<span class="month">19</span>nóv. <span class="time">kl. 16:00-17:00</span>
Hvernig hafa fyrstu tengsl okkar í æsku áhrif á það hvernig við elskum, treystum öðrum og myndum náin sambönd á fullorðinsárum?
Í næsta Sálfræðispjalli Háskólans á Akureyri fjallar Andreea Ionescu, sálfræðingur og sálfræðimeðferðarfræðingur, um tengslamyndun og hvernig reynsla okkar úr æsku getur haft áhrif á samskipti, tilfinningalegar þarfir og náin sambönd síðar á lífsleiðinni.
Sálfræðispjallið fer fram á ensku í stofu M101 og verður einnig streymt frá því hér.
Um fyrirlesturinn
Fyrstu tengsl okkar við aðra leggja að mörgu leyti grunninn að því hvernig við upplifum nánd, traust og öryggi í samböndum. Þau geta haft áhrif á sjálfsmynd okkar, væntingar til annarra og hvernig við bregðumst við tilfinningalegri fjarlægð.
Í fyrirlestrinum verður fjallað um hvernig tengslamynstur úr æsku birtast í ástarsamböndum, samskiptum við börnin okkar og öðrum mikilvægum samböndum. Með hliðsjón af tengslakenningum og tilfinningamiðaðri meðferð (Emotionally Focused Therapy, EFT), sem Sue Johnson þróaði, verður meðal annars skoðað hvað færir okkur nær hvert öðru, hvað skapar fjarlægð og hvaða tilfinningalegu þarfir liggja að baki endurteknum ágreiningi.
Einnig verður fjallað um hvernig aukin sjálfsþekking, tilfinningaleg hreinskilni og gagnkvæmur skilningur geta hjálpað okkur að breyta gömlum samskiptamynstrum og byggja upp öruggari og innihaldsríkari sambönd.
Meginboðskapur fyrirlestursins er að þótt reynsla okkar úr æsku hafi áhrif á okkur þarf hún ekki að ákvarða hvernig sambönd okkar þróast í framtíðinni.
Um fyrirlesarann
Andreea Ionescu er sálfræðingur og sálfræðimeðferðarfræðingur með nærri tveggja áratuga reynslu af einstaklings-, para-, fjölskyldu- og hópmeðferð. Hún er með doktorsgráðu í sálfræði frá árinu 2013 og hefur í rannsóknum sínum meðal annars lagt áherslu á hvernig tengslamynstur berast milli kynslóða og hvernig efla megi öryggi í nánum samböndum.
Andreea starfaði í 14 ár sem háskólakennari við West University of Timișoara í Rúmeníu og hefur áfram sinnt kennslu við háskólann samhliða störfum sínum á sviði sálfræðimeðferðar.
Hún er einn stofnenda Clinica ReCentre Timișoara, þverfaglegrar geðheilbrigðisstofu sem sérhæfir sig meðal annars í meðferð við kvíða, þunglyndi og kulnun.
Árið 2025 gaf hún út metsölubókina The Invisible Map of Attachment: A Journey Towards Understanding Close Relationships, sem fjallar um tengslamyndun og náin sambönd.
Viðburðurinn er opinn öllum áhugasömum og öll hjartanlega velkomin!