Er kynjamunur í þátttöku fullorðinna barna í umönnun mæðra?

Doktorsverkefni Mariu ber titilinn „Þátttaka, stuðnings- og fræðsluþarfir fullorðinna barna við umönnun mæðra á hjúkrunarheimilum“. Fullorðin börn, ásamt mökum, gegna lykilhlutverki í lífi íbúa á hjúkrunarheimilum. Þó að bæði dætur og synir taki þátt í umönnun virðast þarfir þeirra oft vera mismunandi og stuðningur frá heilbrigðisstarfsfólki getur verið af skornum skammti. Meginmarkmið doktorsverkefnisins er að kanna hvort kynjamunur komi fram í þátttöku fullorðinna barna í umönnun mæðra sinna á hjúkrunarheimilum og greina þarfir þeirra fyrir fræðslu og stuðning.

^{María Finster Úlfarsson gat ekki verið viðstödd en Sveinn Úlfarsson tók við styrknum fyrir hennar hönd sem Silja Bára R. Ómarsdóttirr, rektor Háskóla Íslands afhenti.} 

Verkefnið felur í sér þrjár rannsóknir: eigindlega rannsókn á reynslu sona af því að eiga móður á hjúkrunarheimili og hvernig þeir skilgreina þarfir sínar fyrir fræðslu og stuðning; þýðingu og staðfæringu matstækis sem metur þátttöku aðstandenda í umönnun ástvina á hjúkrunarheimili en tækið hefur hingað til skort á Íslandi; og þversniðsrannsókn þar sem þátttaka sona og dætra í umönnun mæðra er metin ásamt þörfum þeirra fyrir fræðslu og stuðning. Engin megindleg rannsókn hefur áður verið gerð um þetta efni hér á landi og þekking á kynjamun í þátttöku aðstandenda íbúa á hjúkrunarheimilum er almennt takmörkuð.

Leiðbeinendur Mariu eru Kristín Þórarinsdóttir, dósent við Háskólann á Akureyri, og Margrét Hrönn Svavarsdóttir, prófessor við sama skóla. Í doktorsnefndinni sitja einnig Anne Marie Mork Rokstad frá Háskólanum í Molde í Noregi og Kristofer Årestedt frá Linneaus-háskólanum í Svíþjóð.