MM gráða í stjórnun er 90 eininga viðbótarnám á meistarastigi án lokaritgerðar, kennt í 100% sveigjanlegu fjarnámi. Námið hentar sérstaklega þeim sem vilja efla hæfni sína í stjórnun og leiðtogastörfum samhliða starfi.

Markmið námsins er að þú öðlist þekkingu og hæfni til stjórnunar fyrirtækja, stofnana og félagasamtaka, hvort sem þú gegnir slíku hlutverki í dag eða stefnir á það í framtíðinni.

Er stjórnun fyrir þig?

  • Hefur þú áhuga á stjórnun skipulagsheilda?
  • Hefur þú áhuga á samskiptum og leiðtoghæfni?
  • Vilt þú öðlast dýpri þekkingu stjórnun og stjórnunarháttum?
  • Vilt þú öðlast dýpri sýn á hlutverk og ábyrgð stjórnenda á vinnustaðnum?
  • Viltu verða hæfari í að mæta ólíkum þörfum á vinnustaðnum?
  • Hefur þú vilja til að bæta viðskiptalífið

Áherslur námsins

Með námi í stjórnun öðlast þú dýpri skilning á farsælli stjórnun, forystu og samskiptum. Þú kynnist einnig lykilþáttum í nútímalegri stjórnun, eins og gervigreind, verkefnastjórnun, mannauðsstjórnun, sjálfbærni, nýsköpun, stefnumótun og breytinga- og krísustjórnun.

Í náminu byggir þú upp trausta þekkingu og hagnýta færni í stjórnun. Þú lærir að rökstyðja ákvarðanir og tengja fræðin við raunveruleg verkefni.

Þú öðlast færni til að greina upplýsingar, takast á við flókin viðfangsefni og nýta rannsóknir, aðferðir og viðeigandi tækni til að þróa og leysa verkefni.

Í lok námsins getur þú skipulagt og leitt verkefni, sjálfstætt eða með öðrum, og miðlað niðurstöðum á skýran hátt.

Fyrirkomulag námsins

Námið er 1,5 ár í fullu námi. Þú getur valið að taka námið á lengri tíma. Kennsla fer fram á netinu með fyrirlestrum í upptöku, umræðutímum utan hefðbundins vinnutíma og fjölbreyttri verkefnavinnu. Kennarar eru bæði rannsakendur við HA og sérfræðinga úr atvinnulífinu.

Námið er skipulagt í stuttum lotum, 7 vikur í senn. Flest námskeið standa þannig yfir í 7 vikur, en tvö í 14 vikur.

Vormisserið skiptist í tvær stuttannar:

  • Fyrri stuttönn: 12. janúar – 27. febrúar
  • Seinni stuttönn: 2. mars – 24. apríl

Þau sem velja MM leiðina taka eingöngu námskeið, samtals 90 ECTS einingar og skrifa ekki lokaritgerð. Þú getur þó valið að taka 15 eininga lokaverkefni í stað tveggja valnámskeiða. Skyldunámskeið eru 37,5 einingar og valnámskeið 52,5. Öll námskeið í meistaranáminu eru 7,5 einingar.

Flest námskeið eru kennd á íslensku en einstöku námskeið á ensku. Námið er sett upp sem sveigjanlegt nám í samræmi við kennslustefnu Viðskiptadeildar. Námsmatið er fjölbreytt og í því felst meðal annars hópverkefni, einstaklingsverkefni, kynningar og próf.

Námið tilheyrir Heilbrigðis, viðskipta- og raunvísindasviði og er vistað í Viðskiptadeild.

Þú getur skoðað skipulag námsins í Uglu, kennsluvef háskólans.

Möguleikar að námi loknu

Meistaranám í stjórnun gerir nemendum kleift að velja úr fjölbreyttum stjórnunar- og sérfræðingsstöðum hjá fyrirtækjum, stofnunum og félagasamtökum, bæði innanlands og utan.

Inntökuskilyrði

Almenn krafa er að umsækjendur hafi lokið bakkalárgráðu við viðurkennda háskóla, að jafnaði með fyrstu einkunn. Einnig er litið til starfsreynslu tengdri stjórnun og rekstri við val á nemendum. Þeir sem lokið hafa bakkalárgráðu í öðru námi en viðskiptafræði eða sambærilegu námi gætu þurft að bæta við sig ákveðnum kjarnagreinum í grunnnámi viðskiptafræði, en slíkt er þó metið hverju sinni.

Umsagnir

Fjarnámið við Háskólann á Akureyri gaf mér tækifæri til að stunda meistaranám í stjórnun samhliða vinnu og fjölskyldulífi. Sveigjanleikinn var ómetanlegur og þótt námið hafi krafist bæði aga og skipulags, var það sannarlega vel þess virði. Kennararnir lögðu mikla áherslu á hagnýta nálgun sem gerði námið mjög gagnlegt. Þekkingin sem ég öðlaðist hefur nú þegar nýst mér í starfi. Í náminu hef ég einnig byggt upp gott tengslanet og vináttu sem nýtist bæði í starfi og í einkalífinu. Ég mæli eindregið með þessu námi fyrir þá sem vilja samþætta nám við daglegt líf.

Einhildur Ýr
Markaðsstjóri Cosmetics ehf.