MS gráða í stjórnun er 90 eininga meistaranám þar sem nemendur ljúka 60 ECTS einingum í námskeiðum og MS ritgerð (30 ECTS einingar). Námið hentar sérstaklega þeim sem vilja efla hæfni sína í stjórnun og leiðtogastörfum samhliða starfi.

Markmið námsins er að þú öðlist þekkingu og hæfni til stjórnunar fyrirtækja, stofnana og félagasamtaka, hvort sem þú gegnir slíku hlutverki í dag eða stefnir á það í framtíðinni.

Er námið fyrir þig?

  • Hefur þú áhuga á stjórnun skipulagsheilda?
  • Hefur þú áhuga á samskiptum og leiðtoghæfni?
  • Viltu öðlast dýpri þekkingu á stjórnun og stjórnunarháttum?
  • Viltu öðlast dýpri sýn á hlutverk og ábyrgð stjórnenda á vinnustaðnum?
  • Viltu verða hæfari í að mæta ólíkum þörfum á vinnustaðnum?
  • Viltu tileinka þér öguð og sjálfstæð vinnubrögð
  • Viltu auka fræðilega þekkingu þína á málefnum tengdum stjórnun eða stjórnarháttum?

Áherslur námsins

Með námi í stjórnun öðlast þú dýpri skilning á farsælli stjórnun, forystu og samskiptum. Þú kynnist einnig lykilþáttum í nútímalegri stjórnun, eins og gervigreind, verkefnastjórnun, mannauðsstjórnun, sjálfbærni, nýsköpun, stefnumótun og breytinga- og krísustjórnun.

Í náminu byggir þú upp trausta þekkingu og hagnýta færni í stjórnun. Þú lærir að rökstyðja ákvarðanir og tengja fræðin við raunveruleg verkefni.

Þú öðlast færni til að greina upplýsingar, takast á við flókin viðfangsefni og nýta rannsóknir, aðferðir og viðeigandi tækni til að þróa og leysa verkefni.

Í lok námsins getur þú skipulagt og leitt verkefni, sjálfstætt eða með öðrum, og miðlað niðurstöðum á skýran hátt.

Fyrirkomulag námsins

Námið er 1,5 ár í fullu námi. Þú getur valið að taka námið á lengri tíma. Kennsla fer fram á netinu með fyrirlestrum í upptöku, umræðutímum utan hefðbundins vinnutíma og fjölbreyttri verkefnavinnu. Kennarar eru bæði rannsakendur við HA og sérfræðingar úr atvinnulífinu.

Námið er skipulagt í stuttum lotum, 7 vikur í senn. Flest námskeið standa þannig yfir í 7 vikur, en tvö í 14 vikur.

Vormisserið skiptist í tvær stuttannar:

  • Fyrri stuttönn: 12. janúar – 27. febrúar
  • Seinni stuttönn: 2. mars – 24. apríl

Þau sem velja MS leiðina taka 60 ECTS einingar í námskeiðum og skrifa 30 ECTS eininga lokaritgerð. Skyldunámskeið eru 45 einingar og valnámskeið 15. Öll námskeið í meistaranáminu eru 7,5 einingar. Þú getur tekið valnámskeið við háskóla sem HA hefur samstarfssamninga við.

Flest námskeið eru kennd á íslensku en einstök námskeið á ensku. Námið er sett upp sem sveigjanlegt nám í samræmi við kennslustefnu Viðskiptadeildar. Námsmatið er fjölbreytt og í því felst meðal annars hópverkefni, einstaklingsverkefni, kynningar og próf.

Námið tilheyrir Heilbrigðis-, viðskipta- og raunvísindasviði og er vistað í Viðskiptadeild.

Þú getur skoðað skipulag námsins í Uglu, kennsluvef háskólans.

Möguleikar að námi loknu

Meistaranám í stjórnun gerir stúdentum kleift að velja úr fjölbreyttum stjórnunar- og sérfræðingsstöðum hjá fyrirtækjum, stofnunum og félagasamtökum, bæði innanlands og utan. 

Þín bíða tækifæri í rannsóknum og nýsköpun. MS gráða gefur tækifæri til doktorsnáms.

Inntökuskilyrði

Almenn krafa er að umsækjendur hafi lokið bakkalárgráðu við viðurkennda háskóla, að jafnaði með fyrstu einkunn. Einnig er litið til starfsreynslu tengdri stjórnun og rekstri við val á stúdentum. Ef til þess kemur að grípa þurfi til aðgangstakmarkana verður horft til einkunna og starfsreynslu.

Umsagnir

Það var mikil lukka fyrir mig að komast í MS nám í Stjórnun hjá Háskólanum á Akureyri. Ég var að leita að námi sem væri eingöngu kennt í fjarnámi þar sem vinna mín er þannig að ég kemst ekki í hefðbundna kennslu, hvorki á virkum dögum né um helgar. Námið er fjölbreytt og hefur nýst mér strax þar sem ég gat valið fög sem tengjast minni vinnu. Þannig hef ég öðlast dýpri skilning á námsefninu og getað miðlað þekkingu minni áfram. Kennarar tala á mannamáli og koma með fjölbreytt verkefni sem halda manni ferskum í verkefnavinnunni, hlusta á gagnrýni og koma með lausnir ef við á. Klárlega nám sem ég mæli með.

Sverrir Bergmann Magnússon
Söngvari, bæjarfulltrúi, formaður Menntaráðs og varaformaður Menningar- og þjónusturáðs Reykjanesbæjar