Ef þú hefur áhuga á vísindum, nýsköpun og raunverulegum áhrifum gæti líftækni verið rétta leiðin fyrir þig.

Líftækni gerir okkur kleift að nýta lífverur til að þróa nýjar afurðir, svo sem lyf og matvæli. Hún er lykilgrein í nýsköpun, heilbrigðisvísindum og sjálfbærri nýtingu auðlinda sjávar og lands.

Nám í líftækni við HA er spennandi og krefjandi og veitir þér traustann grunn fyrir rannsóknastörf og frekara nám. Sérfræðingar í líftækni eru eftirsóttir um allan heim og starfsvettvangurinn er fjölbreyttur.

Námið er eingöngu í boði við Háskólann á Akureyri.

Er námið fyrir þig?

  • Hefur þú áhuga á náttúruvísindum og hagnýtingu þeirra?
  • Vilt þú starfa í ört vaxandi og alþjóðlegum geira?
  • Þorir þú að hugsa út fyrir boxið?
  • Hefur þú áhuga á auðlindum og verðmætasköpun?
  • Langar þig til þess að stofna og reka eigið fyrirtæki?

Áherslur námsins

Í líftæknináminu er lögð áhersla á hagnýt lífvísindi, eins og lífefnafræði og sameindaerfðafræði, auk námskeiða á sérsviðum líftækninnar. Jafnframt er boðið upp á námskeið í viðskipta- og rekstrargreinum. Þau undarbúa þig fyrir að starfa í og stjórna líftæknifyrirtækjum.

Mikil áhersla er lögð á verklega þjálfun sem gefur þér góða þekkingu og færni til starfa á rannsóknastofum. Skyldumæting er í þessar verklegu lotur.

Námið veitir traustan grunn til áframhaldandi náms á meistarastigi.

Þú getur skoðað skipulag námsins neðar á síðunni og í Uglu, kennsluvef háskólans.

Sveigjanlegt nám

Grunnnám við HA er sveigjanlegt og hentar bæði stað- og fjarnemum. Allir fylgja sömu námskrá og sömu kröfum.

Flestir fyrirlestrar eru teknir upp og aðgengilegir á kennsluvef. Þannig getur þú horft á fyrirlestra þegar þér hentar og eins oft að þú vilt.

Fjarnemar koma 2 á misseri í vikulangar lotur til Akureyrar. Þar fara fram tilraunir á rannsóknastofu og önnur verkleg kennsla. Loturnar veita tækifæri til að hitta kennara og samnemendur og tengjast háskólasamfélaginu enn betur. Mikilvægt er að kynna sér dagsetningar sem birtar eru með góðum fyrirvara.

Skyldumæting er í verklegu lotur, hvort sem þú ert staðar- eða fjarnemi.

Hér getur þú séð hvenær námslotur eru og lesið meira um sveigjanlega námið. 

Möguleikar að námi loknu

Líftækninám opnar fjölbreyttan starfsvettvang, bæði innanlands og erlendis.

Brautskráðir nemendur starfa meðal annars hjá nýsköpunar- og líftæknifyrirtækjum á borð við:

  • Arctic Therapeutics
  • Alvotech
  • Biopol
  • Íslenska erfðagreiningu
  • ORF Líftækni
  • Primex
  • Algalif
  • Genis

Einnig er mögulegt að starfa hjá opinberum stofnunum, svo sem Matís, Umhverfis- og orkustofnun, Náttúrufræðistofnun og á rannsóknarstofum sjúkrahúsanna, eða stofna eigið sprotafyrirtæki.

Hátt hlutfall nemenda heldur áfram í meistara- og doktorsnám að loknu BS-prófi.

Félagslífið

Félagslíf er mikilvægur þáttur háskólanáms og er félagslíf nemenda við HA öflugt.

Allir nemendur við háskólann eru í Stúdentafélagi Háskólans á Akureyri (SHA) en einnig er hver deild með sitt nemendafélag. Stafnbúi er félag líftækni- og sjávarútvegsnema og þú getur nálgast nánari upplýsingar um félagið á Facebook.

Inntökuskilyrði

Til að sækja um þarft þú að uppfylla eitt af eftirfarandi:

  • Stúdentspróf
  • Lokapróf á þriðja hæfniþrepi úr framhaldsskóla
  • Jafngilt erlent próf
  • 60 ECTS einingar frá viðurkenndum háskóla
  • Útskrift úr verk- og raunvísindadeild Háskólabrúar Keilis

Tungumálahæfni:
Námið fer fram á ensku og íslensku. Lesefni er á ensku, en kennsla fer að mestu leyti fram á íslensku. Því er æskilegt að umsækjendur búi yfir hæfni í þessum tungumálum sem samsvarar að minnsta kosti B2 í evrópska tungumálarammanum. Umsækjendur bera sjálfir ábyrgð á að meta eigin tungumálakunnáttu. Á vef Evrópuráðsins má nálgast tungumálaramma

Hæfni í raungreinum:
Námið byggir að hluta á raungreinum, þar sem líffræði, efnafræði og stærðfræði eru kjarnagreinar. Hafi umsækjandi ekki lokið einingum í þessum greinum er mælt með undirbúningsnámskeiðum í efnafræði og stærðfræði. Slík námskeið eru í boði hjá Símenntun HA í lok ágúst.

Undanþágur:
Umsækjendur 25 ára og eldri sem ekki uppfylla almenn inntökuskilyrði en hafa lokið að lágmarki 90 einingum (130 fein) á framhaldsskólastigi geta sótt um undanþágu.

Hér getur þú lesið meira um inntökuskilyrði háskólans.

Skiptinám

Þú getur tekið hluta námsins við erlenda samstarfsháskóla.

Þú greiðir eingöngu innritunargjald í HA og færð niðurfellingu á skólagjöldum við gestaskóla. Alþjóðafulltrúi aðstoðar þig við umsóknir, húsnæði og upplýsingar um styrki.

Þú getur smellt hér og lesið meira um skiptinám.

Umsagnir

Eintómt hrós frá mér fyrir líftækninámið í HA. Kennarar eru vel tengdir við atvinnulífið og á þessum þremur árum myndaði ég ómetanleg tengsl sem nýtast mér til frambúðar. Námið hefur nýst mér vel í starfi, allt frá raungreinum, eins og efnafræði og örverufræði, til námskeiða sem fjalla um stjórnun og gæði.

Olga Ýr Björgvinsdóttir
Forstöðumaður rannsóknastofa hjá Arctic Therapeutics

Líftækninámið reyndist mér vel sem undirbúningur fyrir framhaldsnám. Einnig hefur það komið að góðum notum við störf mín tengd lífvísindum sem og í núverandi starfi.

Dana Rán Jónsdóttir
Verkefnastjóri RHA

Í líftækni lærir þú allt í senn öguð vinnubrögð lífvísinda og undirstöðugreinar í viðskiptafræði. Á sama tíma er ýtt undir sköpunargleði og hugmyndaflug.

Guðný Vala Þorsteinsdóttir
Raungreinakennari við Menntaskólann á Akureyri