Vilborg Arna Gissurardóttir heiðursgestur á Háskólahátíð

Vilborg Arna Gissurardóttir, ævintýrakona og pólfari, heiðursgestur á Háskólahátíð.
Vilborg Arna Gissurardóttir heiðursgestur á Háskólahátíð

Brautskráning Háskólans á Akureyri skiptist á tvo daga í ár líkt og í fyrra. Föstudaginn 14. júní munu nemendur á framhaldsnámsstigi brautskrást en á Háskólahátíð laugardaginn 15. júní munu verða brautskráðir kandídatar til bakkalárprófs og diplómunemendur á grunnstigi. Þá mun Háskólinn á Akureyri í fyrsta sinn brautskrá nemendur með BA í Lögreglu og löggæslufræðum.

Háskólahátíð verður að vanda sjónvarpað beint á sjónvarpsstöðinni N4, en einnig á Facebook-síðu HA, og hefst hún kl. 11. Að athöfn lokinni báða dagana verður boðið til móttöku þar sem allir gestir – líka þeir sem gátu ekki verið viðstaddir brautskráninguna – eru velkomnir. Boðið er upp á léttar veitingar og húsnæðið verður opið til skoðunar.

Undanfarin ár hefur skapast sú hefð að heiðursgestur ávarpi kandídata. Í fyrra hélt Sigríður Björk Guðjónsdóttir, lögreglustjóri á höfuðborgarsvæðinu mjög hvetjandi ræðu þar sem hún gaf kandídötum góð ráð í veganesti. Í ár mun Vilborg Arna Gissurardóttir ævintýrakona og pólfari heiðra gesti hátíðarinnar og flytja ávarp.