Sálfræði fæst við nokkrar af áhugaverðustu og mikilvægustu spurningum vísindanna. Allt frá skynjun, námi og ákvarðanatöku til þroska, félagslegra samskipta, geðheilsu og tengsla heilastarfsemi og hegðunar. Með fjölbreyttri nálgun og mismunandi rannsóknaraðferðum leitast sálfræðin við að skilja hvernig fólk hugsar, upplifir og hegðar sér við ólíkar aðstæður og á mismunandi skeiðum lífsins.
Kennsla og rannsóknir innan Sálfræðideildar ná til helstu sviða sálfræðinnar. Þar á meðal félagssálfræði, hugrænnar sálfræði, þroskasálfræði, klínískrar sálfræði, taugasálfræði og íþróttasálfræði. Þessi fjölbreyttu svið eiga öll sameiginlegt markmið, að skilja hvernig, hvenær og hvers vegna fólk hugsar, upplifir og hegðar sér eins og það gerir.
Nám við Sálfræðideild er hannað með aðgengi stúdenta um allt land í huga og er kennt með staðlotum á Akureyri. Hvert sem markmið þitt er, að stunda rannsóknir, starfa á vettvangi sálfræðinnar eða öðlast dýpri vísindalegan skilning á fólki, þá bjóðum við öll hjartanlega velkomin í Sálfræðideild HA.