Heilbrigðisvísindastofnun Háskólans á Akureyri

Reglur um akademísk hæfi og veitingu akademískra nafnbóta

HA og SAk hafa gert með sér samkomulag í tengslum við HHA þar sem starfsmönnum SAk gefst kostur á viðurkenningu á akademísku hæfi eða hljóta akademíska nafnbót.

Reglur um viðurkenningu HA á akademísku hæfi starfsmanna SAk og veitingu akademískrar nafnbótar við HHA nr. 287/2018

Reglur um Heilbrigðisvísindastofnun Háskólans á Akureyri

HHA er vísindaleg rannsóknastofnun sem til var stofnað með rammasamningi um samstarf milli Sjúkrahússins á Akureyri og Háskólans á Akureyri. Með samninginum vilja SAk og HA efla kennslu og rannsóknir í heilbrigðisvísindum með því að auka samstarf og gera þessa þætti í starfi stofnananna sýnilegri.

Reglur um Heilbrigðisvísindastofnun Háskólans á Akureyri nr. 202/2017, með breytingum

Rammasamningur um samstarf Sjúkrahússins á Akureyri og Háskólans á Akureyri 

Aðilar að þessum rammasamningi eru Sjúkrahúsið á Akureyri, kt. 580269-2229, Eyrarlandsvegi, 600 Akureyri, í samningi þessum nefnt SAk og Háskólinn á Akureyri, kt. 520687-1229, Sólborg, 600 Akureyri, í samningi þessum nefndur HA.

1 Tilgangur

SAk og HA vilja með samningi þessum styrkja samstarf stofnananna með því að efla enn frekar samstarf um rannsóknir, kennslu heilbrigðisstarfsfólks og annað samstarf stofnananna.

2 Stjórnun

2.1 Yfirstjórn

Yfirstjórn samstarfsins er í höndum stefnunefndar sem er skipuð tveimur fulltrúum frá hvorum samningsaðila. Frá SAk sitja í nefndinni, forstjóri og aðili útnefndur af forstjóra SAk. Frá HA sitja í nefndinni, rektor og forseti Heilbrigðis-, viðskipta- og raunvísindasviðs. Stofnanirnar skiptast á um formennsku í stefnunefndinni eitt ár í senn og skulu formannsskipti fara fram 1. september ár hvert.

Stefnunefnd fer með ákvörðunarvald í öllum málum sem samningur þessi fjallar um og hefur yfirumsjón með framgangi og þróun einstakra verkefna. Ef upp koma hugmyndir um ný samstarfsverkefni og/eða aukið samstarf skal fyrst leita til stefnunefndar en fulltrúar samningsaðila í henni koma málum síðan áfram innan sinnar stofnunnar. Stefnunefndin vinnur samkvæmt gildandi starfsreglum stefnunefndar SAk og HA.

2.2 Stjórn einstakra verkefna

Stefnunefnd getur falið aðilum innan stofnananna stjórn einstakra verkefna eða þátta samstarfsins.

3 Samstarfsverkefni

Verkefni sem samningsaðilar vinna nú þegar að og ætla að auka samvinnu um eru:

Að efla SAk sem rannsóknar- og kennslusjúkrahús með það að markmiði að SAk verði skilgreint sem háskólasjúkrahús, sbr. ákvæði laga nr. 40/2007 um heilbrigðisþjónustu.
Að stuðla að aukinni rannsóknasamvinnu milli SAk og allra deilda háskólans á öllum námstigum sem boðið er upp á.
Að hafa samstarf um upplýsinga- og bókasafnsþjónustu.
Að hafa samstarf um færni- og hermikennslu.
Að styrkja samstarf á sviði tölvu- og upplýsingatækniþjónustu.
Að standa að sameiginlegum málþingum og/eða ráðstefnum.
Stefnt skal að því að efla samstarf stofnananna um endur- og símenntun starfsfólks.
Stofnanirnar vinna saman að uppbyggingu sérfræðimenntunar heilbrigðisstétta.

3.1 Kennsla

SAk er kennslusjúkrahús skv. lögum nr. 40/2007 um heilbrigðisþjónustu. SAk lætur í té aðstöðu til klínísks-/vettvangsnáms í þeim greinum heilbrigðisvísinda sem á hverjum tíma eru kenndar við HA. Um ábyrgð, forsendur og framkvæmd einstakra þátta í samstarfi á þessu sviði er nánar fjallað í sérstöku samkomulagi þar um milli Heilbrigðis-, viðskipta- og raunvísindasviðs HA og SAk.

3.2 Rannsóknir

Birting vísindagreina eða annars afraksturs sameiginlegra rannsóknaverkefna, s.s. kynningar rannsóknaverkefna og útdrátta á ráðstefnum eða í fjölmiðlum, skal vera í nafni HA og SAk.

3.3 Heilbrigðisvísindastofnun HA og SAk

Heilbrigðisvísindastofnun Háskólans á Akureyri og Sjúkrahússins á Akureyri (HHSA) ("Institute of Health Science Research, University of Akureyri and Akureyri Hospital") er sameiginlegur vettvangur starfsfólks SAk og HA til eflingar rannsókna í heilbrigðisvísindum. Stofnunin er vettvangur rannsókna vísindafólks sem starfar utan SAk og HA, enda séu rannsóknir þeirra vistaðar við stofnunina og í samstarfi við aðila innan hennar. Sérstakar reglur gilda um HHSA sem stefnunefnd mótar en háskólaráð HA samþykkir sem hluta af reglum HA.

Starfsfólk SAk með aðalstarf á sjúkrahúsinu, sem einnig sinnir kennslu og rannsóknum, á rétt á að sækja um mat á hæfi til að hljóta akademíska nafnbót við HHSA í samræmi við gildandi reglur HA og HHSA.

Ákveðnum stöðum við SAk getur fylgt akademísk staða við HHSA, enda fari veiting hennar fram að undangengnu hæfismati og samkvæmt gildandi reglum HA.

Stefnt er að því að akademískir starfsmenn við HA geti sótt tímabundið um allt að 20% klínískt starf við SAk samkvæmt gildandi reglum HHSA. Stefnunefnd ákveður hversu margar akademískar stöður eru heimilar á hverjum tíma.

3.4 Upplýsinga- og bókasafnsþjónusta

Upplýsingaþjónusta og bókasafn Háskólans á Akureyri og Heilbrigðisvísindasafn SAk hafa með sér samráð og samstarf svo tryggt sé að hámarksnýting náist úr fjárveitingum, aðstöðu og safnkosti beggja aðila. Bókasöfnin skulu leitast við að hafa samráð um aðföng tímarita og aðgang að gagnasöfnum á sviði heilbrigðisvísinda og semja fyrirfram um kostnaðarskiptingu.

Upplýsingaþjónusta og bókasafn HA annast námskeiðahald fyrir starfsfólk SAk um notkun sérhæfðra gagnasafna á sviði heilbrigðisvísinda í sameiginlegum áskriftum og tengd málefni. Um greiðslu kostnaðar vegna slíkra námskeiða skal samið fyrirfram.

4 Ábyrgðarsvið

Hvor samningsaðili fyrir sig ber sjálfstæða ábyrgð á framkvæmd samningsins. Að því marki sem samið er um sameiginleg verkefni skal ábyrgðin vera sameiginleg.

5 Ráðning starfsfólks

Gert er ráð fyrir því sem meginreglu að hvor samningsaðili ráði starfsfólk til starfa með hefðbundnum hætti. Þó er gert ráð fyrir að ráðning geti orðið sameiginleg á grundvelli samnings þessa og einstakra verkefna sem aðilar ráðast í og verður þá gerður sérsamningur þar að lútandi.

6 Húsnæðismál

Báðir samningsaðilar leggja til húsnæði sitt til sameiginlegra verkefna án sérstakrar greiðslu nema um það sé samið sérstaklega vegna eðlis einstakra verkefna.

7 Tæki og búnaður

Báðir samningsaðilar leggja til tæki og búnað í sinni eigu til sameiginlegra verkefna án sérstakrar greiðslu. Gerðir verða sérstakir samningar þar sem við á. Þannig er gagnkvæmur vilji til að samnýta tæki og búnað SAk og HA. Komi til kaupa á búnaði vegna einstakra verkefna skal við það miðað að sá aðili sem vistar tækin og notar þau í daglegum rekstri sínum eigi og greiði tækin. Sé um sameiginleg not að ræða skulu aðilar semja um fjármögnun, eignarhald og ábyrgð á rekstri tækjanna áður en til verkefnisins er stofnað.

8 Kostnaður

Að því marki sem ekki er um annað samið greiðir hvor aðili fyrir sig sinn kostnað af framkvæmd samningsins eða framkvæmd einstakra verkefna. Samið skal fyrirfram um skiptingu kostnaðar vegna aðkeyptrar þjónustu eða annan sérstakan kostnað sem samningsaðilar þurfa að leggja í og telst ekki vera hluti af almennum daglegum rekstri samningsaðila.

9 Ýmis atriði

9.1 Gildistími - Uppsögn

Samningur þessi er ótímabundinn en hvor samningsaðili um sig hefur heimild til þess að segja honum upp með sex mánaða fyrirvara.

9.2 Ágreiningsmál

Komi upp ágreiningur um túlkun á samningi þessum eða einstökum greinum hans eða ágreiningur um framkvæmd einstakra þátta eða verkefna skulu aðilar reyna að ná sáttum. Takist það ekki og teljist forsendur samningsins af þessum sökum hafa brostið verulega er samningsaðilum heimilt að rifta samningi. Reynist nauðsynlegt að reka mál vegna samningsins skal það rekið fyrir Héraðsdómi Norðurlands eystra.

9.3 Endurskoðun

Hvor samningsaðili um sig getur hvenær sem er á samningstímanum óskað eftir endurskoðun á samningi þessum eða einstökum ákvæðum hans. Stefnunefnd skal yfirfara samninginn á þriggja ára fresti og eftir atvikum gera tillögur um endurskoðun teljist þess þörf.

9.4 Tilvísun til lagaákvæða, undirritun o.fl.

Samningur þessi byggir á heimild í 11. gr. laga nr. 85/2008 um opinbera háskóla og 7 gr. b, laga nr. 40/2007 um heilbrigðisþjónustu og tekur gildi við undirritun. Á sama tíma fellur úr gildi fyrri rammasamningur um samstarf stofnananna frá maí 2017

Akureyri, 9. janúar 2026

F.h. Háskólans á Akureyri

Áslaug Ásgeirsdóttir rektor
Brynjar Karlsson, forseti Heilbrigðis-, viðskipta- og raunvísindasviðs

F.h. Sjúkrahússins á Akureyri

Hildigunnur Svavarsdóttir, forstjóri
Hulda S. Ringsted, framkvæmdastjóri hjúkrunar

Forsaga Heilbrigðisvísindastofnunar

Mánudaginn 7. október 2002 var undirritaður samstarfssamningur við Fjórðungssjúkrahúsið á Akureyri (FSA) þar sem FSA er skilgreint sem háskólasjúkrahús. Halldór Jónsson, forstjóri undirritaði samninginn fyrir hönd FSA og Þorsteinn Gunnarsson, rektor fyrir hönd Háskólans á Akureyri (HA).

Meðal þess sem fram kemur í samstarfssamningnum er að samningsaðilar eru sammála um að koma á fót rannsóknastofnun innan heilbrigðisdeildar HA. Stofnunin beri nafnið Heilbrigðisvísindastofnun Háskólans á Akureyri (HHA).

Háskólaráð HA samþykkti reglur um HHA þann 20. júní 2003, reglur nr. 876/2003. Nýjar reglur voru settar um stofnunina þann 23. febrúar 2017. Samhliða því voru fyrri reglur felldar úr gildi ásamt því að rammasamningur um samstarfið var undirritaður.