Viltu læra tölvunarfræði á Austurlandi í sveigjanlegu námsumhverfi?

Tölvunarfræði á Austurlandi er þriggja ára BS-nám sem þú stundar á Reyðarfirði. Námið er samstarfsverkefni HA, HR og Austurbrúar og sameinar öflugt námsefni og persónulegan stuðning á staðnum.

Þú fylgist með fyrirlestrum á netinu þegar þér hentar og mætir reglulega í verkefnatíma í Fróðleiksmolanum þar sem þú vinnur með samnemendum og færð leiðsögn. Þannig færðu bæði sveigjanleika og sterkt námssamfélag.

Á Reyðarfirði er einnig í boði tveggja ára diplómagráða.

Er námið fyrir þig?

  • Hefur þú áhuga á að búa til tölvuleiki?
  • Vilt þú hanna og smíða hugbúnað?
  • Eru stór gagnasöfn og flókin netkerfi málið?
  • Langar þig til að kóða vefsíður?
  • Finnst þér sýndarveruleiki áhugaverður?
  • Er gervigreind heillandi?

Áherslur námsins

Í tölvunarfræði er lögð áhersla á að byggja upp sterka undirstöðu í forritun og helstu kjarnasviðum greinarinnar. Markmiðið er að þú öðlist bæði fræðilega dýpt og hagnýta færni sem nýtist í fjölbreyttum verkefnum.

Helstu áherslur eru:

  • Forritun og hugbúnaðarþróun
  • Hugbúnaðarhönnun og kerfisgreining
  • Stýrikerfi og netkerfi
  • Gagnasöfn og gagnavinnsla
  • Lausnamiðuð hugsun og verkefnavinna

Þú getur valið um tvær námslínur:

  • Almenn tölvunarfræði
  • Tölvunarfræði með viðskiptafræði sem aukagrein

Í náminu er lögð áhersla á jafnvægi milli fræðilegrar undirstöðu og hagnýtrar þekkingar á nýjustu tækni og aðferðum.

Námið er skipulagt sem fullt nám og tekur þrjú ár til BS-gráðu.

Þú getur smellt hér og lesið meira um skipulag námsins á vef Háskólans í Reykjavík eða skoðað námslínurnar hér (pdf).

Fyrirkomulag námsins

Námið er þriggja ára fullt nám (180 ECTS).

Námið er skipulagt með sveigjanleika að leiðarljósi. Flestir fyrirlestrar eru teknir upp og aðgengilegir á kennsluvef. Þú getur því horft á þá hvar og hvenær sem þér hentar.

Kjarni námsins á Austurlandi er verkefnatímar á Reyðarfirði þar sem verkefnastjóri styður nemendur í náminu. Þar gefst tækifæri til að hitta samnemendur, kennara og starfsfólk og byggja upp sterkt námssamfélag.

Þú skráir þig í námið hjá HR og greiðir skólagjöld samkvæmt gjaldskrá HR.

Athugið að fullt háskólanám jafngildir að jafnaði 50–60 stunda vinnuviku.

Möguleikar að námi loknu

BS-gráða í tölvunarfræði veitir traustan grunn fyrir fjölbreytt störf og frekara nám, bæði hérlendis og erlendis.

Tölvunarfræðingar eru eftirsóttir starfskraftar og starfa meðal annars við:

  • hugbúnaðarþróun
  • gagnavinnslu og gagnagreiningu
  • net- og kerfisstjórnun
  • nýsköpun og tæknifyrirtæki
  • rannsóknir og þróun

Námið opnar einnig leiðir inn í rannsóknar- og nýsköpunarverkefni í samstarfi við innlend og erlend fyrirtæki og rannsóknastofnanir.

Tölvunarfræði tengist fjölmörgum öðrum fræðigreinum, svo sem stærðfræði, verkfræði, sálfræði, lífupplýsingafræði og viðskiptafræði.

Félagslífið

Félagslíf er mikilvægur þáttur háskólanáms og er félagslíf nemenda við HA öflugt.

Allir stúdentar við háskólann eru í Stúdentafélagi Háskólans á Akureyri (SHA) en einnig er hver deild með sitt nemendafélag. Data er félag tölvunarfræðinema við HA og þú getur nálgast nánari upplýsingar um félagið á Facebook. 

Inntökuskilyrði

Almenn krafa er að umsækjandi hafi lokið stúdentsprófi eða sambærilegu prófi.

Hér getur þú lesið meira um inntökuskilyrði Háskólans í Reykjavík. 

Skiptinám

Stúdentar eiga kost á að taka hluta af námi sínu við erlenda samstarfsháskóla. Alþjóðaskrifstofa HR aðstoðar þig við að sækja um námið, húsnæði og nemendastyrk.

Þú getur smellt hér og lesið meira um skiptinám HR. 

Sækja um

Þú skráir þig í námið hjá Háskólans í Reykjavík og greiðir skólagjöld samkvæmt gjaldskrá HR.

Sótt er um námið á umsóknarvef HR. Við umsókn skal velja „HA“ valkostinn.

Fara á umsóknarvef HR