Kennarar frá Grænlandi „komu” í rafræna heimsókn til Kennaradeildar HA

Þann 19. mars síðastliðinn átti Kennaradeild von á góðum gestum frá Perorsaanermik Ilinniarfik / Socialpædagogisk Seminarium (PI/SPS) í Ilulissat á Grænlandi. Veðurskilyrði þann daginn reyndust því miður ekki hagstæð, svo heimsóknin færðist af staðnum og yfir á skjáinn. Þrátt fyrir það tókst að halda öflugan og innihaldsríkan fund í gegnum Teams, þar sem áhersla var lögð á faglegt samtal og miðlun þekkingar milli skóla á norðurslóðum.

Kennararnir frá Ilulissat starfa við sjö anna kennaranám þar í landi og sinna margvíslegum samfélagslegum áskorunum. Þar er sérstöku kastljósi beint að því hvernig megi þróa menntun sem tekur mið af grænlenskri menningu, tungumáli og þekkingarkerfum án þess að einangra nemendur frá alþjóðlegu samhengi.

Frjótt samtal um menntun á norðurslóðum

Fundurinn á Teams hófst með ávarpi Guðmundar Engilbertssonar, forseta Kennaradeildar HA, sem kynnti íslenska kennaranámið og starfsemi deildarinnar. Á eftir fylgdi stutt kynning frá grænlensku gestunum á kennaramenntun í Ilulissat.

Grænlensku gestirnir höfðu fyrir „heimsóknina“ lagt upp með ákveðin þemu til umfjöllunar og hvernig Kennaradeild HA ynni með eftirfarandi atriði:

• Hvernig hægt sé að flétta fagurfræðilegar og skapandi námsleiðir inn í kennsluhætti
• Hvernig má þróafjarkennsluþannig að hún verði lifandi, áhugaverð og virk
• Hvernig tryggja megi að íslenskt mál glati ekki styrk sínum
• Hvernig námskrár endurspegla íslenskt samfélag, sögu og sérstöðu?

Þvínæst tóku kennarar HA til máls í stuttum erindum þar sem kynnt voru fjölbreytt þróunarverkefni ásamt því að ræða ofangreind atriði.

Birna María Svanbjörnsdóttir, Hermína Gunnþórsdóttir, Bergljót Þrastardóttir og Brynhildur Bjarnadóttir kynntu iSHRINK Erasmus-verkefnið, þar sem unnið er náið með heimabyggð, stjórnsýslu og skyldunámsstigi á norðurslóðum. Þær lýstu því hvernig samstarf milli skólastiga og samfélags geti styrkt bæði faglegt nám og tengsl kennaranema við raunverulegt starf í nærumhverfinu. Að því loknu kynnti Sólveig Zophoníasdóttir hvernig samkennsla og samþætting náms er útfærð innan Kennaradeildar HA, þar sem áherslur á sjálfbærni og breytt hlutverk kennara í samtímanum eru ofnar inn í námskrár og kennsluhætti. Hún lagði áherslu á að slík samþætting efli bæði faglega breidd og hæfni til að takast á við samtímakröfur í menntakerfinu.

Í framhaldinu tóku Kristín Margrét Jóhannsdóttir og Finnur Friðriksson fyrir mikilvæga spurningu gesta frá Grænlandi, hvernig tryggja megi að íslenskan standi sterk í síbreytilegu samfélagi og verði ekki fyrir málþurrð. Þau fóru yfir stöðu málsins, helstu áskoranir og þær leiðir sem íslenskt menntakerfi hefur þróað til að styrkja málvitund og daglega notkun tungumálsins meðal barna og ungmenna. Að lokum fjallaði Þorlákur Axel Jónsson um það hvernig námskrár geta endurspeglað íslenskt samfélag og sögu og hversu mikilvægt það er að kennsla sé rótsett í þeirri menningarlegu og sögulegu arfleifð sem mótar samfélagið. Hann sýndi fram á hvernig fræðileg þekking og samfélagsleg skírskotun geta farið saman í námskrárgerð og hvernig slíkt samhengi getur eflt fagkennd kennara og nemenda.

Að loknum erindum fóru fram opnar umræður og spurningar, auk þess sem þátttakendur fengu hressandi kaffipásu, þó hver í sínu horni vegna fjarskiptaformsins.

Mikilvægt tækifæri til norræns samstarfs

Þrátt fyrir að gestirnir frá Grænlandi hafi ekki komist til Akureyrar að þessu sinni var fundurinn vel heppnaður og skapaði dýrmætt tækifæri til að efla tengsl milli menntastofnana á norðurslóðum. Í samtalinu komu fram fjölmargir snertifletir þar sem samstarf og miðlun gætu orðið áframhaldandi.

Kennaradeild HA vonast til að geta tekið á móti kollegum sínum frá Ilulissat síðar þegar færi gefst, og þá í persónu.