„Á háskólasvæðinu er skemmtileg blanda af fólki frá ólíkum löndum“

Hvað ertu að læra?

Ég er í meistaranámi í heimskautarétti (e. Polar Law).

Af hverju valdir þú Háskólann á Akureyri og þetta tiltekna nám?

Satt best að segja, þegar ég fór að kynna mér heimskautafræði og réttindi frumbyggja vissi ég að ég vildi ekki bara lesa mér til um þessi svæði í kennslubók, langt í burtu. Ég vildi upplifa norðurslóðirnar sjálf og vera þar. Þegar maður fæst við málefni á borð við stjórnun norðurslóða, loftslagsstefnu og réttindi frumbyggja skiptir staðsetningin gríðarlega miklu máli.

Að mínu mati var Háskólinn á Akureyri klárlega besti staðurinn til að stunda þetta nám. Háskólinn er mjög þekktur á alþjóðavísu fyrir sérþekkingu sína á þessu sviði og Akureyri er staðsett rétt við heimskautsbauginn. Það að vera hér þýðir að málefni sem við fjöllum um í kennslustofunni eru að gerast rétt fyrir utan gluggann hjá okkur. Við erum daglega umkringd náttúrunni og þeim raunverulegu áskorunum sem tengjast henni, sem gerir námið lifandi og áhugavert. Ég gæti í raun ekki hugsað mér betri stað til að stunda þetta nám.

Hvað hefur komið þér mest á óvart við námið?

Það sem kom mér mest á óvart var að uppgötva að námið snýst ekki eingöngu um norðurslóðir heldur nær það einnig til Suðurskautslandsins! Þar sem ég kem frá Úganda er Suðurskautslandið staður sem lítið er rætt um. Víða í Afríku er sjaldan fjallað um Suðurpólinn og margir gera sér jafnvel ekki grein fyrir því að þar er til sérstakt lagalegt kerfi sem hefur það hlutverk að stýra málefnum heillar óbyggðrar heimsálfu.

Það var einstaklega fróðlegt að læra um Suðurskautssáttmálann, umhverfisvernd á svæðinu og hvernig ákvarðanir sem teknar eru á báðum heimskautasvæðunum hafa áhrif á loftslag og hafkerfi jarðarinnar.

Ég bjóst heldur ekki við því að námið væri jafn hagnýtt og þverfaglegt og raun ber vitni. Maður situr ekki bara og lærir lög og reglur utan að, heldur tengir stöðugt saman loftslagsvísindi, náttúruvernd og mannréttindi til að átta sig á því hvernig við getum í raun verndað þessi einstöku svæði.

Hvernig myndir þú lýsa stúdentalífinu á Akureyri?

Stúdentalífið á Akureyri er notalegt, samheldið og einkennist af hlýlegu viðmóti. Þar sem ég kem frá Úganda var það vissulega ákveðið menningarsjokk í fyrstu að venjast myrkrinu og kuldanum yfir vetrartímann, en samfélagið hér hefur gert það að verkum að mér leið fljótt eins og heima hjá mér.

Þar sem Akureyri er tiltölulega lítill bær er maður aldrei bara eitt andlit í mannfjöldanum. Maður rekst sífellt á samnemendur og kennara, hvort sem það er þegar maður fær sér kaffi í bænum eða skellir sér í heitu jarðböðin eftir fyrirlestra.

Á háskólasvæðinu er skemmtileg blanda af fólki frá ólíkum löndum. Við eyðum því miklum tíma saman, deilum mat frá heimalöndunum okkar, lærum saman og förum út þegar norðurljósin láta sjá sig. Lífið hér er kannski rólegra en víða annars staðar, en það er einmitt það sem gerir það svo sérstakt. Maður myndar sterk og einlæg vináttutengsl hér.

Hver er uppáhaldsminningin þín frá tímanum þínum við HA?

Uppáhaldsminningin mín er frá einni af fyrstu vikunum í náminu, skömmu eftir að við komum til landsins. Við sátum í fyrirlestri þegar veðrið breyttist skyndilega og það byrjaði að snjóa mikið rétt fyrir utan gluggann í kennslustofunni. Fyrir mörg okkar sem komum erlendis frá var þetta í fyrsta sinn sem við sáum snjó á Íslandi!

Við stöldruðum öll við og horfðum út um gluggann, alveg hugfangin. Eftir fyrirlesturinn hlupum við öll út eins og spennt börn til að taka myndir og upplifa snjóinn. Þessi stund, ásamt kvöldum þar sem við höfum komið saman með mat frá ólíkum löndum og horft á norðurljósin með vinum víðs vegar að úr heiminum, fékk mig til að átta mig á því hversu einstakt þetta ferðalag yrði.

Hvaða ráð myndir þú gefa nemendum sem eru að hefja nám í heimskautarétti?

Mitt helsta ráð er að mæta með opnum huga og vera óhrædd við að tjá sig, jafnvel þótt bakgrunnur manns sé ekki endilega í lögfræði. Heimskautafræði tengir saman fjölmörg ólík fræðasvið, allt frá loftslagsvísindum og réttindum frumbyggja til alþjóðastjórnmála. Þess vegna hefur hvert sjónarhorn sem kemur fram í kennslustofunni raunverulegt gildi.

Hvað hagnýtu hliðina varðar ráðlegg ég öllum að taka umhverfinu og veðrinu fagnandi! Fjárfestið í góðri og hlýrri úlpu, skellið ykkur í heitu jarðböðin til að slaka á og gefið ykkur tíma til að kynnast samnemendum ykkar. Þið munið stunda nám með fólki frá öllum heimshornum og þau alþjóðlegu vináttutengsl og tengslanet sem þið myndið hér á Akureyri eru ekki síður verðmæt en námið sjálft.