Skólp og kennslutækifæri leiða aðjúnkt til Færeyja

„Fyrir 2 árum hefði mér ekki dottið í hug að ég ætti eftir að kenna í Færeyjum,” segir Eva María Ingvadóttir, aðjúnkt við Auðlindadeild sem í febrúarmánuði dvaldi við Fróðskaparsetur Færeyja þar sem hún kenndi verklega örverufræði við náttúruvísindadeild.

^{Eva undirbýr kennslu}

Forsaga dvalarinnar er sú að starfsfólk Auðlindadeildar fékk Nordplus-styrk haustið 2024 og heimsótti Fróðskaparsetur auk stofnana og fyrirtækja í nágrenni Þórshafnar. Í þeirri ferð kynntist Eva meðal annarra Anni Djurhuus dósent sem þá var að rannsaka sýklalyfjaónæmar örverur í skólpi í Færeyjum. „Þau sem þekkja mig vita að skólphreinsun er eitthvað sem ég hef ómældan áhuga á og því náðum við Anni strax vel saman,” segir Eva.

Anni hafði svo samband við Evu í lok síðasta árs, sagðist vera að fara í rannsóknarleyfi og spurði hvort hún hefði áhuga á að taka að sér verklega kennslu í örverufræði á þessu vormisseri. “Ég ákvað að grípa tækifærið og sé svo sannarlega ekki eftir því. Bæði starfsfólk deildar og nemendur tóku afskaplega vel á móti mér. Náttúruvísindadeildin er flutt í nýtt húsnæði og aðstaðan til verklegrar kennslu er þar til fyrirmyndar,” segir Eva.

^{Úr verklegri örverufræði við Fróðskaparsetur}

Við deildina leggja nemendur meðal annars stund á nám til BSc-gráðu í líffræði, sameindalíffræði og verkfræði. „Við setrið er hins vegar líka menntavísindadeild, heilbrigðisvísindadeild, sögu- og félagsvísindadeild og deild færeyskra bókmennta og máls. Tækifærin til samstarfs eru því mjög mikil,” segir Eva og bætir við: „kennaraskipti af þessu tagi eru frábær leið til tengslamyndunar og kennsluþróunar”.