Starfstengt meistaranám í iðjuþjálfun er næsta skref fyrir þau sem vilja starfa sem löggiltir iðjuþjálfar. Námið veitir starfsleyfi frá Embætti landlæknis og undirbýr þig markvisst fyrir faglegt starf með einstaklingum, hópum og samfélögum.
Með 800 stundum á vettvangi og sérhæfðri þjálfun öðlast þú hæfni og sjálfstraust til að hefja störf sem iðjuþjálfi á Íslandi eða erlendis.
Háskólinn á Akureyri er eini háskólinn á Íslandi sem býður upp á starfsréttindanám í iðjuþjálfun.
Einnig í boði:
Markmið námsins er að þú verðir sérfræðingur í daglegri iðju og í að vinna með iðjuvanda sem hamlar fólki í daglegu lífi, hindrar þátttöku og hefur áhrif á heilsu og lífsgæði.
Vettvangsnám er stór og mikilvægur hluti námsins og nemur samtals 800 klukkustundum í fjölbreyttu starfsumhverfi iðjuþjálfa. Þar tekst þú á við raunveruleg viðfangsefni undir leiðsögn reyndra iðjuþjálfa og færð markvissa þjálfun fyrir starf iðjuþjálfa.
Þú hefur einnig kost á að stunda hluta af vettvangsnáminu við erlendar samstarfsstofnanir.
Meistaranámið er krefjandi og krefst aga og skipulagðra vinnubragða.
Fræðilegur hluti námsins fer að hluta til fram rafrænt, en námið hefur ekki sama sveigjanleika og grunnnámið þar sem vettvangsnámið fer að jafnaði fram á hefðbundnum dagvinnutíma. Auk þess er skyldumæting í lotur þar sem lögð er áhersla á þjálfun í faglegri færni í starfi iðjuþjálfa.
Stúdentar fá ekki laun í vettvangsnámi þar sem um nám undir handleiðslu er að ræða, ekki starf. Þú getur þó valið að vera í hlutanámi, sem getur skapað svigrúm ef þú hyggst vinna samhliða námi.
Hægt er að óska eftir vettvangsnámi í heimabyggð, en staðsetning ræðst af framboði og aðstæðum hverju sinni.
Að námi loknu getur þú sótt um leyfi frá Embætti landlæknis til að starfa sem iðjuþjálfi á Íslandi.
Iðjuþjálfar starfa á breiðum vettvangi, meðal annars:
Iðjuþjálfar eru ein af lykilstéttum innan forvarna, vinnuverndar og endurhæfingar.
Alþjóðleg viðurkenning námsins veitir einnig tækifæri til starfa og frekara náms erlendis.
Nánar má lesa um iðjuþjálfun á heimasíðu Iðjuþjálfafélags Íslands.
Inntökuskilyrði er BS-gráða í iðjuþjálfunarfræði frá Háskólanum á Akureyri með að lágmarki 7,25 í meðaleinkunn. Auk þess getur umsögn vinnuveitanda getur haft áhrif á inntöku.
Ef fjöldi umsækjenda sem uppfylla skilyrði er meiri en unnt er að taka inn verður umsóknum forgangsraðað út frá lokaeinkunn grunngráðu.
Fjöldi stúdenta ræðst árlega af aðstöðu og framboði vettvangsplássa. Því getur inntaka verið breytileg milli ára en leitast er við að bjóða flestum áframhaldandi nám.
Stúdentar í iðjuþjálfun á meistarastigi eiga kost á að taka hluta af vettvangsnámi sínu við erlendar samstarfsstofnanir. Þú getur smellt hér og lesið meira um skiptinám.
Námið í iðjuþjálfun var ótrúlega gagnlegt og undirbjó mig á fjölbreytta vegu fyrir atvinnulífið en var ekki síður mótandi persónulega. Ég upplifi starfsfmöguleika mína einungis takmarkast við áhugasvið mitt með menntunina í farteskinu
Ég hafði verið í háskólanámi áður og unnið við allt milli himins og jarðar. Að þeirri reynslu fenginni þá veit ég að það er vandfundið háskólanám sem er jafn gagnlegt og opnar jafnmargar dyr í lífinu, bæði í leik og starfi, og iðjuþjálfun. Ég er stolt af að vera iðjuþjálfi og þakklát fyrir að hafa fattað að hún er til.
Námskeiðið snýst um að efla fagþroska og vitund nemenda um eigin stöðu, hlutverk og ábyrgð sem verðandi iðjuþjálfi. Skoðaðar eru kenningar og rannsóknir á fagímynd og fagmennsku á sama tíma og áhersla er lögð á að nemendur styrki sig í faglegu starfi og verði meðvitaðir um samspil eigin fagsjálfs og einkasjálfs. Nemendur ígrunda eigin rökleiðsluleiðir og rýna í mismunandi þjónustuaðstæður og vinnubrögð sem þeir kynnast á vettvangi.
Markmið námskeiðsins er að veita greinargóða þekkingu og innsæi í áhrif velferðartækni og hjálpartækja á færni og þátttöku fólks. Lögð er áhersla á notendamiðaða nálgun og aðferðir til að auka möguleika fólks til þátttöku á ýmsum sviðum lífsins. Nemendur æfa sig í að greina þörf fyrir velferðartækni og hjálpartæki til að fyrirbyggja eða mæta færniskerðingu, ásamt því að velja og aðlaga búnað og umhverfi. Í námskeiðinu eru 24 stundir í verknámi.
Meginviðfangsefni námskeiðsins er endurhæfing sem þverfaglegt úrræði í heilbrigðisþjónustu. Með því að samþætta þekkingu og reynslu fleiri heilbrigðisstétta öðlast nemendur innsýn í heildræna og þverfaglega endurhæfingu sem hefur hámarksgæði og árangur að leiðarljósi. Áhersla er á hlutverk endurhæfingar í að efla einstaklinga á öllum sviðum og auka þátttöku þeirra og lífsgæði. Fjallað er um sögu og hugmyndafræði endurhæfingar og samspil heilsu og færni í víðu samhengi. Endurhæfingarferlið og aðlögunar- og bataferli skjólstæðinga eru skoðuð með gagnrýnu hugarfari sem og hlutverk fagfólks, skjólstæðinga og aðstandenda í því samhengi. Þá er fjallað um áhrif endurhæfingar á samfélagið og leiðir sem stuðla að skilvirkari og árangursríkari endurhæfingarþjónustu.
Valnámskeiðið þarf nemandi að velja í samráði við umsjónaraðila námsleiðarinnar. Námskeiðið þarf að vera á meistarastigi og vera kennt í háskólum.
Þetta er síðasta námskeiðið af þremur um þjónustu iðjuþjálfa og lokaatriðið í undirbúningi nemanda til að öðlast starfsréttindi sem iðjuþjálfi. Eins og í fyrri þjónustunámskeiðum fer námið fram bæði innan og utan skólans, en 355 tíma vettvangsnám er hluti af námskeiðinu ásamt bóklegu námi (2 ECTS einingar). Meginviðfangsefni nemenda er enn þjónusta við ákveðinn aldurshóp (þ.e. börn/ungmenni, fullorðnir eða aldraðir) og þeir þjálfa sig nú í ólíkum matsaðferðum og þjónustuleiðum fyrir síðasta hópinn, eftir því hvaða reynslu þeir hafa fengið í undanfarandi þjónustunámskeiðum. Lausnamiðuðum námsaðferðum (PBL) um þjónustu við markhópinn er áfram beitt, en í þetta sinn með viðbótaráherslu á leiðir til að rýna í og hafa áhrif á þjónustuumhverfið í víðum skilningi. Á vettvangi fá nemendur úthlutað leiðbeinanda sem er starfandi iðjuþjálfi á staðnum auk þess sem þeir taka þátt í handleiðsluhóp sem er stýrt af kennara með sérþekkingu á þjónustu við viðkomandi aldurshóp. Í lok vettvangstímabils taka nemendur að mestu ábyrgð á þjónustunni sem þeir veita og faglegum samskiptum við skjólstæðinga sína, samstarfsfólk og aðra hagsmunaaðila. Námskeiðinu lýkur með munnlegu prófi þar sem nemandi gerir grein fyrir og ræðir þjónustu sína við ákveðinn skjólstæðing (einstakling, hóp eða samfélag) í faglegu samhengi.
Nemendur velja námskeið í samráði við brautarstjóra/verkefnastjóra iðjuþjálfunarfræðideildar.
Þetta námskeið fjallar um umbreytandi möguleika gagnrýninna iðjuvísinda til að ögra hefðbundnum hugmyndum um iðju, greina valdatengsl og skoða víðtækari samfélagsleg, menningarleg, pólitísk og efnahagsleg áhrif á þátttöku, inngildingu og daglegar athafnir fólks í norrænu samhengi. Með áherslu á samspil iðju og sérkenna norrænna samfélaga – þar á meðal jöfnuð, sjálfbærni og vellíðan – er iðja sett í samhengi við flókin kerfi mótuð af valdi, forréttindum og jaðarsetningu.
Nemendur munu greina á gagnrýninn hátt hvernig kerfislægur ójöfnuður og samfélagsgerð hafa áhrif á tækifæri til iðju, sérstaklega hjá jaðarsettum hópum, og íhuga gildi, viðhorf og starfshætti eigin fagsviðs. Með þverfaglegum kenningum og upplýsingum byggðum á reynslu fólks, s.s. þjónustunotenda, er námskeiðinu ætlað að stuðla að fagþróun með því að hjálpa nemendum að skilja sín hlutverk og ábyrgð í að skapa þjónustu sem er inngildandi og ýtir undir jöfn tækifæri til iðju. Þannig læra nemendur að takast á við áskoranir tengdar heilsu og sjálfbærni og beita sér fyrir þátttöku allra á Norðurslóðum.
Námskeiðið er ætlað nemendum og fagfólki í heilbrigðisvísindum, félagsvísindum og skyldum greinum. Nemendur munu kanna nýjar leiðir til að samþætta gagnrýnin sjónarhorn og þátttöku notenda/skjólstæðinga í störf þeirra og stuðla þannig að kerfum sem ýta undir sjálfbærni og jöfn tækifæri.
Bergþóra er verkefnastjóri fyrir hjúkrunarfræði og iðjuþjálfunarfræði. Hún tekur vel á móti þér og öllum þeim fyrirspurnum sem þú kannt að hafa til hennar. Meira um Bergþóru.