Námstefna í Byrjendalæsi

Minningarsjóður Rósu Eggertsdóttur

Minningarsjóður Rósu Eggertsdóttur, frumkvöðuls og baráttukonu fyrir betri menntun og læsi, hefur það að markmiði að styrkja konur, stúlkur og kvár til listsköpunar og mennta. 

Þau sem hafa hug á að styrkja sjóðinn um 5.000 kr. og eignast um leið bókina Hið ljúfa læsi er velkomið að leggja inn á reikning sjóðsins, sem er í vörslu Zontaklúbbsins Þórunnar Hyrnu. 

Bankareikningur sjóðsins er:
0565-14-003491
Kt. 701190-2039

Nánari upplýsingar veitir Jenný Gunnbjörnsdóttir, jennyg@unak.is 

13.00 - 13.20 | Í minningu Rósu Eggertsdóttur fræðakonu og frumkvöðuls

- Jenný Gunnbjörnsdóttir

Námstefnan í ár er tileinkuð Rósu Eggertsdóttur, menntafrömuðar og upphafskonu Byrjendalæsis. Í þessum dagskrárlið verður framlag hennar til fræða og skólastarfs heiðrað og sjónum beint að þeirri mikilvægu arfleifð sem hún hefur skilið eftir sig. Rósa var ötull frumkvöðull og áhrifamikill fræðimaður sem hafði djúpstæð áhrif á þróun læsiskennslu og menntunar.

13.40 - 14.20 | Börn og lestrarerfiðleikar: Vandinn við að alhæfa um of

- Dr. Dominic Wyse

Að styðja börn með lestrarerfiðleika er eitt mikilvægasta verkefni í skólastarfi þar sem lestur og ritun er lykilfærni sem hefur afgerandi áhrif til framtíðar. Í erindi sínu fjallar Dr. Wyse um hvernig rannsóknir á árangursríkri kennslu fyrir börn með lestrarerfiðleika hafa stundum verið alhæfðar yfir á kennslu allra nemenda. Með því að skoða kennslu bæði sem fræðilegt viðfangsefni og framkvæmd á vettvangi er ljósi varpað á þær stefnur og kennsluhætti sem byggja á traustum rannsóknum og eru líklegastar til að styðja börn til árangurs í lestri og ritun (Wyse o.fl., 2025).

14.20 - 14.40 | Hressing

Gert er hlé á dagskrá þar sem þátttakendur eru hvattir til að standa upp, rétta úr sér og njóta léttrar hressingar. Þetta er einnig kjörið tækifæri til að spjalla saman, skiptast á hugmyndum og ræða læsi. 

14.40 - 15.10 | Lítil skref á leið til læsis

- Kennarar úr Borgarhólsskóla og Grænuvöllum Húsavík

Í erindinu verður sagt frá þróunarverkefninu Lítil skref á leið til læsis sem er samstarfsverkefni leik- og grunnskóla á Húsavík og MSHA.
Verkefnið snýst um að byggja brú milli skólastiga og styðja við læsisnám barna frá leikskóla yfir í grunnskóla. Þema verkefnisins er læsi og er það rauði þráðurinn í öllu þróunarstarfinu. Í verkefninu er einnig lögð áhersla á að efla tengsl heimila og skóla og styðja fjölskyldur í að taka virkan þátt í læsisnámi barna.

15.10 - 15.50 | Að varðveita lestrargleðina: Að efla sjálfstæða lesendur í upphafi lestrarnáms

- Pernille Ripp

Fyrstu árin í læsisnámi hafa mótandi áhrif á það hvernig börn upplifa sig sem lesendur. Í þessu hagýta erindi kynnir Pernille Ripp skipulag og kennsluaðferðir sem hjálpa til við að viðhalda lestrargleði nemenda á sama tíma og unnið er markvisst að færniþróun hjá börnum á aldrinum sex til tíu ára. Þátttakendur fá tækifæri til að skoða hvernig hægt er að styðja við sjálfstæðan lestur, eiga uppbyggileg samtöl við unga lesendur og samræma kröfur um skipulagða læsiskennslu við valfrelsi og virkni nemenda. Markmiðið er að þátttakendur fari heim með hagnýtar hugmyndir sem hægt er að nýta strax í kennslunni.

15.50 - 16.00 | Samantekt og lok

Förum yfir helstu atriði ráðstefnunnar og drögum saman þau viðfangsefni og hugmyndir sem hafa verið í brennidepli.

Pernille Ripp

Pernille Schmidt Ripp er kennari, rithöfundur og fyrirlesari sem starfar sem grunnskólakennari í Danmörku og vinnur jafnframt með kennurum víða um heim. Í starfi sínu leggur hún áherslu á að endurskoða hugmyndir okkar um læsi, sjálfræði nemenda og hvers konar námsumhverfi börn eiga skilið í skólum.

Dominic Wyce

Dominic Wyse er prófessor í leik- og grunnskólafræðum við University College London, Institute of Education, og stofnandi Helen Hamlyn Centre for Pedagogy (0–11 Years), sem vinnur að rannsóknum á menntun ungra barna. Hann er einnig formaður menntunarnefndar Research Excellence Framework (REF) 2029 í Bretlandi.
Rannsóknir hans beinast einkum að kennslu í lestri og ritun í grunnskóla. Hann þróaði ásamt samstarfsfólki kenninguna Double Helix of Reading and Writing, sem hefur haft áhrif á rannsóknir og kennsluhætti á alþjóðavettvangi.
Dominic hefur í meira en 25 ár lagt mikilvægt framlag til rannsókna á kennslufræði, námskrám og menntun og hefur jafnframt skrifað áhrifamiklar bækur fyrir kennara og kennaranema.