Fyrsti doktorinn útskrifast úr Hjúkrunarfræði

Föstudaginn 14. nóvember varði Dr. Elín Arnardóttir doktorsritgerð sína í Hjúkrunarfræði við Háskólann á Akureyri. Verkefni Elínar ber heitið “Tíðni forstigseinkenna sykursýki af tegund 2 og notkun fyrirbyggjandi nálgana í heilsugæslu.“ Elín er fyrst til þess að ljúka doktorsnámi sínu í Hjúkrunarfræði síðan að háskólinn fékk til þess heimild árið 2017. 

^{Elín Arnardóttir ver ritgerðina}

„Uppbygging doktorsnáms við háskólann hefur verið mikil og við erum stolt af því að geta boðið upp á doktorsnám á níu fræðasviðum. Mig langar að óska Elínu Arnardóttur til hamingju með að vera orðin doktor í hjúkrunarfræði og óska henni velfarnaðar í hennar störfum.“ Segir Hafdís Skúladóttir, forseti Hjúkrunarfræðideildar.

^{Hafdís og Elín fagna að vörn lokinni}

Ritgerðin var unnin undir leiðsögn dr. Árúnar K. Sigurðardóttur, prófessors við Hjúkrunarfræðideild Háskólans á Akureyri. Auk hennar voru í doktorsnefnd dr. Marit Graue prófessor við HVL rannsóknarháskólann í Bergen í Noregi, dr. Timothy Skinner prófessor við Kaupmannahafnarháskóla og miðstöðina fyrir atferlisrannsóknir á sykursýki í Melbourne í Ástralíu og dr. Beate-Christin Hope Kolltveit dósent við HVL rannsóknarháskólann í Bergen í Noregi.