Læsi til náms og yndis

Pernille Ripp

Pernille Schmidt Ripp er kennari, rithöfundur og fyrirlesari sem starfar sem grunnskólakennari í Danmörku og vinnur jafnframt með kennurum víða um heim.

Í starfi sínu leggur hún áherslu á að endurskoða hugmyndir okkar um læsi, sjálfræði nemenda og hvers konar námsumhverfi börn eiga skilið í skólum.

Dominic Wyce

Dominic Wyse er prófessor í leik- og grunnskólafræðum við University College London, Institute of Education, og stofnandi Helen Hamlyn Centre for Pedagogy (0–11 Years), sem vinnur að rannsóknum á menntun ungra barna. Hann er einnig formaður menntunarnefndar Research Excellence Framework (REF) 2029 í Bretlandi.
Rannsóknir hans beinast einkum að kennslu í lestri og ritun í grunnskóla. Hann þróaði ásamt samstarfsfólki sínu kenninguna Double Helix of Reading and Writing, sem hefur haft áhrif á rannsóknir og kennsluhætti á alþjóðavettvangi.
Dominic Wyse hefur í meira en 25 ár lagt mikilvægt framlag til rannsókna á kennslufræði, námskrám og menntun ungra barna og hefur jafnframt skrifað áhrifamiklar bækur fyrir kennara og kennaranema.

09:30-10:45 | Setning og fyrsta lykilerindi

09:30-09:45 | Setning

09:45-10:45 | Joy Is Not a Luxury: Reclaiming Humanity in Early Literacy – Pernille Ripp

Á tímum aukinnar áherslu á skipulag og mælanlegan árangur í læsiskennslu vaknar spurningin um hvernig unnt sé að viðhalda lestrargleði án þess að slaka á faglegum kröfum. Í erindinu fjallar Pernille Ripp um hvernig fyrstu ár skólagöngunnar móta bæði lestrarfærni barna og sjálfsmynd þeirra sem lesenda. Erindið byggir á reynslu fyrirlesara úr kennslu og bókunum hennar, Passionate Readers og Passionate Learners, þar sem lögð er áhersla á mikilvægi forvitni, valfrelsis og sjálfræðis í læsisþróun. Erindið varpar ljósi á mikilvægi þess að hlúa að undrun og áhuga í læsiskennslu.

Pernille mun flytja erindið á ensku. 

10:55-11:25 | Málstofur I

11:30-12:00 | Málstofur II

12:40-13:40 | Annað lykilerindi

The Double Helix of Reading and Writing: A new theory of teaching – Dominic Wyse

Árið 2024 var kynnt ný kenning um læsiskennslu, The Double Helix of Reading and Writing (Wyse og Hacking, 2024a, 2024b). Kenningin lýsir gagnvirku sambandi lesturs og ritunar þar sem þessir tveir þættir þróast samhliða og styðja hvor annan í námsferlinu. Í erindinu er fjallað um fræðilegar forsendur kenningarinnar, þann rannsóknagrunn sem hún byggir á og hvernig hugmyndirnar tengjast árangursríkri kennslu, bæði í stefnumótun og daglegu skólastarfi. Kenningin hefur þegar hlotið athygli á alþjóðlegum vettvangi.

Dominic Wyse flytur erindið á ensku.

13:50-14:20 | Málstofur III

14:40-16:00 | Þriðja lykilerindi og ráðstefnuslit

14:40-15:30 | Gunnar Theodór Eggertsson og Yrsa Þöll Gylfadóttir

Þegar rithöfundar, sem flestir eru fullorðnir, skrifa barnabækur er óhjákvæmilegt að þeirra eigin barnæska og minningar liti skrif þeirra. Þótt við séum ekki lengur börn og getum ekki eins hæglega sett okkur í spor þeirra og skrifað út frá þeirra reynsluheimi í nútímanum þá lifir barnið í okkur enn góðu lífi. Við búum að sarpi tilfinninga, upplifana og mótandi atburða, en þurfum samt að viðhalda tengingu við nútímabörn sem lesendur. Hvernig kveikjum við áhuga þeirra á bókum og hvernig er best að viðhalda þeim áhuga? Hvaða sögur viljum við segja og eru það endilega sömu sögur og börn vilja heyra? Er nóg til af bókum fyrir alla? Yrsa Þöll og Gunnar Theodór ræða sínar leiðir til skrifta, hvernig þau vinna með bernskuminningar og leita á náðir sinna eigin barna. Þar að auki miðla þau af reynslu sinni sem barnabókahöfundar á hinum íslenska bókamarkaði og af tengslum við börn í skólum og ritsmiðjum.

15:30-16:00 | Ráðstefnuslit