentspróf en eru með meira en 90 einingar (140 fein) af framhaldsskólastigi verða eingöngu teknir til skoðunar ef fjöldi umsókna nemenda með stúdentspróf er undir fjöldaviðmiðum. Þeir nemendur munu einnig verða forgangsraðaðir með tilliti til námseininga og starfsreynslu samanber hér að ofan.
Allt grunnnám við Háskólann á Akureyri er sveigjanlegt nám sem þýðir að engu skiptir hvort þú ert staðarnemi eða fjarnemi. Allir fylgja sömu námskránni og námskröfur eru þær sömu.
Flestir hefðbundnir fyrirlestrar eru teknir upp og settir á kennsluvef. Þannig getur þú horft á fyrirlestra þegar þér hentar og eins oft að þú vilt. Þú getur jafnvel hægt eða hraðað á hljóðinu. Okkur þykir samt auðvitað skemmtilegt að sjá þig í kennslustund.
Allir fjarnemar þurfa koma tvisvar sinnum á misseri í eina viku til Akureyrar. Þá eru gerðar tilraunir á rannsóknastofu og farið í aðra verklega tíma. Þar gefst þér tækifæri til að hitta kennara, samnemendur og annað starfsfólk háskólans og tengjast enn betur háskólasamfélaginu þínu.
Hér getur þú lesið meira um sveigjanlega námið og séð hvenær námslotur eru.
Allir nemendur eiga kost á að taka hluta af námi sínu við erlenda samstarfsháskóla. Þú færð niðurfellingu á skólagjöldum gestaskólans og greiðir eingöngu innritunargjald í HA. Alþjóðafulltrúi aðstoðar þig við að sækja um námið, húsnæði og nemendastyrk.
Líftækninámið reyndist mér vel sem undirbúningur fyrir framhaldsnám. Einnig hefur það komið að góðum notum við störf mín tengd lífvísindum sem og í núverandi starfi.
Þegar ég flutti norður til að stunda nám í líftækni vissi ég ekki við hverju væri að búast. HA tók vel á móti mér með persónulegu umhverfi. Nemendur við HA eru einstaklega heppnir með góða kennara sem eru allir af vilja gerðir til að fræða og upplýsa. Mér finnst kröfurnar og gæði náms vera á sama stigi hjá HA og hjá NTNU.
Í líftækni lærir þú allt í senn öguð vinnubrögð lífvísinda og undirstöðugreinar í viðskiptafræði. Á sama tíma er ýtt undir sköpunargleði og hugmyndaflug.
Eintómt hrós frá mér fyrir líftækninámið í HA. Kennarar eru vel tengdir við atvinnulífið og á þessum þremur árum myndaði ég ómetanleg tengsl sem nýtast mér til frambúðar. Námið hefur nýst mér vel í starfi, allt frá raungreinum, eins og efnafræði og örverufræði, til námskeiða sem fjalla um stjórnun og gæði.
Námskeiðið fjallar um undirstöðuatriði almennrar efnafræði. Eftirtaldir efnisþættir eru m.a. innihald námskeiðsins: Eðlis- og efnaeiginleikar efna. Lotukerfið og helstu flokkar þess. Bygging frumeinda. Frumeinda- og sameindamassar, mól og mólmassar. Algeng efnasambönd og flokkun þeirra. Eiginleikar og nöfn algengra ólífrænna efnasambanda. Ritun efnajafna fyrir einföld efnahvörf og oxunar-afoxunarhvörf. Takmarkandi hvarfefni og heimtur. Lausnir, útreikningar á styrk þeirra og títranir. Orkuhugtakið og tengsl þess við efnahvörf og fasabreytingar. Lögmál varmafræðinnar og orka efnahvarfa. Kjörgas, hlutþrýstingur og raunverulegar lofttegundir. Einfaldar kristalbyggingar og ákvörðun þeirra og eiginleikar. Hraðafræði efnahvarfa. Aðferðir við fræðilegar og verklegar rannsóknir og skýrslugerð.
Námskeiðið veitir innsýn í undirstöðuatriði nútíma líffræði. Helstu efnisflokkar námskeiðsins eru: Grundvallaratriði frumulíffræði og tengsl efnafræði og líffræði. Gerð og eiginleikar 4 meginflokka lífefna (sykrunga, lípíða, prótína og kjarnsýra). Orkubúskapur og grunnefnaskipti í frumum. Bygging heilkjarna frumu, gerð og eiginleikar helstu frumulíffæra. DNA og hlutverk þess í erfðum og líftækni. Erfðir, náttúruval og þróun tegunda. Stofnar og fjölbreytileiki plantna og dýra. Í verklegum hluta námskeiðsins eru gerðar einfaldar tilraunir á rannsóknastofu.
Líftækni er bæði gömul og ný. Námskeiðinu er ætlað að skilgreina líftækni frekar sem og möguleika hennar. Líftækni er kjörin leið til nýsköpunar svo sem að finna, skilgreina, framleiða og nýta enn frekar náttúruauðlindir. Þá er líftækni kjörið verkfæri til annarra verka svo sem til greininga, sjúkdómsvarna, mengunarvarna, orkuframleiðslu til að nefna nokkur. Farið verður í helstu starfsvið líftækninnar, svo sem sjávarlíftækni, dýra og plöntulíftækni, heilbrigðislíftækni, umhverfislíftækni og erfðatækni. Umfjöllun verður um helstu flokka lífvera og efna með tilliti til möguleika á að nýta þær sem uppsprettu lífvirkra efna, að nýta þær sem verksmiðjur til að framleiða lífvirk efni eða til að brjóta niður lífræn efni og um erfðabreyttar lífverur og sameindalíffræði. Umfjöllun um helstu efnaflokka svo sem lyf, ensím, bætiefni, lífvirk efni, “líforku”, lífnema, náttúruleg eiturefni og lífhreinsun. Yfirlit um lífefnavinnslu og vinnslu á verðmætum afurðum úr aukahráefni og tekin dæmi um fyrirtæki á þessu sviði. Sérfræðingar deildarinnar munu lýsa verkefnum sínum á sviði líftækni og samþætta með þeim atriðum sem áður eru nefnd.
Í námskeiðinu er lögð áhersla á að kenna grundvallaraðferðir, hugtök og vinnubrögð sem nýtast við stærðfræðilegar lausnir á vandamálum sem koma fyrir í viðskiptafræði.
Námskeiðið miðar að því að þjálfa nemendur í helstu grundvallaratriðum fræðilegra vinnubragða. Í námskeiðinu er fjallað um helstu gerðir rannsókna og markmið þeirra, hin tvö megin rannsóknar-viðmið rannsókna, þ.e. vísindaheimspekilegar forsendur þeirra. Kynntar eru helstu rannsóknar-aðferðir og er lögð áhersla á að megindlegar og eigindlegar aðferðir séu kynntar sérstaklega. Þá er lögð áhersla á skipulag rannsókna, rannsóknarspurningar, skilgreiningar hugtaka og tilgátur. Heimildavinna, rafræn heimildaleit, tilvísanir í heimildir og heimildaskráning fá vandlega umfjöllun . Fjallað er um úrvinnslu gagna og framsetningu niðurstaðna gagna, m.a. gerð texta, stílbrigði,og grunnatriði framsetningar tölfræðilegra gagna. Þá er fjallað sérstaklega um siðferðileg álitamál í rannsóknum og gagnrýna hugsun í vísindum. Loks er lögð mikil áhersla á að kenna nemendum ritgerðasmíð, uppbyggingu ritgerða og skýrslna og verklag við slíka vinnu. Áhersla er lögð á vinnu minni nemendahópa að sértæku rannsóknarverkefni sem gefur nemendum innsýn og þjálfun í ferli rannsóknar: undirbúning, framkvæmd og framsetningu niðurstaðna.
Námskeiðið gefur innsýn í hagnýtingu efnafræði í nútíma þjóðfélagi, auk þess að veita frekari fræðilegan grundvöll í efnafræði. Eftirfarandi efni er tekið fyrir:
Fjallað er um rannsóknarsnið, helstu gagnaöflunaraðferðir og tölfræði. Af eigindlegum og megindlegum aðferðum er fjallað um viðtöl, rýnihópa og þátttökuathuganir, tilraunir, spurningakannanir og notkun opinberra gagna í rannsóknum. Þá eru kenndir helstu þættir í lýsandi tölfræði, myndrænni framsetningu gagna og einfaldri framsetningu á niðurstöðum. Kynnt eru grunnatriði í ályktunartölfræði, líkindareikningi og einföld tölfræðipróf. Einnig er farið í grunnatriði aðhvarfsgreiningar. Kynnt er skráning gagna í gagnagrunna og grunnatriði í notkun tölfræðiforrita.
Í námskeiðinu er lögð áhersla á að þjálfa frekari aðferðir, hugtök og vinnubrögð í stærðfræði sem nýtast í raunvísindum og viðskiptafræði.
Í námskeiðinu eru kynnt grundvallaratriði í almennri vistfræði. Helstu efnisþættir eru: Saga vistfræðinnar, hlutverk hennar og rannsóknir. Stofnar og tengsl þeirra innbyrðis: samkeppni, afrán, og önnur samskipti. Stjórn og nýting stofna og eðli þeirra: fæðingartölur, dánartölur, aldursdreifing, líftölur, vöxtur, sveiflur og stærð. Þættir sem hafa áhrif á vöxt og útbreiðslu lífvera. Samfélög, tegundasamsetning, tegundafjölbreytni, fæðuvefir, og framvinda. Vistfræði þurrlendis, ferskvatns og sjávar. Líffræðilegur fjölbreytileiki og válistar. Vistfræði mannsins og umhverfismál.
Námskeiðið fjallar um grundvallaratriði örverufræðanna í eftirfarandi meginatriðum: Saga örverufræðinnar. Bygging dreif- og heilkjörnunga. Helstu hópar baktería, fyrna og heilkjarna örvera. Ræktun baktería og áhrif umhverfisþátta á vöxt örvera. Hindrun á vexti örvera. Mikilvægi örvera í niðurbroti á lífrænum efnum. Iðnaðar- og umhverfisörverufræði. Erfðafræði dreifkjörnunga og líftæknileg örverufræði. Fjölbreytileiki efnaskipta. Ónæmisfræði og frumur ónæmiskerfisins. Tengsl hýsla og sýkla. Helstu sjúkdómsvaldandi örverur og sjúkdómar sem þær valda. Í verklegum hluta námskeiðsins er farið yfir einangrun, greiningu og vöxt baktería, áhrif vaxtaþátta (hiti, pH, salt) á örverur, áhrif sótthreinsiefna á vöxt örvera. Hluti fyrirlestra og verklegrar kennslu gæti verið fluttur á ensku.
Farið er yfir aðalatriði í hreyfifræði, vökvafræði, bylgjufræði, hljóðfræði og rafmagnsfræði. Helstu efnisþættir námskeiðsins eru:
Í námskeiðinu er farið yfir grundvallar atriði erfðafræði. Helstu efnisþættir eru: Saga erfðafræðinnar og lögmál Mendels. Útvíkkun á Mendelskri greiningu. Bygging og eftirmyndun litninga, frumuhringurinn, tengslagreining, endurröðun og kortlagning gena á litningum. Sameindaerfðafræði: Bygging kjarnsýra, afritun DNA, stökkbreytingar og viðgerðir. Umritun, þýðing og stjórnun genatjáningar. Erfðafræði baktería, stökkla, veira og spendýra. Aðferðafræði erfðatækninnar. Erfðamengi, erfðafræði heilkjörnunga og erfðasjúkdómar. Verklegar æfingar tengjast rannsóknum kennara hverju sinni, eins og DNA mögnun, ummyndun og einangrun plasmíða, skerðikortlagningu, DNA rafdrátt og ásamt gagnaúrvinnslu.
Farið er í meginuppgötvanir í lífefnafræði. Farið er í eiginleika og myndbyggingu risasameinda; amínósýrur, peptíðtengi og myndbygging próteina; sykrur og fjölsykrur; fitur og frumuhimnur; samsetning kjarnsýra og DNA. Orkubúskapur lífvera og efnaskiptaferli. Líforkufræði. Glýkólýsa. Nýmyndun glúkósa og pentósaferli. Efnaskipti glýkógens. Stýring efnaskiptaferla. Sítrónusýruhringur. Niðurbrot fitusýra. Efnaskipti amínósýra og þvagefnishringur. Rafeindaberakeðjan og ildisháð fosfórýlering. Ljóstillífun. Nýmyndun stórsameinda. Hluti fyrirlestra og verklegrar vinnu gæti verið fluttur á ensku.
Í námskeiðinu er fjallað um stjórnun og stjórnunarkenningar, skipulagsheildir og atferli einstaklinga og hópa við vinnu. Fjallað er um staðblæ og gildismat innan fyrirtækja og sérstök áhersla lögð á mismunandi þjóðmenningu, viðskiptasiðferði og samfélagslega ábyrgð. Ennfremur er fjallað um atferli einstaklinga og vinnuhópa, starfshvatningu, stjórnunarstíla, leiðtogahlutverkið og breytingastjórnun. Loks er fjallað um nýjar áherslur í stjórnun.
Nemendur velji námskeið í samráði við kennara/brautarstjóra deildarinnar.
Fjallað er um stoðkerfi líkamans ásamt hringrásarkerfi hans. Kynnt eru grunnhugtök líffærafræðinnar. Fjallað er ítarlega um eftirfarandi líffærakerfi: bein, liði, beinagrindarvöðva, blóðið, hjarta og æðar. Auk þess er farið í fósturfræðilega myndun þessara líffærakerfa.
Á námskeiðinu er fjallað um grundvallaratriði í gerð og starfsemi fruma. Í fyrsta lagi er fjallað um gerð ósérhæfðra fruma, helstu frumulíffæri og hlutverk þeirra. Í öðru lagi er fjallað um helstu flokka lífrænna efnasambanda og efnaskipti frumunnar. Í þriðja lagi er fjallað um sérhæfingu fruma, helstu vefjagerðir og starfsemi sérhæfðra fruma með sérstakri áherslu á taugafrumur. Í fjórða lagi er fjallað um líffræðileg stýrikerfi á sameindastigi og í samhengi við tauga- og innkirtlakerfi. Veruleg áhersla er lögð á sameindalíffræði fruma og að sýna fram á samhengi milli afbrigðilegrar frumustarfsemi og sjúkdóma.
Í námskeiðinu er fjallað um hvernig aðferðir sameindaerfðafræðinnar nýtast í umhverfislíftækni og grænni líftækni. Fjallað verður um klónun gena, genaferjur, framleiðslu erfðabreyttra próteina í bakteríum og plöntum, plöntuerfðatækni, þýðisgreiningar út frá erfðaefni úr umhverfissýnum, genastjórnun þroskunar í plöntum, og erfðatækni matvæla. Nemendur taka ákveðin efni fyrir á málstofu í tengslum við námsefnið. Verklegar æfingar tengjast rannsóknum kennara hverju sinni á sviði umhverfislíftækni og grænnar líftækni, og munu beita aðferðum á borð við rauntíma PCR, klónun, raðgreiningu og arfgerðargreiningu á bakteríum og heilkjarna lífverum ásamt gagnaúrvinnslu.
Í námskeiðinu er farið yfir öll meginatriði í lífeðlisfræði vöðva, hjarta- og blóðrásarkerfis, lungna, nýrna og meltingarvegar. Einnig er fjallað um lífeðlisfræði skynfæra og meðvitundar og stjórn hreyfinga.
Fjallað um efna- og örverufræði helstu fæðuflokka svo sem mjólkur, kjöts, fisks, ávaxta og grænmetis. Helstu efnaflokkar í matvælum (kolvetni, fita, prótein, vítamín, steinefni, aukefni). Fjallað er um helstu efnaskemmdarferli matvæla (þránun, brúnun) og um efnaeiginleika helstu flokka matvæla. Skemmdar-r og sjúkdómsvaldandi örverur og áhrif þeirra á mismunandi matvæli. Matareitranir og -sýkingar og orsakir þeirra. Áhrif umhverfisþátta (hita, raka, pH s og pökkunar) og vinnslu (kæling, frysting, söltun, þurrkun, reyking, gerjun/súrsun og efnarotvörn) á gæði matvæla. Notkun örvera við framleiðslu matvæla.
Nemendur velji námskeið í samráði við kennara/brautarstjóra deildarinnar.
Nemendur velji námskeið í samráði við kennara/brautarstjóra deildarinnar.
Markmið: Að kynna fyrir nemendum tengsl stjórnunar við rekstur og afkomu fyrirtækja og gera þeim mögulegt að nota aðferðir rekstrarstjórnunar við ákvarðanatöku. Efni: Rekstrarstjórnun. Samkeppnisstaða, stefnumótun og framleiðni. Gerð spálíkana. Skipulag afkastagetu. Rekstrarferli. Skipulag aðstöðu. Staðarval. Vörustjórnun. Birgðastýring, óháðar vörur. Gerð framleiðsluáætlana. Birgðastýring, háðar vörur. Vörustjórnun. Verkefnastjórnun.
Í námskeiðinu er fjallað ítarlega um öll helstu líffærakerfi mannsins. Fjallað er um, vessakerfið, líkamstaugakerfi, ósjálfráða taugakerfið, innkirtlakerfið, öndunarkerfið, meltingarkerfið, þvagkerfið og æxlunarkerfið. Auk þess er farið í fósturfræðilega myndun þessara líffærakerfa.
Í námskeiðinu vinna nemendur í litlum hópum (3 til 6 nemendur) við að hanna, framkvæma, kynna og skrásetja sjálfstætt rannsóknaverkefni í samráði við leiðbeinanda. Meginmarkmið námskeiðsins er að nemendur reyni og læri rannsóknavinnu í hópum eða teymum, læri verkefna- og gæðastjórnun og að deila verkum.
Námskeiðið fjallar um notkun örvera í líftæknilegum ferlum. Efnisþættir: Fjölbreytileiki örvera og efnaferlar þeirra. Örverur sem efnaverksmiðjur. Framleiðsla próteina, bóluefna, skordýraeiturefna, ensíma, amínósýra, sýklalyfja, vítamína og sykra með örverum. Plöntulíftækni. Orkulíftækni (lífmassi, etanól, metan og vetni). Umhverfislíftækni: niðurbrot lífræns úrgangs og óæskilegra mengunarefna í náttúrunni. Erfðatæknilegar aðferðir í örverufræði. Markvissar stökkbreytingar. Skimun á lífefnum í örverum. Gerjunartækni og ræktun á örverum í stórum stíl. Auk þess fá nemendur nýlegar vísindagreinar sem þeir þurfa að kynna sér og kynna síðan á fyrirlestri. Verklegar æfingar verða í tengslum við rannsóknir kennara. Hluti fyrirlestra og verklegrar vinnu gæti verið fluttur á ensku.
Námskeiðið fjallar um úrvinnslu sameindaerfðafræðilegra og lífefnafræðilegra gagna í rannsóknum á sviði líftækni, vistfræði, heilbrigðisvísinda, og réttarvísinda. Meðal efnisatriða sem farið er yfir í fyrirlestrum og verkefnum eru eftirfarandi: Notkun erfðamengjasafna og annarra gagnabanka. Eiginleikar og tölfræðileg úrvinnsla kirna- og amínósýruraða. Breytileiki, samsætutíðni og stofnasamsetning. Erfðamengi, raðgreining þeirra og kortlagning. Einföld og margföld samröðun kirna- og amínósýruraða. BLAST algoriþminn: Notkun hans og túlkun niðurstaðna. Upprunaflokkun og gerð skyldleikatrjáa. Þýðisgreining örverusamfélaga, umritamengjagreining og prótínmengjagreining. Hluti fyrirlestra gæti verið fluttur á ensku.
Námskeiðið fjallar um ónæmiskerfi mannslíkamans, grunnþætti þess og svaranir. Helstu efnisþættir: Frumur og líffæri ónæmiskerfisins. Ósérhæfðar og sérhæfðar varnir líkamans. Ónæmissvörun, sjálfsþol og stjórnun ónæmissvörunar. Ónæmisbilanir, ofnæmi og sjálfsofnæmi. Áhrif umhverfis og utanaðkomandi þátta á svörun ónæmiskerfisins. Ónæmisfræðilegar greiningaraðferðir. Verkefni og verklegar æfingar er skipulagt með hliðsjón af efni fyrirlestra.
Fjármálastjórn og viðfangsefni fjármálafræða. Kynning á fjármagnsmarkaðinum, fjármálastofnunum, vöxtum og vaxtamyndun. Samband áhættu og arðsemi. Núvirði og framvirði greiðslu og greiðslugeta. Aðferðir við mat á markaðsvirði verðbréfa. Fjármagnskostnaður. Fjárfestingaáætlanir og aðferðir við mat fjárfestinga. Sjóðstreymi og fjárfestingar. Val fjárfestinga, áhættugreining og fjármagnsskömmtun. Fjármagnsskipan fyrirtækja. Gerð fjárhagsáætlana, rekstraráætlana og um þróun fjárhagslegrar stöðu. Fjallað verður um veltufjármuni og fjármögnum þeirra. Kennsla fer fram í fyrirlestrum og verkefnavinnu og /eða prófæfingum.
Nemendur velji námskeið í samráði við kennara/brautarstjóra deildarinnar.
Framleiðsla á vörum, sem ætlaðar eru til inntöku (t.d. matvælum), verður að lúta ýmsum kröfum hvað varðar framleiðsluhætti. Framleiðendur þurfa að uppfylla kröfur sem tryggja öryggi og ákveðin skilgreind gæði vörunnar.Námskeiðið fjallar um slíkar meginkröfur, svo sem lög, reglur og gæðakerfi til framleiðslu á matvælum og hráefnum til matvælaframleiðslu, fæðubótar efnum, lyfjum og öðru sem ætlað er til manneldis eða útvortis nota. Eftirfarandi kerfum verður lýst sérstaklega: GMP/GHP, HACCP en einnig ISO9000, ISO14000 og ISO17025. Lögð er áhersla að sýna með dæmum hvernig þessar kröfur eru útfærðar og leystar við raunverulegar aðstæður.
Í námskeiðinu er fjallað um hvernig aðferðir sameindaerfðafræðinnar nýtast í heilbrigðislíftækni til að greina, koma í veg fyrir og meðhöndla sjúkdóma mannsins. Farið verður í orsakir sjúkdóma og hvernig erfðafræðin, ónæmisfræðin og lyfjafræðin nýtist í að þróa greiningapróf, bóluefni og lyf til lækninga. Lögð verður áhersla á að skilja gangvirki erfðaefnisins í lífverum og hvernig má grípa inn í tjáningarstjórnun gena. Þá verður tekið fyrir sjúkdómsferli af völdum frumdýra, baktería og veira. Nemendur taka ákveðin efni fyrir á málstofu í tengslum við námsefnið. Í verklegum æfingum verða notuð greiningapróf t.a.m. qPCR ásamt gagnaúrvinnslu.
Á lokamisseri námsins eiga nemendur að vinna sjálfstætt lokaverkefni sem tengist þeirra sérsviði. Nemandinn skilgreinir verkefnið með aðstoð leiðbeinanda og skilar skráningarblaði til umsjónarmanns lokaverkefna. Í framhaldi af því vinnur nemandi nánari lýsingu á verkefninu, vinnur rannsókna-, verk- og tímaáætlun og skrifar yfirlit yfir þá aðferðafræði sem fyrirhugað er að beita í verkefninu. Þessum verkþáttum er skilað sem verkáætlun til umsjónarmanns lokaverkefna. Þá tekur við eiginleg vinna við rannsóknina og ritun fræðilegrar skýrslu um verkefnið og niðurstöður þess, með skilum áfangaskýrslu um mitt misseri. Nemandinn mun vinna fyrst og fremst einn við framkvæmd verkefnisins. Leiðbeinandinn mun veita ráð og útskýringar frekar en ákveðna kennslu.
Nemendur velji námskeið í samráði við kennara/brautarstjóra deildarinnar.
Markmið námskeiðsins er að nemendur fái innsýn í þann hluta hagnýtrar lyfjafræði sem snýr að störfum hjúkrunarfræðinga. Lögð er áhersla á að nemendur öðlist þekkingu á helstu lyfjaflokkum m.t.t. klínískra atriða er varða verkun lyfja og verkunartíma, virk efni og undirflokkanir, aukaverkanir og milliverkanir. Fjallað verður um hvernig nota á sérlyfjaskrá á skilvirkan hátt og ACT lyfjaflokkunin kynnt. Tilgangur námskeiðsins er að auka færni og þekkingu nemenda á lyfjafræði þannig að hún nýtist þeim sem best í störfum þeirra sem hjúkrunarfræðingar.
Herdís Hulda Guðmannsdóttir er verkefnastjóri við Heilbrigðis-, viðskipta- og raunvísindasvið. Hún tekur vel á móti þér og svarar þeim fyrirspurnum sem þú kannt að hafa. Meira um Herdísi.
