Sjónhverfing skilvirkni: Hvernig þægindavæðing með gervigreind í menntakerfinu skapar vitræna skuld

Öll velkomin á opinn fyrirlestur! 

Hvernig breytir gervigreind því hvernig við lærum, kennum og hugsum? Í þessum opna fyrirlestri verður fjallað um áhrif gervigreindar á menntun og gagnrýna hugsun, og spurt hvort aukin skilvirkni í námi geti í raun grafið undan þeirri vitsmunalegu vinnu sem menntun byggir á.

Magnús Smári Smárason mun flytja erindið: Sjónhverfing skilvirkni: Hvernig þægindavæðing með gervigreind í menntakerfinu skapar vitræna skuld

• Viðburðurinn fer fram í stofu M101 
• Áhugasöm geta einnig fylgst með í streymi í gegnum Zoom hér

Um erindið

Markaðssetning gervigreindra lausna lofar iðulega að losa okkur undan „forminu“ svo við getum einbeitt okkur að „efninu“. Þetta er þekkingarfræðileg blekking sem þjónar framleiðnikröfum en svíkur menntunina.

Þegar við útvistum hugsun til mállíkana – hvort sem það er kennarinn við yfirferð eða nemandinn við textaskrif – fórnum við vitsmunalegum núningi, sem er helsti drifkraftur gagnrýnnar hugsunar. Við erum ekki að frelsa hugann, heldur byggja upp „vitræna skuld“ þar sem hæfni til sjálfstæðrar greiningar rýrnar stöðugt.

Ef skilvirkni kemur í stað nauðsynlegs núnings, hverja erum við þá að útskrifa? Framkvæmd menntunar á tímum gervigreindar má ekki verða auðveldari. Hún verður að vera krefjandi bæði fyrir nemendur og kennara, því aðeins þannig mótumst við sem manneskjur sem hugsa, ekki aðeins sem milliliðir á milli úttaks véla og raunveruleikans.

Um fyrirlesarann

Magnús Smári er verkefnastjóri á sviði gervigreindar við Háskólann á Akureyri. Erindið byggir á meistararitgerð hans, Beyond Fragmentation, þar sem hann setur fram gagnrýna, lífsgildamiðaða nálgun á stjórnarhætti gervigreindar og rýnir í hugtakið „vitræn skuld“ sem er einn af meginþráðum erindisins. Á heimasíðu sinni, smarason.is, miðlar hann nánar efni um rannsóknir sínar, hugbúnaðarsmíði og ábyrga stjórnarhætti gervigreindar.