Fréttir af IRIS upplýsingakerfi um rannsóknir

IRIS upplýsingakerfi opnaði um miðjan júní síðastliðinn og er nú aðgengilegt rannsakendum sem og almenningi.  

IRIS er upplýsingakerfi um rannsóknir á Íslandi. Kerfið safnar upplýsingum um rannsóknarverkefni og styrki sem og um allar rannsóknarafurðir rannsakenda við háskóla og rannsóknarstofnanir á Íslandi. IRIS veitir möguleikann á að sjá rannsóknir í samhengi við stofnanir og samstarf rannsakenda þeirra á milli.  

Virkir rannsakendur stofnana geta skráð sig inn til að skrá eigin upplýsingar og afurðir.  
Innskráning þjónar hagsmunum rannsakenda þannig að fólk getur haft áhrif á þá mynd sem kerfið gefur af rannsóknarstarfi þess.  

Rannsóknarþing Miðstöðvar doktorsnáms og vinnustofa í IRIS 

Rannsóknarþing Miðstöðvar doktorsnáms verður haldið þann 12. október næstkomandi frá kl. 8:30-12:00. Á þinginu heldur Sara Stef. Hildardóttir erindi um IRIS en hún er verkefnastjóri IRIS á landsvísu. Í framhaldinu eða fyrir hádegi þann 13. október er fyrirhugað að halda vinnustofu í IRIS. Upplýsingar um vinnustofuna og skráningu á hana verða sendar út tímanlega.  

Verkefnastjóri IRIS og umsjónarmaður innleiðingar í HA er Sigurbjörg Rún Jónsdóttir, verkefnastjóri á Miðstöð doktorsnáms og rannsókna.