Réttindi og velferð barna í skólastarfi

7. október 2026 kl. 14:30-16:00

Sálfræðispjallið

Öll velkomin í sálfræðispjallið!

Hvernig er best að bregðast við þegar erfiðar eða hættulegar aðstæður koma upp í skólastarfi?

Í Sálfræðispjallinu að þessu sinni munu Silja Dís Guðjónsdóttir og Ingunn Brynja Einarsdóttir, klínískir atferlisfræðingar, segja frá hlutverki Fagteymis grunnskóla og Menntasviðs Kópavogsbæjar, með áherslu á öryggi, fagmennsku og réttindi barna.

Fagteymið styður við faglega úrlausn þegar krefjandi aðstæður koma upp í skólastarfi. Í Sálfræðispjallinu verður meðal annars fjallað um:

Hvernig bregðast má við þegar hegðun barns getur skapað hættu fyrir barnið sjálft eða aðra
Skýra verkferla og líkamleg inngrip þegar nauðsyn krefur
Réttindi og velferð barna við slíkar aðstæður
Fyrirbyggjandi og hvetjandi aðgerðir
Kennslu á færni, stuðningsáætlanir og skráningar sem geta dregið úr hættu á endurteknum atvikum

Silja Dís og Ingunn Brynja verða einnig með sýnikennslu á helstu varnarviðbrögðum sem miða að því að efla öryggi starfsfólks og nemenda.

Viðburðurinn er haldinn í samstarfi við Samtök um atferlisgreiningu á Íslandi (SATÍS) og Fræðslu- og lýðheilsusvið Akureyrarbæjar.

Markmiðið er að miðla hagnýtri þekkingu sem getur stuðlað að auknu öryggi, faglegum vinnubrögðum og bættri líðan í skólastarfi.

Fyrirlesarar

Silja Dís Guðjónsdóttir

Silja Dís er klínískur atferlisfræðingur á menntasviði Kópavogsbæjar. Hún hefur starfað frá árinu 2022 við ráðgjöf og stuðning vegna barna og ungmenna með hegðunarvanda, með áherslu á að styðja skóla og foreldra í að beita gagnreyndum aðferðum. Silja hefur víðtæka reynslu af starfi með börnum og ungmennum.

Silja hóf störf á leikskóla á ungum aldri og starfaði síðar með einstaklingum með geðfatlanir. Í meistaranámi í hagnýtri atferlisgreiningu aflaði hún sér fjölbreyttrar starfsþjálfunar hjá farteymi Reykjavíkur, í Urriðaholtsskóla, Arnarskóla og á Sálstofunni. Í starfi sínu leggur Silja áherslu á virknimat til að greina áhrifaþætti hegðunar og tengsl hennar við umhverfið. Hún vinnur náið með teymum barna að því að efla jákvæð samskipti, bæta náms- og félagslegt umhverfi og fyrirbyggja krefjandi hegðun.

Silja er verkefnastjóri fagteymis um réttindi og velferð barna og hefur leitt innleiðingu Beanfee hugbúnaðarins í Kópavogi. Hún sinnir einnig ráðgjöf, handleiðslu og fræðslu og leggur áherslu á samstarf og stuðning við fullorðna í umhverfi barnsins.

Ingunn Brynja Einarsdóttir

Ingunn Brynja er klínískur atferlisfræðingur með vottun frá ICE-ABA og BACB. Hún hefur starfað í rúmlega 23 ár með börnum og ungmennum með alvarleg hegðunar- og þroskafrávik.

Ingunn starfaði í rúm sex ár á leikskóla sem deildarstjóri sérdeildar fyrir fötluð börn. Í kjölfarið var hún deildarstjóri stoðþjónustu í almennum grunnskóla í eitt ár áður en hún hóf störf sem deildarstjóri í Arnarskóla við opnun skólans 1. september 2017.

Ingunn hefur gegnt ýmsum störfum innan Arnarskóla og starfar í dag sem yfiratferlisfræðingur ráðgjafarmála. Hún hefur til margra ára sinnt ráðgjöf og handleiðslu fyrir foreldra og starfsfólk í leik- og grunnskólum. Undanfarin ár hefur hún jafnframt verið hluti af ráðgjafarteymi Kópavogsbæjar fyrir hönd Arnarskóla. Auk þess hefur Ingunn sinnt fræðslu, handleiðslu og setið í fagteymi sem fjallar um réttindi og velferð barna í Kópavogi.

Öll velkomin!