Skiptinám

Allir stúdentar eiga kost á að taka hluta af námi sínu við erlenda samstarfsháskóla.

  • Þú velur á milli eins eða tveggja missera náms
  • Stúdentar á heilbrigðisvísindasviði geta tekið hluta klíníska námsins í skiptinámi
  • Í boði eru háskólar í gegnum Erasmus+ og Nordplus
  • Háskólar á norðlægum slóðum í gegnum North2North
  • Háskólar utan Evrópu

Almennt um skiptinám

Hvert er hægt að fara?

Í gagnagrunni yfir samstarfsskóla HA getur þú fengið upplýsingar um þá möguleika sem eru í boði.

Hér finnur þú samstarfsskóla HA

Hvað kostar skiptinámið?

Þú færð niðurfellingu á skólagjöldum gestaskólans og greiðir eingöngu innritunargjald í HA.

  • Þú greiðir fyrir húsnæði, fæði, bókakostnað og annað sem til fellur
  • Gestaskólinn veitir aðstoð við að útvega húsnæðið auk annarrar almennrar aðstoðar
  • Í Erasmus+ og Nordplus er möguleiki á dvalar- og ferðakostaði upp að vissu marki

Hverjir eru kostirnir við að fara í skiptinám?

  • Þú getur fengið námið metið inn í þitt nám við HA
  • Þú eykur færni þína í tungumálakunnáttu
  • Færð reynslu af nýju skólakerfi
  • Lærir að þekkja menningu, siði og venjur annarrar þjóðar
  • Byggir upp fjölþjóðlegt tengslanet
  • Færð reynslu sem nýtist í atvinnulífinu að námi loknu

Hver eru skilyrðin fyrir því að geta farið í skiptinám?

  • Þú þarft að hafa lokið 60 ECTS einingum í viðkomandi námi. Stúdentar í hjúkrunarfræði þurfa að hafa lokið tveimur námsárum.
  • Þú þarft að fara út í fullu samstarfi við þína deild.

Þurfi að velja á milli stúdenta sem sótt hafa um sama skóla gilda eftirfarandi reglur:

  1. Gildar umsóknir sem berast fyrir auglýstan umsóknarfrest hafa forgang. Umsókn telst ekki gild fyrr en öll fylgigögn hafa borist.
  2. Meistaranemar njóta forgangs umfram grunnnema nema ákvæði viðkomandi samstarfssamnings kveði á um annað.
  3. Ef umsækjendur eru á sama námsstigi gildir eftirfarandi:
    1. Ef munar minna en 30 ECTS á loknum einingum ráða einkunnayfirlit og árangursröðun úrslitum. Ef einkunnir eru sambærilegar skal varpa hlutkesti milli stúdenta í viðurvist votta.
    2. Ef munar meira en 30 ECTS á loknum einingum ráða einkunnayfirlit og árangursröðun einungis úrslitum ef munur á meðaleinkunn milli stúdenta er einn heill eða meira (t.d. annar með 6.5 og hinn með 8.0). Ef einkunnir eru sambærilegar skal varpa hlutkesti milli stúdenta í viðurvist votta.

Er umsóknarfrestur?

Já, umsóknarfrestur fyrir skiptinám er 1. mars fyrir haustönn og 1. nóvember fyrir vorönn.

Hvernig sæki ég um skiptinám?

1. Veldu gestaskóla

Kynntu þér skiptinám í gegnum efnið hér að ofan og hafðu samband við Miðstöð alþjóðasamskipta ef þú þarft frekari upplýsingar.

Veldu gestaskóla sem þú hefur áhuga á og skoðaðu vel hvaða námskeið eru í boði fyrir skiptinema þar.

Mundu að umsóknarfrestur fyrir skiptinám er:

  • 1. mars fyrir haustönn
  • 1. nóvember fyrir vorönn

2. Fylltu út umsókn í Uglu

Þú sækir um skiptinám í Uglu: Uglan mín > Umsókn um skiptinám

Þegar þú sækir um skiptinám í Uglu er sjálfkrafa sótt um styrki ef samstarfsskólinn tengist HA í gegnum Erasmus+ eða Nordplus.

Við hvetjum þig einnig til að sækja um inngildingarstyrk til viðbótar við hefðbundinn dvalarstyrk.

Inngildingarstyrkur á við um:

  • stúdenta búsetta á landsbyggðinni
  • stúdenta með efnahagslegar hindranir
  • stúdenta sem eru innflytjendur eða börn innflytjenda
  • stúdenta með stöðu flóttafólks
  • stúdenta sem glíma eða hafa glímt við alvarleg veikindi, langvarandi veikindi eða andlegar áskoranir
  • stúdenta með líkamlega fötlun, þroskafrávik, sjón-/heyrnarskerðingu eða námshamlanir
  • stúdenta með börn undir 18 ára

Sjá nánari upplýsingar um inngildingarstyrki á vefsíðu Rannís

 

3. Fylltu út námssamning

Í námssamningum (learning agreement) eiga að koma fram:

  1. Námskeið sem þú ætlar að taka við gestaskólann (ef kennsluskráin fyrir næsta skólaár er ekki tilbúin þá miðar þú við núverandi kennsluskrá)
  2. Námskeið sem þú færð metin við HA

Notaðu námssaming sem passar skólanum sem þú valdir:

Undirritun námssamnigsins:

Hafðu samband við verkefnastjóra námsbrautarinnar þinnar hér í HA til að yfirfara og undirrita námssamninginn. Í sumum deildum fer skjalið til matsnefndar. 

Þú sendir svo undirritað eintak á:  international@unak.is

Skilafrestur:

  • 1. maí fyrir haustmisseri
  • 15. nóvember fyrir vormisseri

4. Kláraðu umsóknarferlið hjá gestaskólanum

Þú þarft að sækja formlega um við gestaskólann. 

Fyrst tilnefnir Miðstöð alþjóðasamskipta þig sem skiptinema til gestaskólans. Í kjölfarið færðu leiðbeiningar frá gestaskólanum um umsóknarferlið hjá sér.
Miðstöð aðþjóðasamskitpa aðstoðar við umsókn og útvegar nauðsynleg fylgigögn frá HA.

Atriði sem þarf að ganga frá:

  • Senda samþykkisbréf frá gestaskóla á Miðstöð alþjóðasamskipta HA
  • Ganga frá styrksamningi (ef við á)
  • Undirritun á námssamningi frá gestaskóla

5. Gakktu frá árlegri skráningu við HA

Skiptinemar frá HA þurfa að vera skráðir hjá Háskólanum á Akureyri meðan á skiptinámi stendur.

Mundu að:

  1. Skrá þig í Uglu fyrir næsta skólaár
  2. Greiða skrásetningargjaldið

 

Ertu með frekari spurningar varðandi skiptinám? Hafðu samband við okkur hjá Miðstöð Alþjóðasamskipta.

Tímabókun

  • Þú getur bókað fund á bókunarvefnum okkar
  • Við getum hist á skrifstofunni okkar eða í Teams
  • Miðstöð alþjóðasamskipta er staðsett á Sólborg í O115, sjá kort

Bóka fund

Erasmus+

Erasmus+ er menntaáætlun Evrópusambandsins. Háskólinn á Akureyri hefur verið virkur þátttakandi í Erasmus samstarfi um árabil.