Tugir sóttu vinnustofu varðandi málefni norðurslóða

Þann 15. janúar hélt Norðurslóðamiðstöð Íslands vinnustofu um gerð tillagna að málstofum fyrir Arctic Circle Assembly. Stúdentar og starfsfólk tóku þátt í tveggja tíma vinnustofu þar sem áherslan var á að ræða mögulegar hugmyndir að málstofum fyrir Arctic Circle og efla færni í gerð tillagna.

Næstum 30 þátttakendur tóku þátt í vinnustofunni þar sem fjallað var um fjölbreytt málefni norðurslóða þvert á fræðasvið HA. Þátttakendur unnu saman í hópum, skoðuðu þverfagleg sjónarhorn, fengu leiðsögn við mótun tillagna, og kynntu hugmyndir sínar í lok vinnustofunnar. Skipuleggjendur og þátttakendur náðu að skapa stuðningsríkt umhverfi þar sem þátttakendur gátu rætt sín á milli, deilt hugmyndum og öðlast meira sjálfstraust í að þróa áhugaverðar málstofur.

Norðurslóðamiðstöð Íslands mun áfram styðja þá sem hyggjast senda inn tillögur að málstofum á Arctic Circle Assembly með því að bjóða upp á handleiðslu við frekari þróun hugmynda.