Laust starf: Lektor í sálfræði

Háskólinn á Akureyri (Mynd: Auðunn Níelsson)

Háskólinn á Akureyri auglýsir lausa 100% stöðu lektors í sálfræði við Hug- og félagsvísindasvið.

Leitað er að sérfræðingi á hvaða sviði sálfræðinnar sem er, en þó sérstaklega á sviðum klínískrar- og/eða þroskasálfræði. Umsækjendur þurfa að hafa sterkan grunn í aðferðafræði rannsókna.

Miðað er við að viðkomandi geti hafið störf 1. desember 2019. Ráðningartími er tímabundinn til fimm ára en viðkomandi getur óskað eftir ótímabundinni ráðningu að þeim tíma liðnum samkvæmt reglum nr. 258/2016 um störf dómnefndar og ráðningar akademískra starfsmanna við Háskólann á Akureyri. Framgangur í stöðu dósents eða prófessors kemur til greina við ráðningu hafi umsækjandi hæfi til þess að mati dómnefndar.

Helstu verkefni eru kennsla og rannsóknir við Háskólann á Akureyri á fyrrgreindum sviðum sálfræðinnar. Næsti yfirmaður er deildarformaður sálfræðideildar. Starfsstöð er á Akureyri.

Allt grunnnám í sálfræði er kennt í sveigjanlegu námi (staðar- og fjarnámi). Við sálfræðideild háskólans eru um 330 nemendur og deildin er hluti af hug- og félagsvísindasviði skólans. Við sálfræðideild eru, meðal annars, stundaðar rannsóknir á sviðum taugavísinda, hugfræði, skynjunarsálfræði, atferlisgreiningar, sálmælinga, unglingarannsókna, auk þverfræðilegra rannsókna innan Háskólans á Akureyri og i alþjóðlegu samstarfi.

Menntunar- og hæfniskröfur

  • Umsækjandi skal hafa þekkingu og reynslu í samræmi við alþjóðleg viðmið fyrir viðkomandi starfsheiti á fræðasviðinu, staðfest með áliti dómnefndar eða með doktorsprófi frá viðurkenndum háskóla
  • Kennslureynsla á háskólastigi og reynsla af vísindastörfum eru nauðsyn
  • Umsækjandi skal sýna fram á hæfni til að kenna og stunda rannsóknir á einhverju af ofantöldum sviðum sálfræðinnar. Þekking á öðrum sviðum sálfræði er einnig æskileg
  • Starfsleyfi sálfræðings, útgefið af embætti landlæknis er kostur
  • Krafist er góðrar hæfni í mannlegum samskiptum og skipulagshæfni
  • Við mat á umsóknum er tekið mið af hversu vel viðkomandi uppfyllir kennslu- og rannsóknaþarfir hug- og félagsvísindasviðs
  • Gott vald á íslensku og ensku er nauðsynlegt

Umsókn skal fylgja

  • Greinargóð skýrsla um náms- og starfsferil, fræðistörf og kennslureynslu
  • Staðfest afrit af öllum viðeigandi prófskírteinum
  • Umsagnir um kennslu- og stjórnunarstörf umsækjanda eftir því sem við á
  • Tilnefna skal þrjá meðmælendur, æskilegt er að einn þeirra sé næsti yfirmaður í núverandi starfi eða fyrra starfi umsækjanda
  • Þær fræðilegu ritsmíðar sem umsækjandi telur sín bestu verk (allt að þremur ritum). Þegar fleiri en einn höfundur stendur að innsendu ritverki skal umsækjandi gera grein fyrir framlagi sínu til verksins
  • Þá skal umsækjandi gera grein fyrir áformum um rannsóknir ef til ráðningar kemur

Umsóknarfrestur er til og með 1. september 2019

Umsókn og fylgigögn skal senda á rafrænu formi á netfangið starfsumsokn@unak.is. Ekki er notað staðlað umsóknaeyðublað.

Laun eru skv. kjarasamningi Félags háskólakennara á Akureyri og fjármálaráðherra.

Meðferð umsókna, mat á hæfi umsækjenda og ráðning í starfið er í samræmi við ákvæði laga um háskóla nr. 63/2006, laga um opinbera háskóla nr. 85/2008, reglur fyrir Háskólann á Akureyri. nr. 387/2009 með áorðnum breytingum og reglur nr. 258/2016 um störf dómnefndar og ráðningar akademískra starfsmanna við Háskólann á Akureyri. Ófullnægjandi umsóknir eru ekki teknar til greina. Háskólinn á Akureyri áskilur sér rétt til að hafna öllum umsóknum. Öllum umsóknum verður svarað þegar ákvörðun um ráðningu í starfið hefur verið tekin.

Nánari upplýsingar

Elín Díanna Gunnarsdóttir, forseti hug- og félagsvísindasviðs, netfang edg@unak.is.

Háskólinn á Akureyri stuðlar að jafnrétti kynjanna og hvetur konur jafnt sem karla til að sækja um laus störf