60 nýir kollegar

Sæunn lauk á dögunum tveggja mánaða norrænum starfsfólksskiptum hjá Nordregio. Sæunn dvaldi í Stokkhólmi frá byrjun febrúar til byrjun apríl og starfaði á meðan hjá Nordregio.

„Ég er ótrúlega þakklát yfirmanni mínum hjá RHA fyrir að hafa stutt mig í að fara í þessi skipti og þakka fjármálaráðuneytinu fyrir að hafa fengið NORUT-styrkinn sem gerði þetta tækifæri að raunveruleika. Ég hlakka til að halda áfram að vera í góðum tengslum við kollegana hjá Nordregio við heimkomu og vonandi vinna saman að nýju rannsóknarverkefni,” segir Sæunn um skiptin.

Fundir, viðtöl, samfélagsmiðlar og spilakvöld

Sæunn tók þátt í tveimur verkefnum Nordregio á meðan á dvölinni stóð, Powering resilience: Tackling energy vulnerabilities to improve regional self-sufficiency og Unlocking local benefits from green transition. Þá sótti hún reglulega fundi starfsfólks og „call committee fund“ þar sem farið var yfir hvaða verkefnum stofnunin ætti að taka þátt í og hvaða rannsóknarstyrkjum hún ætti að sækjast eftir. Einnig aðstoðaði Sæunn við þýðingar yfir á íslensku á fréttatilkynningum í tengslum við State of the Nordic Region skýrsluna.

^{Svipmyndir frá Noregsdvölinni}

Sæunn hélt hádegisfyrirlestur þann 31. mars 2026 þar sem hún kynnti niðurstöður samnorrænnar NIKK-rannsóknar sem hún leiddi, Enhancing labour opportunities for Ukrainian women in rural Nordic communities. Vel var mætt á fyrirlesturinn og mikill áhugi á efninu og því urðu góðar umræður í kjölfar kynningarinnar. Þá fór hún í viðtal hjá Nordregio um starfsmannaskiptin og var með Instagram Story yfirtöku hjá Háskólanum á Akureyri 31. mars þar sem hún sagði frá skiptunum og lífinu í Stokkhólmi. Einnig fór hún í viðtal á Rás 1 hjá Gígju Hólmgeirsdóttur í þættinum Víðsvegar meðan á skiptunum stóð. Sæunn nýtti einnig tækifærið meðan á Svíþjóðardvölinni stóð og heimsótti norræna kollega í Falun í Dalarna 18. til 20. mars. Dalarna háskóli hefur verið samstarfsaðili okkar í NIKK-rannsókninni sem nefnd var hér að ofan.

Margir sérfræðingar hjá Nordregio flytja til Stokkhólms vegna vinnunnar og því er mikið gert til að efla félagslíf hjá stofnuninni. Nokkrir viðburðir fyrir starfsfólk fóru fram þegar Sæunn var í skiptunum, meðal annars spilakvöld og ljósmyndaklúbbur og tók hún þátt í skemmtilegri vínglasasmökkun eitt kvöldið með tæpum helmingi starfsfólks Nordregio.

Nordregio lykilstofnun í samvinnu varðandi skipulags- og byggðamál

Nordregio er norræn fræðastofnun í skipulags- og byggðamálum sem starfar á vegum Norrænu ráðherranefndarinnar. Hlutverk hennar er að stunda rannsóknir á sviði skipulags- og byggðamála auk þess að þróa og miðla þekkingu um byggða- og skipulagsmál til viðeigandi stofnana innan þessara málaflokka á Norðurlöndum. Hjá stofnuninni starfa tæplega 60 einstaklingar, þar af tveir Íslendingar.